ភ្នំពេញ៖ ភាពជាដៃគូទាល់តែទាំងសងខាងជួយគ្នាទើបទៅរួច រដ្ឋម្នាក់ឯងគឺទៅមិនរួចទេ បើគ្មានការចូលរួមពីវិស័យឯកជន ហើយនៅក្នុងនោះវិស័យឯកជនបានចូលរួមក្នុងតួនាទីច្រើនហើយ ប៉ុន្តែកិច្ចការមួយសំខាន់ដែលត្រូវមាននិរន្តន៍ភាព និងចីរភាព ដែលចាំបាច់គឺការចូលរួមដោយស្មោះត្រង់ និងចូលរួមដោយតម្លាភាព និង ចូលរួមអនុវត្តឱ្យបានស្រុះគ្នា សាមគ្គី ឯកភាពគ្នាពីវិស័យឯកជន ទើបគោល ការណ៍ទាំងអស់ជោគជ័យបាន ដែលនេះគឺជាកត្តាកំណត់។ នេះជាការគូសបញ្ជាក់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងពិធីប្រកាសបើកឱ្យដំណើរការជាផ្លូវការសមាគមសហព័ន្ធអ្នកវិនិយោគកម្ពុជា នាល្ងាចថ្ងៃទី០៩ ខែឧសភា ឆ្នាំ ២០២៤នេះ។
សម្តេចនាយករដ្ឋមន្ត្រីបានបន្តថា កត្តាមួយដែលសម្តេចសូមលើកឡើងក្នុងថ្ងៃនេះគឺ អនុលោមភាព ដែល បងប្អូនខ្លះឱ្យតែឮពាក្យនេះតែងតែរសើប ព្រោះតែឮដល់ពាក្យអនុលោមភាព គឺនឹកដល់សម្ពាធ នឹកដល់ គយ នឹកដល់ពន្ធដារ។ តែសម្តេចសូមបញ្ជាក់ថា ពាក្យថា អនុលោមភាព គឺភាពស្របតាម ឬការប្រព្រឹត្តទៅតាមគោលការណ៍ ផែនការនៃច្បាប់ បទបញ្ញត្តិ និងកិច្ចសន្យា។ តើការពង្រឹងអនុលោមភាពបានផលប្រយោជន៍អ្វីខ្លះ? សម្តេចថា ការពង្រឹងអនុលោមភាព គឺការពង្រឹងសណ្តាប់ធ្នាប់ របៀបរៀបរយ និងមានសុវត្ថិភាព មានបរិស្ថានមួយដែលមានភាពច្បាស់លាស់ និងងាយស្រួលក្នុងការធ្វើសកម្មភាពអាជីវកម្ម បង្កើតនូវការទុកចិត្តរវាងវិស័យឯកជន និងវិស័យឯកជន និងរវាងរដ្ឋ និងវិស័យឯកជន និងបរិស្ថានធុរកិច្ចដែលមានស្ថិរភាព និងមានលំនឹង។
ដើម្បីងាយស្រួលស្តាប់ សម្តេចនាយករដ្ឋមន្ត្រីបានលើកជាឧទាហរណ៍បែបប្រៀបធៀបជាមួយនឹងចរាចរណ៍នៅក្នុងរាជធានីភ្នំពេញ ឬចរាចរណ៍នៅក្នុងក្រុងមួយ ដែលជាការប្រៀបធៀបទៅនឹងបរិស្ថាននៃធុរកិច្ចថា ប្រសិនបើទីក្រុងស្ងាត់មនុស្ស អត់សូវមានឡាន គឺអត់សូវលំបាកទេ តែបើសិននៅក្រុងមួយនេះ មានមនុស្សច្រើន មានឡានច្រើន មានចរាចរណ៍មមាញឹក ហើយអ្នកបើកបរមិនគោរពតាមគោលការណ៍ ច្បាស់លាស់ ពោលគឺឱ្យតែឃើញប្រឡោះគឺទៅ មិនថាភ្លើងក្រហម មិនថាភ្លើងខៀវ មិនថាបញ្ច្រាស់ទិស សួរថា តើយើងទៅយ៉ាងម៉េច0x017d7 អ្នកទាំងអស់គ្នាដែលនៅទីនោះពិតជាលំបាកហើយ វាអាចបង្កើតជាហានីភ័យក្នុងការប៉ះទង្គិចគ្នា ឬអាចទៅមុខបានដោយយឺតៗ ដោយភាពលំបាក ហើយប្រសិនបើចរាចរណ៍បែបនេះ តើអ្នកបើក ឡាន អ្នកជិះម៉ូតូ អ្នកជិះកង់ អ្នកថ្មើរជើងមានភាពជឿជាក់ដែរទេ នោះប្រហែលជាអត់ទេ។ អនុលោមភាពនេះ ប្រសិនបើធ្វើឱ្យសណ្តាប់ធ្នាប់ក្នុងចរាចរណ៍នេះវាទៅស្រួល យើងមានការទុកចិត្តគ្នា ដែលនៅក្នុងធុរកិច្ចក៏ដូចគ្នា វិស័យឯកជនក៏ដូចគ្នា ទាល់តែវិស័យឯកជនចូលរួមជាមួយរាជរដ្ឋាភិបាលទើបទៅរួច ដែលក្នុងនោះត្រូវរួមគ្នាដើម្បីពង្រឹងអនុលោមភាព ដែលពាក្យថា អនុលោមភាព គឺបាន ន័យថា គ្រប់គ្នាត្រូវអនុវត្តទៅតាមគោលការណ៍ឯកភាពគ្នា ដើម្បីឱ្យយើងមានការប្រកួតប្រជែងដោយមិនហត់ អាចធ្វើផែនការដោយងាយស្រួល ជម្រុញវិស័យឯកជន បង្កើនភាពទុកចិត្តរវាងរដ្ឋ និងរដ្ឋ រវាងវិស័យឯកជន និងវិស័យឯកជន បើសមាគមដាក់ចេញជាគោលការណ៍ហើយ សមាជិកសមាគមត្រូវតែអនុវត្ត តែបើមិនអ៊ីចឹងទេតើបង្កើតសមាគមមកធ្វើអ្វី៕
ប្រភព៖ AKP
