“កំពង់ស្ពឺសង្ក្រាន្ត” មានពិធីប្រណាំងរទេះសាឡីគោលឿន រកជើងឯកប្រចាំឆ្នាំ២០២៤

កំពង់ស្ពឺ៖ យោងតាមសេចក្តីជូនដំណឹង ស្តីពីការរៀបចំ «កំពង់ស្ពឺសង្ក្រាន្ត» ឆ្នាំ២០២៤ រដ្ឋបាលខេត្តកំពង់ស្ពឺ បានជូនដំណឹងដល់បងប្អូនប្រជាពលរដ្ឋ ឱ្យបានជ្រាបថា ដើម្បីចូលរួមអបអរសាទរ ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ ឆ្នាំរោង ឆស័ក ព.ស.២៥៦៨ គ.ស.២០២៤ ផ្តល់ភាពសប្បាយរីករាយជូនបងប្អូនប្រជាពលរដ្ឋ និងរក្សានូវទំនៀមទម្លាប់ប្រពៃណីដ៏ល្អផូរផង់របស់ជាតិ ដោយមានការសហការរៀបចំពី សហភាពសហព័ន្ធយុវជនកម្ពុជាខេត្តកំពង់ស្ពឺ (ស.ស.យ.ក.) រដ្ឋបាលខេត្ត នឹងរៀបចំ «កំពង់ស្ពឺសង្ក្រាន្ត» ឆ្នាំ២០២៤ រយៈពេល០៤ថ្ងៃ ចាប់ពីថ្ងៃ១៣ ដល់ថ្ងៃទី១៦ ខែមេសា ឆ្នាំ២០២៤ ។

រដ្ឋបាលខេត្ត បានបញ្ជាក់ថា កម្មវិធីនេះមានការរៀបចំលេងល្បែងប្រជាប្រិយ នៅភូមិល្បែងប្រជាប្រិយ, កម្មវិធីប្រឡងចម្រៀង និងការលេងកម្សាន្តផ្សេងៗ នៅភូមិសំនៀងឯក នៅបរិវេណសួនច្បារសម្តេចព្រះសង្ឃរាជ ជួន ណាត, ការលេងកម្សាន្តនៅភូមិប្រដាល់ធ្លាក់ទឹក នៅខាងមុខវេទិកាអុំទូក,និងការចូលរួមកម្សាន្តនៅភូមិត្រជាក់ចិត្តបរិវេណ វិមានឯករាជ្យ, ព្រមទាំងកម្មវិធីកម្សាន្តសប្បាយផ្សេងៗទៀតនាពេលរាត្រី ដូចជា ប្រដាល់គុនខ្មែរនៅមណ្ឌលកីឡាខេត្ត និងការប្រគំតន្ត្រី។ ជាមួយគ្នានេះ នៅតាមវត្តអារាមនានា ក៏មានការរៀបចំបុណ្យចូលឆ្នាំថ្មី ប្រពៃណីជាតិខ្មែរ និងការលេងល្បែងប្រជាប្រិយផងដែរ ។

ទន្ទឹមនេះ ដោយមានការសហការរៀបចំពីសហភាពសហព័ន្ធយុវជនកម្ពុជាខេត្តកំពង់ស្ពឺ នឹងរៀបចំពិធី «ប្រណាំងរទេះសាឡីគោលឿន ឆ្នាំ២០២៤» ដើម្បីចូលរួមអភិរក្ស លើកស្ទួយ អភិវឌ្ឍន៍ និងផ្សព្វផ្សាយឱ្យបានទូលំទូលាយ ស្របតាមបរិបទ នៃសង្គមបច្ចុប្បន្ននូវប្រពៃណីប្រណាំងរទេះសាឡីគោលឿននៅក្នុងខេត្តកំពង់ស្ពឺ ដែលបុព្វបុរសខ្មែរបានបន្សល់ទុកជាយូរណាស់មកហើយ ។

ពិធីនេះនឹងប្រព្រឹត្តទៅនៅថ្ងៃទី០៧ ខែមេសា ឆ្នាំ២០២៤ វេលាម៉ោង ៨៖០០នាទីព្រឹក ស្ថិតនៅក្នុងភូមិព្រៃរំដួល ឃុំត្រពាំងគង ស្រុកសំរោងទង ខេត្តកំពង់ស្ពឺ ៕

ប្រភព៖ AKP