ភ្នំពេញ៖ ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល បានណែនាំឱ្យពង្រឹងការងារ រដ្ឋបាល ក្នុងនោះការពង្រឹងសេវាច្រកចេញ ចូលតែមួយ គឺត្រូវពង្រឹងឱ្យមានប្រសិទ្ធភាពត្រឹមត្រូវ និងល្អប្រសើរថែមទៀត។
ឯកឧត្តមមានប្រសាសន៍បែបនេះ ក្នុងកិច្ចប្រជុំកម្រិត ថ្នាក់ ដឹកនាំ ដើម្បីពិនិត្យវឌ្ឍនភាពការងារ និងលើកទិសដៅការងារបន្ត លើកទី១ នៃខែវិច្ឆិកា នារសៀលថ្ងៃចន្ទ ៨រោច ខែអស្សុជ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី០៦ ខែវិចិ្ឆកា ឆ្នាំ២០២៣ នៅទីស្តីការ ក្រសួង តាមរយៈប្រព័ន្ធហ៊ីប្រីដ៍ Hybrid ដោយ មានវត្តមានផ្ទាល់នៅទីស្តីការក្រសួង និងមានវត្តមានតាមបណ្តាខេត្តក្រុង តាមរយៈ ប្រព័ន្ធវីដេអូសន្និសីទ។
ក្នុងឱកាសនោះ ឯកឧត្តមសាស្រ្តាចារ្យរដ្ឋមន្រ្តី បានណែនាំឱ្យថ្នាក់ដឹកនាំទទួលបន្ទុកការងារបន្តពង្រឹងការផ្តល់សេវានៅតាមមន្ទីរ ពេទ្យថ្នាក់ខេត្ត ស្រុក និងមណ្ឌលសុខភាព ចុះពិនិត្យផ្ទាល់ជាប់ជាប្រចាំនៅមូលដ្ឋានសុខាភិបាល តាមបណ្តាខេត្ត ដើម្បីជួយពាំនាំ និងគាំទ្រផ្នែកបណ្តុះបណ្តាល បច្ចេកទេស និងបំពេញតម្រូវការតាមស្ថានភាពជាក់ស្តែង។
ជាមួយគ្នានេះដែរ ក្នុងឱកាសដែលឆ្លៀតចុះពិនិត្យនៅមណ្ឌលសុខភាពចុងកាល់ ខេត្តឧត្តរមានជ័យ ឯកឧត្តមសាស្ត្រាចារ្យរដ្ឋមន្ត្រី បានសរសើរមន្រ្តីសុខាភិបាលនៅតាមមូលដ្ឋាន មន្ទីរពេទ្យបង្អែកស្រុក ខេត្ត ជាពិសេសមណ្ឌលសុខភាព ដែលផ្តល់សេវាជូន ប្រជាពលរដ្ឋ ដែលមានមន្ត្រីសុខាភិបាល នៅរង់ចាំបម្រើសេវាជូនប្រជាពលរដ្ឋ ២៤ម៉ោង។
ទន្ទឹមនឹងនេះ ឯកឧត្តមសាស្ត្រាចារ្យរដ្ឋមន្ត្រី បានរំលឹកដល់បុគ្គលិក មន្ត្រីសុខាភិបាល នៅគ្រប់កម្រិត និងទីកន្លែង កុំភ្លេចថែទាំ សុខភាពខ្លួនឱ្យបានល្អ និងរក្សាបានសមត្ថភាព ជំនាញថែទាំព្យាបាល និងបន្តបម្រើសេវាសុខាភិបាលជូន ប្រជាពលរដ្ឋឱ្យកាន់តែ ប្រសើរ និងប្រកបដោយទំនុកចិត្ត៕
ប្រភព៖ AKP
