ភ្នំពេញ៖ ឯកឧត្តម នេត្រ ភក្ត្រា រដ្ឋមន្ត្រីនៃក្រសួងព័ត៌មានបានថ្លែងថា ក្រសួងកំពុងពិនិត្យ និងរៀបចំឡើងវិញក្នុងការធ្វើច្បាប់ស្តីពីរបបសារព័ត៌មានថ្មីជំនួសឱ្យច្បាប់នៃរបបសារព័ត៌មានចាស់ដែលត្រូវបានគេមើលឃើញកំពុងហួសសម័យកាលការវិវត្តនៃសង្គមនាពេលបច្ចុប្បន្នសំដៅធ្វើយ៉ាងណាជួយពង្រឹងលើវិស័យសារព័ត៌មាននៅកម្ពុជាឱ្យកាន់តែរឹងមាំ និងមានប្រសិទ្ធភាពបន្ថែមទៀត។
ថ្លែងក្នុងសន្និសីទសារព័ត៌មាន ស្តីពីការប្រកាសផ្សព្វផ្សាយរបាយការណ៍ស្តីពី «ស្ថានភាពសេរីភាពសារព័ត៌មាននៅកម្ពុជា» កាលពីរសៀលថ្ងៃទី៣០ ខែមេសា ឆ្នាំ២០២៤ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានគូសបញ្ជាក់ថា៖ “ ច្បាប់ស្តីពីរបបសារព័ត៌មានបានអនុម័តឱ្យប្រើប្រាស់តាំងតែពីឆ្នាំ១៩៩៥បច្ចុប្បន្ននេះមានអាយុ២៩ឆ្នាំហើយ។ច្បាប់នេះមិនទាន់បានធ្វើអ្វីនៅឡើយទេ ប៉ុន្តែក្នុងរាជរដ្ឋាភិបាលអាណត្តិថ្មីនេះក្រសួងព័ត៌មានកំពុងដឹកនាំក្រុមការងារដើម្បីធ្វើកិច្ចការងារនេះ ។ ដោយក្នុងនេះបានធ្វើការពិភាក្សាជាមួយក្រុមប្រឹក្សាអ្នកច្បាប់នៃទីស្តីការគណៈរដ្ឋមន្ត្រីដើម្បីពិភាក្សាថាតើយើងត្រូវធ្វើដូចម្តេច ជារួម និងជាយោបល់យើងនឹងធ្វើច្បាប់ថ្មី ហើយច្បាប់ថ្មីនេះនឹងឈរលើមូលដ្ឋាននៃច្បាប់ស្តីពីរបរបបសារព័ត៌មានចាស់”។ ឯកឧត្តមបានមានប្រសាសន៍ថា ប្រទេសកម្ពុជា ក៏ដូចជាប្រទេសផ្សេងៗទៀតក្នុងតំបន់ បានបោះជំហានចូលដល់ចំណុចរបត់នៃបរិវត្តកម្មឌីជីថល ដែលបច្ចេកវិទ្យាទំនើប និងសម្បូណ៌បែបបានផ្លាស់ប្តូររបៀបនៃការផ្សព្វផ្សាយ ទទួល និងចែករំលែកព័ត៌មាន ក៏ដូចជា ទំនាក់ទំនងក្នុងការរស់នៅប្រចាំថ្ងៃ។
ឯកឧត្តមរដ្ឋមន្ត្រីក្រសួងព័ត៌មានក៏បានលើកឡើងថា៖ ”អីចឹងគោលការណ៍ដែលមានចែងទាំងប៉ុន្មានក្នុងច្បាប់ស្តីពីរបបសារព័ត៌មានចាស់នេះ យកជាមូលដ្ឋានគ្រឹះទាំងអស់។ សូមកុំមានការព្រួយបារម្ភថាបាត់បង់ធាតុណាមួយតែយើងនឹងបន្ថែមធាតុថ្មីបញ្ចូលបន្ថែមទៀតដើម្បីបន្ស៊ីទៅនឹងការវិវត្តថ្មីៗនៃសង្គមរបស់យើង”។ ឯកឧត្តមរដ្ឋមន្ត្រីបានបញ្ជាក់ថា ទិដ្ឋភាពនៃការប្រែប្រួល ទាំងនេះចាំបាច់ទាមទារឱ្យភាគីទាំងអស់ក្នុងវិស័យព័ត៌មានអភិវឌ្ឍន៍ខ្លួនឱ្យស្របនឹងនិន្នាការវិវត្តន៍បច្ចុប្បន្ន និងឱ្យស៊ីសង្វាក់គ្នា ជាមួយដំណើរការនៃការអភិវឌ្ឍវិស័យព័ត៌មានកម្ពុជា ក្នុងការធានាគុណភាពព័ត៌មាន ប្រសិទ្ធភាពផ្សព្វផ្សាយប្រកបដោយ ភាពប្រកួតប្រជែង គោរពក្រមសីលធម៌វិជ្ជាជីវៈ ព្រមទាំងចូលរួមក្នុងការប្រឆាំងព័ត៌មានក្លែងក្លាយ។
ឯកឧត្ដម នេត្រ ភក្ដ្រា រដ្ឋមន្ត្រីក្រសួងព័ត៌មានគូសបញ្ជាក់បន្ថែមផងដែរថាក្រសួងព័ត៌មានបានត្រៀមខ្លួនរួចជាស្រេចក្នុងការសហការជាមួយសមាគមសារព័ត៌មាន និងភាគីពាក់ព័ន្ធទាំង អស់ ក្នុងការលើកកម្ពស់គុណភាពវិជ្ជាជីវៈសារព័ត៌មាន និងប្រសិទ្ធភាពនៃប្រព័ន្ធផ្សព្វផ្សាយ តាមរយៈការបន្តពង្រឹងការប្រតិបត្តិក្រមសីលធម៌វិជ្ជាជីវៈ ការគ្រប់គ្រងសន្តិសុខព័ត៌មានបន្តផ្តល់កិច្ចគាំពារសង្គមនិងការការពារផ្នែកច្បាប់ដល់អ្នកសារព័ត៌មានដែលគោរពក្រមសីលធម៌ ការពង្រឹងសមត្ថភាពជំនាញតាមរយៈការបណ្តុះបណ្តាលជំនាញនិពន្ធ ផលិត និង ផ្សព្វផ្សាយព័ត៌មានប្រកបដោយគុណភាព ក៏ដូចជាបំពាក់បំប៉នជូនដល់អ្នកសារព័ត៌មាននូវចំណេះដឹងស្តីពីក្រមសីលធម៌។
បើតាមរដ្ឋមន្ត្រីក្រសួងព័ត៌មានបានឱ្យដឹងដែរថា កន្លងមក ក្នុងការគ្រប់គ្រងអង្គភាពសារព័ត៌មាន និងពង្រឹងការអនុវត្តក្រមសីលធម៌វិជ្ជាជីវៈ ក្រសួងបានប្រកាសលុបឈ្មោះអង្គភាពសារព័ត៌មានចេញពីបញ្ជីចំនួន ២០អង្គភាព ក្នុងចន្លោះឆ្នាំ២០២០ ដល់ឆ្នាំ២០២៣ ដោយមូលហេតុអង្គភាពទាំងនោះបានបំពានក្រមសីលធម៌វិជ្ជាជីវៈ និងលិខិតបទដ្ឋានគតិយុត្តជាធរមាន។ ទន្ទឹមនឹងនេះ ក្រសួងព័ត៌មានបានអនុវត្តន៍នីតិវិធីរដ្ឋបាល ដោយបានកោះហៅអ្នកពាក់ព័ន្ធក្នុងការប្រព្រឹត្តកំហុសវិជ្ជាជីវៈសារព័ត៌មាន ដើម្បីអប់រំណែនាំ និងធ្វើកិច្ចសន្យាឱ្យបញ្ឈប់ទង្វើខុសឆ្គងទាំងនោះសរុបចំនួនជាង៥០ករណី៕
ប្រភព៖ AKP
