បាត់ដំបង៖ បច្ចុប្បន្នគេសង្កេតឃើញបន្លែដែលជាប្រភេទដំណាំលក្ខណៈគ្រួសារចម្រុះគ្រប់មុខមិនប្រើជីគីមី ហើយអ្នកស្រុកនិយមទទួលទានជាប្រចាំ ក្នុងនោះ មានដូចជា ផ្លែននោង ស្លឹកបាស់ ស្លឹកជី ស្អំ ស្ពៃ និងត្រកួនជាដើម មានលក់ពោរពាសនៅស្ទើរគ្រប់ទីផ្សារក្នុងខេត្តបាត់ដំបង។
អាជីវករក្នុងស្រុកឯកភ្នំ ខេត្តបាត់ដំបង បានប្រាប់ថា ពួកគាត់អាចរកប្រាក់ចំណូល បានគ្រាន់បើ ស្របពេលអាកាសធាតុឡើងកម្ដៅខ្លាំង ត្បិតប្រភេទបន្លែចម្រុះទាំងនេះ ជាប្រភេទអាហារប្រចាំថ្ងៃសម្រាប់មនុស្សទូទៅដែលមិនមានសារធាតុគីមីនាំឱ្យប៉ះពាល់សុខភាព។
បន្លែចម្រុះជាលក្ខណៈគ្រួសារ គឺជាប្រភេទដំណាំ ដែលប្រើប្រាស់ការដាំដុះតាម ប្រពៃណី ហើយប្រមូលផល ក្នុងរយៈពេលខ្លី ចន្លោះពី ៣-៦ខែ កសិករអាចប្រមូលផល ដើម្បីយកទៅលក់បន្តក្នុងទីផ្សារ ជារៀងរាល់ថ្ងៃ។
អាជីវករលក់បន្លែប្រភេទខាងលើនេះ នៅតាមទីផ្សារជាច្រើន បានលើកឡើង ស្រដៀងគ្នាថា រដូវកាលនេះពួកគាត់លក់ដាច់គ្រាន់បើ ជាងរដូវកាលកន្លងទៅ។ ពួកគាត់ថា ការលក់ដាច់នេះ ដោយសារតែរដូវកាលនេះមានរលកកម្តៅក្តៅខ្លាំងខុសពីឆ្នាំមុនៗ ទើបគ្រប់បន្លែលក់ដាច់ ហើយពួកគាត់ក៏ពិបាកដើរទិញនៅតាមភូមិនោះដែរព្រោះអ្នកភូមិយក មកលក់ដុំឱ្យដល់ទីកន្លែង។
អ្នកស្រីយិន ធី អាជីវករលក់បន្លែគ្រប់មុខ នៅផ្សារព្រែកក្រូច ក្នុងស្រុកឯកភ្នំ ដែលប្រកបរបរនេះអស់រយៈពេលជាច្រើនឆ្នាំមកហើយ បានលើកឡើងថា នៅរដូវកាលឆ្នាំនេះ បើគិតពីពាក់កណ្តាលខែមីនា កន្លងមករហូតដល់ពេលនេះ អ្នកស្រីលក់ដាច់គ្រាន់បើ ហើយអ្នកស្រីពិបាកដើរកទិញពីតាមភូមិ ដោយសារតែអ្នកភូមិខ្លះ ប្រមូលផលបានតិចតួច ហើយខ្លះត្រូវប្រឈមនឹងកម្តៅស្វិតអស់ ជាពិសេស ផ្លែននោងជ្រុង និងននោងប្រហើរ គឺពិបាករកទិញយកមក លក់បន្ត ខណៈបន្លែ២មុខនេះ លក់ដាច់ខ្លាំង ដោយសារតែបន្លែនេះ វាធ្វើឱ្យអ្នកដែលបរិភោគត្រជាក់ខ្លួន និងជួយសុខភាពផងដែរ។
អ្នកស្រីបន្តថា ផ្លែននោងឡើងថ្លៃ ប៉ុន្មានប្រហែល ១អាទិត្យមុន ១គីឡូក្រាម មានតម្លៃ ២០០០រៀល តែពេលនេះឡើង ៣០០០រៀល ទាំងននោងជ្រុង និងនោងប្រហើរ។ យ៉ាងណាមិញ ប្រជាកសិករ ដែលជាអ្នកដាំដុះលើផ្ទៃដីភូមិក្នុងមូលដ្ឋាន ក្នុងស្រុកឯកភ្នំ បានឱ្យដឹងថា បន្លែននោងជ្រុង ប្រហែល កន្លះខែមុន បានប្រមូលផល លក់ឱ្យឈ្មួញ បាន១គីឡូក្រាម ក្នុងតម្លៃត្រឹមចន្លោះពី ១៥០០រៀល ទៅ ២០០០រៀល តែប៉ុណ្ណោះ។
