ភ្នំពេញ៖ ប្រភពពីអង្គការ USAID មរតកបៃតង បានឱ្យដឹងនៅថ្ងៃព្រហស្បតិ៍ ១០រោច ខែកត្ដិក ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី០៧ ខែធ្នូ ឆ្នាំ២០២៣ថា យើងពិតជាមានមោទនភាពជាខ្លាំង ដែលបានឃើញអ្នកស្រី គឿង ណាវី បង្កើតប្រវត្តិសាស្ត្រក្នុងនាមជាវាគ្មិនជនជាតិពូនង (ព្នង) ដំបូងគេ ដែលតំណាងឱ្យសហគមន៍ជនជាតិដើមភាគតិចពូនង នៅក្នុងសន្និសីទកំពូល នៃបណ្ដាភាគីអនុសញ្ញាក្របខ័ណ្ឌសហប្រជាជាតិ ស្ដីពីការប្រែប្រួលអាកាសធាតុលើកទី២៨ (COP 28) ឆ្នាំ២០២៣ ដែលបានរៀបចំនៅទីក្រុងឌូបៃ នៃសហភាពអេមីរ៉ាតអារ៉ាប់រួម (UAE) នៅឆ្នាំនេះ ។
អ្នកស្រី គឿង ណាវី ជាតំណាងមកពីសហគមន៍ជនជាតិដើមភាគតិចពូនងក្នុងដែនជម្រកសត្វព្រៃកែវសីមា ដែល USAID មរតកបៃតង បានសហការជាមួយ WCS Cambodia និង ក្រសួងបរិ ស្ថាន ក្នុងការគាំទ្រគម្រោង រេដបូក កែវសីមា ក្នុងខេត្តមណ្ឌលគិរី ។ នៅក្នុងព្រឹត្តិការណ៍នេះ អ្នកស្រី គឿង ណាវី បានលើកឡើងពីតួនាទីដ៏សំខាន់របស់ហិរញ្ញប្បទានកាបូន នៅក្នុងកិច្ចខិតខំប្រឹងប្រែងអភិរក្សរបស់សហគមន៍ជនជាតិដើមភាគតិច ។ សំឡេងចេញពីភូមិតូចមួយ ក្នុងប្រទេសកម្ពុជា ទៅកាន់មេដឹកនាំពិភពលោក សាររបស់នាងបានបន្ទរចំពោះការអំពាវនាវ ឱ្យមានការធ្វើសកម្មភាពរួមគ្នាក្នុងការទប់ស្កាត់ការប្រែប្រួលអាកាសធាតុ នៅជុំវិញពិភពលោក ។
គម្រោងរេដបូក កែវសីមា I Keo Seima REDD+ បានចូលរួមចំណែកយ៉ាងសំខាន់ ក្នុងការការពារព្រៃឈើ និងសត្វព្រៃ ក៏ដូចជាសុខុមាលភាព របស់សហគមន៍ជនជាតិដើមភាគតិចពូនង ក្នុង និងជុំវិញដែនជម្រកសត្វព្រៃកែវសីមាអស់ជាច្រើនទសវត្សរ៍មកហើយ។ រួមគ្នាគាំទ្រគំនិតផ្តួចផ្តើមរេដ បូក និងទទួលយកវិធីច្នៃប្រឌិតថ្មី ដើម្បីការពារបរិស្ថានរបស់យើងទាំងអស់គ្នា ៕
ប្រភព៖ AKP
