ភ្នំពេញ៖ ក្រុមហ៊ុន STEFANO RICCI ដែលជាក្រុមហ៊ុនមានម៉ាកល្បីនៅលើពិភពលោក បានជ្រើសរើសយកទីតាំងមួយចំនួននៅក្នុងប្រទេសកម្ពុជា ដើម្បីថតរូបសម្រាប់ធ្វើការផ្សព្វផ្សាយដោយភ្ជាប់ជាមួយផលិតផលរបស់ក្រុមហ៊ុន ក្នុងការចូលរួមចំណែកជួយផ្សព្វផ្សាយអំពីសក្ដានុពលទេសចរណ៍របស់កម្ពុជា ទៅកាន់ពិភពលោក។ នេះគឺជាការលើកឡើងរបស់ឱ្យលោក NICCOLÒ RICCI នាយកប្រតិបត្តិ ក្រុមហ៊ុន STEFANO RICCI ក្នុងឱកាសចូលជួបសម្តែងការគួរសម និងពិភាក្សាការងារជាមួយឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន នារសៀលថ្ងៃទី២២ ខែមេសា ឆ្នាំ២០២៤ នៅទីស្តីការក្រសួងព័ត៌មាន។
ក្នុងឱកាសអញ្ជើញមកប្រទេសកម្ពុជា ដើម្បីថតរូបផ្សព្វផ្សាយពីផលិតរបស់ខ្លួន លោក NICCOLÒ RICCI អគ្គនាយករបស់ក្រុមហ៊ុន STEFANO RICCI ដែលជាម៉ាកល្បីនៅលើពិភពលោក រួមជាមួយអ្នកឧកញ៉ា សំអាង វឌ្ឍនៈ អគ្គនាយកក្រុមហ៊ុន វឌ្ឍនៈ ប្រ៊ូវើរី បានជម្រាបជូនឯកឧត្ដមរដ្ឋមន្ដ្រីពីគោលបំណងមកប្រទេសកម្ពុជា ដោយជ្រើសរើសយកទីតាំងមួយចំនួនពាក់ព័ន្ធ បេតិកភណ្ឌ វប្បធម៌ ស្ថាបត្យកម្ម និងធនធានធម្មជាតិរបស់ខ្មែរ ដើម្បីថតរូប សម្រាប់ធ្វើការផ្សព្វផ្សាយភ្ជាប់ជាមួយផលិតផល STEFANO RICCI ដែល Brand ល្បីរបស់ពិភពលោក ។
លោក NICCOLÒ RICCI បានគូសបញ្ជាក់ថា ក្នុងគម្រោងអន្តរជាតិលើការផ្សព្វផ្សាយផលិតផល STEFANO RICCI គឺបានធ្វើនៅប្រទេស អេហ្ស៊ីប ប្រទេស អាយលេន ( ICELAND ) កាឡាប៉ាហ្គោ និងប្រទេសម៉ុងហ្គោលី ដែលជាផ្នែកមួយនៃការផ្សព្វផ្សាយ ហើយក្រុមការងាររបស់ STEFANO RICCI ក៏បានមកប្រទេសកម្ពុជា ដើម្បីថតរូបសម្រាប់ការផ្សព្វផ្សាយទៅកាន់អន្តរជាតិ និងពិភពលោក នូវទីតាំងមួយចំនួនក្នុងប្រទេសកម្ពុជាផងដែរ។
ជាមួយគ្នានេះដែរ ឯកឧត្តម នេត្រ ភក្ត្រា បានថ្លែងអំណរគុណដល់ លោក NICCOLÒ RICCI អគ្គនាយកក្រុមហ៊ុន STEFANO RICCI ដែលបានចាប់អារម្មណ៍លើប្រទេសកម្ពុជា ហើយបានដឹកនាំក្រុមការងារមកធ្វើការថតរូបដើម្បីផ្សព្វផ្សាយទៅកាន់ពិភពលោក។ ឯកឧត្តមរដ្ឋមន្ត្រីជឿជាក់ថា តាមរយៈរូបភាពនៃការតាំងពិព័រណ៍ ផ្សារភ្ជាប់ជាមួយផលិតផល STEFANO RICCI គឺនឹងធ្វើឱ្យពិភពលោក ជាពិសេសអតិថិជនដែលជាអ្នកប្រើប្រាស់ផលិតរបស់ក្រុមហ៊ុន STEFANO RICCI មានការចាប់អារម្មណ៍កាន់តែខ្លាំង ហើយអញ្ជើញមកទស្សនាប្រទេសកម្ពុជា ដែលជាផ្នែកមួយដ៏សំខាន់នៃជាការចូលរួមផ្សព្វផ្សាយពីសក្តានុពលទេសចរណ៍របស់ប្រទេសកម្ពុជាទៅកាន់ពិភពលោកផងដែរ៕
ប្រភព៖ AKP