សម្រាប់ពេលបច្ចុប្បន្ននេះ ប្រភេទបន្លែទាំងនេះ អាចលក់ចេញបាន ចន្លោះពី ១គីឡូក្រាម តម្លៃ ២៥០០រៀល ទៅ ៣០០០រៀល ដោយពេលខ្លះរកតែននោងលក់មិនបានផង ព្រោះដើមននោងចាប់ស្វិតងាប់បណ្តើរៗដោយសារតែក្តៅពេក ហើយប្រភពទឹកក៏នៅតិចស្ទើរ រីងស្ងួតទាំងស្រុង។
លោកស្រីបន្ថែមថា «គ្រួសារខ្ញុំដាំដំណាំឆ្លងកាត់នេះរាល់ឆ្នាំ មិនរើសខែថ្ងៃនោះទេ អស់មួយសារដាក់ដាំថ្មីទៀតជាបន្តបន្ទាប់ ដើម្បីទ្រទ្រង់គ្រួសារ ព្រោះតែគ្មានមុខរបរអ្វីផ្សេង បើសិនជាលក់ ដាច់ដូចឆ្នាំនេះ ពិតជាសប្បាយចិត្ត ភ្លេចការនឿយហត់ជាមិនខានឡើយ»។
ចំណែកប្រជាកសិករ នៅស្រុកមោងឫស្សីម្នាក់ទៀត លោក ឆន ឡឹប បានឱ្យដឹងដែរថា ផ្លែននោងលោកបេះស្ទើរមិនទាន់តាមតម្រូវការលើទីផ្សារ ក៏ដូចជាអ្នកភូមិជាមួយគ្នាដែល មករកទិញដល់ចម្ការ ដែលលោកបានដាំលើផ្ទៃដីត្រឹម ១រ៉ៃប៉ុណ្ណោះ ហើយក៏ទទួលបានកម្រៃ គ្រាន់បានទប់ទល់ជីវភាពក្នុងគ្រួសារផងដែរ។
លោកបន្តថា «បើតាមខ្ញុំគិត ថាទំហំដី ១រ៉ៃនេះ វាជាប្រភពផ្តល់ជីវភាពរបស់គ្រួសារខ្ញុំ ឱ្យតែយើងចេះច្នៃ វានឹងមានប្រយោជន៍ ហើយកន្លងមកខ្ញុំតែងចេញ រកលុយឆ្ងាយពីគ្រួសារ តែអត់មានអីសល់ធំដុំផង ដល់ពេលខ្ញុំចាប់ផ្តើមធ្វើដំណាំឆ្លងកាត់លុយបានរហូត បើគិតទៅខ្ញុំធ្វើយូរឆ្នាំដែរហើយ បើគឹតមកដល់ពេលនេះ បន្លែដែលខ្ញុំដាំតម្រូវតាមទីផ្សារ តែននោង ត្រូវតែមានរហូត ព្រោះគេចូលចិត្តគ្រប់គ្នា»។
ដោយឡែក លោកស្រី ផាន់ មុំ ជាកសិករក្នុងស្រុកបាណន់ ជាអ្នកដាំបន្លែ ឆ្លងកាត់មិនតិចឆ្នាំនោះដែរ បាននិយាយប្រាប់ដោយ លាយឡំសំណើចថា ពេលនេះ អ្នកដាំបន្លែ បែរជារកទិញបន្លែពីផ្សារស្ទើរមិនចង់បាន ព្រោះបន្លែដែលបានដាំត្រូវងាប់គ្មាន សល់ ដោយសាររលកកម្តៅក្តៅស្ទើរឆេះ។
លោកស្រីសង្កត់ថា «មិនមែនតែខ្ញុំទេ ដំណាំអ្នកផ្សេងៗក៏ស្វិតងាប់ទាំងអស់ដែរ បើសិនជាមានអ្នកដាំបាន នៅសល់លក់ក៏បានថ្លៃដែរ ដូចដំណាំបន្លែខ្ញុំអ៊ីចឹង បើសិននៅសល់ដូចឆ្នាំមុន គឺបានលុយក៏មិនតិចដែរ អាចនិយាយបានថាគួរសម»៕
ប្រភព៖ AKP
