ភ្នំពេញ៖ ក្រុមប្រឹក្សាបច្ចេកទេស ស្តីពី គោលនយោបាយជាតិបញ្ចប់អេដស៍ និងចីរភាពកម្មវិធីអេដស៍សម្រាប់ឆ្នាំ២០២៣-២០២៨ នាព្រឹកថ្ងៃទី២៥ ខែមេសា ឆ្នាំ២០២៤នេះ បានរៀបចំកិច្ចប្រជុំក្រោមអធិបតីភាពឯកឧត្តមបណ្ឌិត ឈិន ឃិនដារ៉េត អគ្គលេខាធិការ អាជ្ញាធរជាតិប្រយុទ្ធនឹងជំងឺអេដស៍ ដោយមានការអញ្ជើញចូលរួមសមាជិកចូលរួមថ្នាក់ជាតិ ថ្នាក់ក្រោមជាតិ និងអង្គការដៃគូនានា។
ក្នុងកិច្ចប្រជុំនេះ ឯកឧត្តមបណ្ឌិត ឈិន ឃិនដារ៉េត បានជម្រាបជូនពីការងារ ដែលបានរៀបចំកន្លងមកដោយមានការសហការពីតំណាងក្រសួង ស្ថាប័ន ថ្នាក់ជាតិ ថ្នាក់ក្រោមជាតិ និងអង្គការដៃគូទាំងកម្រិតថ្នាក់នយោបាយ និងបច្ចេកទេស ហើយគ្រោង នឹងរៀបចំវេទិកាជាមួយដៃគូ ក្នុងចក្ខុវិស័យធានាថា ប្រទេសកម្ពុជាជាប្រទេសមួយ គ្មានការគំរាមកំហែងពីមេរោគអេដស៍ និងជំងឺអេដស៍ ព្រមទាំងធានាថាប្រជាជនកម្ពុជា មានសុខភាពល្អ និងរស់នៅប្រកបដោយសុខុមាលភាព គ្មានការភ័យខ្លាច ដោយសារជំងឺអេដស៍ ជាមួយនឹងគោលដៅយកប្រជាជនជាស្នូលទប់ស្កាត់ការឆ្លងថ្មីក្រោម ១ករណី ក្នុង១ថ្ងៃ ឬជាង ២០០នាក់ក្នុង១ឆ្នាំ ស្លាប់ដោយសារអេដស៍ឱ្យបានក្រោម ២០០នាក់ក្នុង១ឆ្នាំ បំបាត់ការរើសអើង និងមាក់ងាយអ្នកផ្ទុកមេរោគអេដស៍ ឱ្យអស់ពីសង្គមកម្ពុជា។
ជាមួយគ្នានេះ ឯកឧត្តមបណ្ឌិត ឈិន ឃិនដារ៉េត បានជំរុញឱ្យគ្រប់តំណាងក្រសួង ស្ថាប័ន និងថ្នាក់ក្រោមជាតិលើកគម្រោងថវិកាសម្រាប់គាំទ្រគោល នយោបាយជាតិ បញ្ចប់អេដស៍ និងចីរភាពកម្មវិធីអេដស៍សម្រាប់ឆ្នាំ២០២៣-២០២៨។
សូមបញ្ជាក់ថា៖ គោលនយោបាយជាតិបញ្ចប់អេដស៍ និងចីរភាពកម្មវិធីអេដស៍ សម្រាប់ឆ្នាំ២០២៣-២០២៨ គឺជាការពង្រឹងប្រព័ន្ធជាតិឆ្លើយតបជាពហុវិស័យ ចំពោះមេរោគអេដស៍ និងជំងឺអេដស៍ តាមរយ:ការពង្រីក ពង្រឹង និងពន្លឿនកម្មវិធីបង្ការ កម្មវិធីថែទាំព្យាបាល គាំពារសង្គម បញ្ចប់ការរើសអើង និងមាក់ងាយ ចលនា ធនធាន ពង្រឹងប្រសិទ្ធភាពនៃប្រព័ន្ធតាមដាន និងវាយតម្លៃជាដើម៕
ប្រភព៖ AKP
