ក្រចេះ៖ ក្រសួងកសិកម្ម រុក្ខាប្រមាញ់ និងនេសាទ និងរដ្ឋបាលជលផល បានបង្ហាញក្តីរីករាយដោយបញ្ជាក់ថា គេទើបបានរកឃើញកូនផ្សោតទើបកើតថ្មីមួយក្បាលទៀត នៅអន្លង់កាំពី ខេត្តក្រចេះ ។
បើតាមលោក ជំទាវ អ៊ឹម រចនា អ្នកនាំពាក្យក្រសួងក្រសួងកសិម្ម រុក្ខាប្រមាញ់ និង នេសាទបាន ឱ្យដឹងថា កូនផ្សោតដែលទើបនឹងកើតនេះ ត្រូវបានប្រទះឃើញដោយក្រុមការងារស្រាវជ្រាវ នៃរដ្ឋបាលជលផល និងអង្គការ WWF វេលាម៉ោង ១៥:១០នាទី នាថ្ងៃចន្ទ ១៤កើត ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី២២ ខែមេសា ឆ្នាំ២០២៤ នៅអន្លង់កាំពី ភូមិជ្រោយបន្ទាយ ឃុំជ្រោយបន្ទាយ ស្រុកព្រៃប្រសព្វ ខេត្តក្រចេះ ។ កូនផ្សោតនេះ ស្ថិតនៅក្នុងក្រុមសត្វផ្សោតធំៗចំនួន ៣ក្បាលផ្សេងទៀត ។
គួរបញ្ជាក់ថា នេះគឺជាកូនផ្សោតទី៧ ដែលបានកើតនៅដើមឆ្នាំ២០២៤នេះ ។ រដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ សូមអរគុណចំពោះបងប្អូនឆ្មាំទន្លេ, អាជ្ញាធរមូលដ្ឋាន, និងប្រជាពលរដ្ឋ ដែលបានចូលរួមថែរក្សា និងការពារធនធានជលផលដ៏មានតម្លៃ ។
ជាមួយគ្នានេះ ក្រសួងកសិកម្ម ក៏បានអំពាវនាវដល់បងប្អូនប្រជានេសាទ នៅពេលបានប្រទះឃើញវត្តមានសត្វផ្សោត ត្រូវផ្តល់ព័ត៌មានមកសមត្ថកិច្ចជលផល ដែលមានលេខទូរស័ព្ទ ០១២ ៨៩៧ ៩៤៣, ០១១ ៣៥៥ ៨៨៣, ០៩៩ ៧៩១ ៩១៩, ០៩២ ៩១៨ ១៤៤ និង ០១៧ ៨១៨ ៣៨២ ៕
ប្រភព៖ AKP
