តាកែវ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាបានថ្លែងថា រាជរដ្ឋាភិបាលអាណត្តិទី៧ បានត្រៀមកញ្ចប់ថវិកា១០០លានដុល្លារសម្រាប់អន្តរាគមន៍កសិផលមួយចំនួន ដើម្បីធានាតម្លៃឡើងចុះទីផ្សារកសិកម្ម ដែលប្រែប្រួលទៅតាមទីផ្សារពិភពលោក។
ក្នុងពិធីសម្ពោធកសិដ្ឋានចិញ្ចឹមគោយកទឹកដោះគិរីសួគ៌ ស្ថិតនៅភូមិឱភាសាំង ឃុំកណ្តឹង ស្រុកបាទី ខេត្តតាកែវ នាព្រឹកថ្ងៃព្រហស្បតិ៍ ៣កើត ខែចេត្រ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១១ ខែមេសា ឆ្នាំ២០២៤នេះ សម្ដេចធិបតីនាយករដ្ឋមន្ត្រី បានថ្លែងថា ផលិតកសិកម្មមានការឡើងចុះដែលធ្វើឱ្យមានការពិបាកដល់ប្រជាពលរដ្ឋអ្នកធ្វើកសិកម្ម។ ប៉ុន្តែនេះជាវិញ្ញាសាមួយដែល រាជរដ្ឋាភិបាល មានក្រសួងកសិកម្ម រុក្ខាប្រមាញ់ និងនេសាទជាសេនាធិការ បានខិតខំធ្វើយ៉ាងណាធានាឱ្យអស់លទ្ធភាពជួយរក្សាលំនឹងទីផ្សារឱ្យមានតម្លៃថេរ។
ទន្ទឹមនេះ សម្ដេចធិបតីនាយករដ្ឋមន្ត្រី បានអរគុណកសិដ្ឋានចិញ្ចឹមគោយកទឹកដោះគិរីសួគ៌ និងក្រុមហ៊ុនកសិដ្ឋានផ្សេងទៀតដែលបានចូលមកក្នុងទីផ្សារកម្ពុជាជួយលផលិតទឹកដោះផ្គត់ផ្គង់ទីផ្សារកម្ពុជា។
សូមជម្រាបជូនថា គិរីសួគ៌ (Kirisu) គឺជាកសិដ្ឋានរបស់ក្រុមហ៊ុន ខ្មែរ ហ្វ្រេសមីល និងជាកសិដ្ឋានខ្នាតធំដំបូងគេនៅកម្ពុជា ដែលមានច្រវាក់ផលិតកម្មទំនើបបំផុត និងមានសមត្ថភាពផលិតទឹកដោះគោសុទ្ធស្រស់ ប្រកបដោយគុណភាពខ្ពស់ បានចាប់ផ្តើមដំណើរកសិកដ្ឋាននៅចុងឆ្នាំ២០២០៕
ប្រភព៖ AKP
