ក្រចេះ៖ កូនផ្សោតទើបកើតថ្មីមួយក្បាល ត្រូវបានប្រទះឃើញដោយក្រុមការងារស្រាវជ្រាវ នៃរដ្ឋបាលជលផល និងអង្គការ WWF នាព្រឹកថ្ងៃទី០១ ខែឧសភា ឆ្នាំ២០២៤នេះ នៅអន្លង់ កាំពី ភូមិកាំពី ឃុំសំបុក ស្រុកចិត្របុរី ខេត្តក្រចេះ។ កូនផ្សោតនេះស្ថិតនៅក្នុងក្រុមសត្វផ្សោត ធំៗចំនួន២ក្បាលផ្សេងទៀត។
ក្រសួងកសិកម្មរុក្ខាប្រមាញ់និងនេសាទបានឱ្យដឹងនៅថ្ងៃទី០១ ខែឧសភានេះថា ”នេះគឺជាកូនផ្សោតទី៨ ដែលបានកើតនៅដើមឆ្នាំ២០២៤នេះ។ រដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ សូមអរគុណចំពោះបងប្អូនឆ្នាំទន្លេ អាជ្ញាធរមូលដ្ឋាន និងប្រជាពលរដ្ឋដែលបាន ចូលរួមថែរក្សានិងការពារធនធានជលផល ដ៏មានតម្លៃ”។
ជាមួយនឹងការរកឃើញវត្តមានកូនផ្សោតទើបកើតថ្មីមួយក្បាលថ្មីនេះដែរ ក្រសួងកសិកម្ម បានអំពាវនាវឱ្យដល់ពលរដ្ឋពិសេសស ប្រជានេសាទបើបានប្រទះឃើញសត្វផ្សោត ពិសេសកូនផ្សោត សូមផ្តល់ព័ត៌មានមកសមត្ថកិច្ចជលផល ដែលមានលេខទូរស័ព្ទ ០១២៨៩៧៩៤៣ ០១១៣៥៥៨៨៣ ០៩៩៧៩១៩១៩ ០៩២៩ ១៨ ១៤ ៤ និង ០១៧៨១៨៣៨២៕
ប្រភព៖ AKP
