សៀមរាប៖ លោក លី វណ្ណៈ នាយករដ្ឋបាលខេត្តសៀមរាប បានឱ្យដឹងនារសៀលថ្ងៃទី១០ ខែមេសា ឆ្នាំ២០២៤នេះ ថា ក្រុមការងារនីមួយៗនៃព្រឹត្តិការណ៍សៀមរាបសង្ក្រាន្ត បានកំពុងមមាញឹកក្នុងការរៀបចំការងាររបស់ខ្លួន ដែលគិតត្រឹមល្ងាចថ្ងៃទី១០ ខែមេសា ឆ្នាំ២០២៤នេះ កន្លែងកម្សាន្តនីមួយៗសម្រេចបាន៩០%ហើយ។
លោក គឿយ រដ្ឋា តំណាងឱ្យក្រុមការងាររៀបចំកម្មវិធីតោះតោះលេងទឹកនៃស.ស.យ.ក បានឱ្យដឹងថា សម្រាប់កម្មវិធីតំបន់តោះតោះលេងទឹក ក្នុងចំណោមកម្មវិធីជាច្រើនទៀតនៃសៀមរាបសង្ក្រាន្ដ មកដល់ពេលនេះកំពុងធ្វើសាកល្បង ដូចជាកន្លែងបាញ់ទឹក និងកន្លែងខ្លះត្រៀមបំពាក់ឧបករណ៍ និងសម្ភារបន្ថែម។ កម្មវិធីតោះតោះលេងទឹកនេះនឹងមានការលេងទឹកក្រោមទុយោទឹកនៅលើថ្នល់ ប្រដាល់ធ្លាក់ទឹក លេងល្បែងកម្សាន្ដលើទឹកសាប៊ូ កម្មវិធីដើមចេកម៉ែក្មេក ដើរលើខ្សែពួរនៅលើទឹកស្ទឹង ជិះកង់លើទឹកស្ទឹង ដើរលើស្ពានយោលជាដើម។
ជាមួយគ្នានេះដែរ លោក ធិម សេរីវុឌ្ឍ ប្រធានស្តីទីមន្ទីរទេសចរណ៍ខេត្តសៀមរាប បានឱ្យដឹងថា សម្រាប់សេវាកម្មស្នាក់នៅក្នុងព្រឹត្តិការណ៍សៀមរាបសង្ក្រាន្ត នាពេលខាងមុខនេះ គិតត្រឹមល្ងាចថ្ងៃទី១០ ផ្ទះសំណាក់ ក៏ដូចជាសណ្ឋាគារខ្នាតតូច និងមធ្យមទទួលបានការកក់ច្រើន និងមួយចំនួនបានពេញអស់ហើយ ចំណែកសណ្ឋាគារខ្នាតធំនៅមានសេសសល់។
លោកប្រធានស្ដីទីបានគូសបញ្ជាក់ថា នៅថ្ងៃទី១៣ ដល់ថ្ងៃទី១៦ ខែមេសា ឆ្នាំ២០២៤ ជាថ្ងៃនៃការរៀបចំព្រឹត្តិការណ៍សៀមរាបសង្ក្រាន្ត ដើម្បីអបអរបុណ្យចូលឆ្នាំថ្មីប្រពៃណីជាតិខ្មែរ ដែលក្នុងព្រឹត្តិការណ៍នោះ អាជ្ញាធរខេត្តសៀមរាប ក៏ដូចជាភាគីពាក់ព័ន្ធនានា បានខិតខំរៀបចំឱ្យមានព្រឹត្តិការណ៍កម្សាន្តនានា ដើម្បីត្រៀមខ្លួនទទួលបងប្អូនប្រជាពលរដ្ឋក្នុងខេត្ត ក៏ដូចជាអ្នកទេសចរជាតិ និងអន្តរជាតិមកកម្សាន្ត។ រហូតមកដល់ពេលនេះ សេវាកម្មស្នាក់នៅក្នុងក្រុងសៀមរាបទាំងតូចទាំងធំមានប្រមាណជាង៤០០ទីតាំងបានបើកដំណើរការឡើងវិញ។
ព្រឹត្តិការណ៍សៀមរាបសង្ក្រាន្តឆ្នាំ២០២៤នេះ ត្រូវបានរៀបចំជាលើកទី៣ហើយ ដើម្បីផ្តល់ឱកាសឱ្យយុវជន សាធារណជនខ្មែរទូទៅ បានចូលរួមអបអរសាទរពិធីបុណ្យចូលឆ្នាំថ្មីប្រពៃណីជាតិនៅលើទឹកដីប្រវត្តិសាស្ត្រសៀមរាបអង្គរ ជាលក្ខណៈមហាគ្រួសារខ្មែរតែមួយ។ ព្រឹត្តិការណ៍នេះនឹងផ្តល់ឱកាសឱ្យព្រះរាជាណាចក្រកម្ពុជា បានផ្សព្វផ្សាយលើកតម្កើងអរិយធម៌ វប្បធម៌ ទំនៀមទម្លាប់ប្រពៃណីដ៏ផូរផង់របស់ប្រជាពលរដ្ឋខ្មែរយើង ជូនភ្ញៀវជាតិ អន្តរជាតិស្វែងយល់ ដើម្បីពង្រីកកិត្យានុភាពក្នុងតំបន់ និងលើពិភពលោក៕
ប្រភព៖ AKP
