កណ្តាល៖ មន្ទីរព័ត៌មានខេត្តកណ្តាល បានបើកយុទ្ធនាការធ្វើតេស្តរកសារធាតុញៀន ចំពោះមន្ត្រីរាជការ និងមន្ត្រីជាប់កិច្ចសន្យាចំនួន៦១នាក់ ស្រី២៥នាក់ នារសៀលថ្ងៃព្រហស្បតិ៍១១រោច ខែផល្គុន ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី០៤ ខែមេសា ឆ្នាំ២០២៤ នៅមន្ទីរព័ត៌មានខេត្តកណ្តាល ។
ការធ្វើតេស្តរកសារធាតុញៀននេះ ដោយអនុវត្តន៍តាមបទបញ្ជាលេខ ០១បប ចុះថ្ងៃទី២០ ខែកុម្ភៈ ឆ្នាំ២០២៤ របស់រាជរដ្ឋាភិបាលកម្ពុជា ស្តីពីការដាក់ចេញវិធានការម៉ឺងម៉ាត់ ក្នុងការប្រយុទ្ធប្រឆាំងគ្រឿងញៀនខុសច្បាប់ នៅតាមក្រសួង ស្ថាប័ន និងរដ្ឋបាលថ្នាក់ក្រោមជាតិ ។
យុទ្ធនាការធ្វើតេស្តរកសារធាតុញៀន ក្នុងចំណោមមន្ត្រីរាជការនាពេលនេះ គឺជាការបន្តឆន្ទៈពីរាជរដ្ឋាភិបាលអាណត្តិមុន ក៏ដូចជារាជរដ្ឋាភិបាលថ្មីនេះ ក្នុងការប្រយុទ្ធប្រឆាំងគ្រឿងញៀន ដោយរាជរដ្ឋាភិបាលអាណត្តិថ្មី ត្រូវធ្វើបន្តកុំឱ្យបញ្ហាគ្រឿងញៀន ក្លាយជាជំងឺមហារីកកាន់តែធ្ងន់ទៅៗ នាំឱ្យប៉ះពាល់ដល់ប្រទេសជាតិទាំងមូល នាំទុក្ខដល់ប្រជាជនទូទៅ ។ ក្នុងនោះមន្ត្រីរាជការទាំង៦១នាក់ រួមមាន៖ ទីប្រឹក្សាក្រសួង, ថ្នាក់ដឹកនាំមន្ទីរ, មន្ត្រីរាជការ, និងមន្ត្រីជាប់កិច្ចសន្យា នៃមន្ទីរព័ត៌មានខេត្ត កណ្តាល ជាលទ្ធផលគឺអវិជ្ជមានទាំងអស់ ។
លោក ចាប វន្នី ប្រធានមន្ទីរព័ត៌មានខេត្តកណ្តាល បានឱ្យដឹងថា ការធ្វើតេស្តរកសារធាតុញៀន លើមន្ត្រីរាជការ និងមន្ត្រីជាប់កិច្ចសន្យានាពេលនេះ គឺដើម្បីចូលរួមចំណែកធានាប្រសិទ្ធភាព នៃការអនុវត្តយុទ្ធនាការប្រឆាំងគ្រឿងញៀនខុសច្បាប់ ក៏ដូចជាការលើកកម្ពស់ជំនឿទុកចិត្ត ប្រសិទ្ធភាពការងារ និងអភិបាលកិច្ចល្អនៅក្នុងស្ថាប័ន ៕
ប្រភព៖ AKP
