កំពង់ចាម៖ ឯកឧត្តម អ៊ុន ចាន់ដា អភិបាលនៃគណៈអភិបាលខេតកំង់ចាម បានមានប្រសាសន៍ថា នៅក្នុងឱកាសពិធីបុណ្យចេញព្រះវស្សា និងពិធីប្រណាំងទូក «ង» បណ្តែតប្រទីប អុចកាំជ្រួច ដែលធ្វើឡើងកាលពីថ្ងៃទី២៨-២៩ ខែតុលា ឆ្នាំ២០២៣ ព្រមទាំងពិធីតាំងពិព័រណ៌ផលិតផល និងការប្រគុំតន្ត្រីដែលមានរយៈពេល ៣ថ្ងៃកន្លងមក ដែលរៀបចំឡើងដោយរដ្ឋបាលខេត្តក្នុងក្រុងកំពង់ចាម មានភ្ញៀវទេសចរជាតិ និងអន្តរជាតិចូលរួមទស្សនាកម្សាន្តប្រមាណ ជាង ៥០០.០០០នាក់។
ឯកឧត្តម អ៊ុន ចាន់ដា បានបញ្ជាក់ឱ្យដឹងទៀតថា ការប្រារព្ធពិធីប្រណាំងទូក «ង» បណ្តែតប្រទីប អុចកាំជ្រួច និងតាំងពិព័រណ៌ផលិតផលនៅថ្ងៃទីមួយ គឺថ្ងៃទី២៨ ខែតុលា ឆ្នាំ២០២៣ មានភ្ញៀវទេសចរចូលរួមទស្សនាប្រមាណជាង ១៥០.០០០នាក់ ដោយក្នុងនោះមានភ្ញៀវទេសចរបរទេសចំនួន៧១នាក់។
ចំណែកការប្រារព្ធពិធីនៅថ្ងៃទីពីរ ដែលត្រូវនឹងថ្ងៃទី២៩ ខែតុលាឆ្នាំ២០២៣ មានភ្ញៀវទេសចរជាតិ និងអន្តរជាតិចូលរួមប្រមាណ ៣៥០.០០០នាក់ ដោយក្នុងនោះមានភ្ញៀវទេសចរបរទេសចំនួន ៣១៨នាក់ដែលជាសរុប ភ្ញៀវទេសចរចូលរួមទស្សនាពិធីបុណ្យចេញព្រះវស្សាដែលមានការប្រណាំងទូក «ង» រយៈពេល ២ថ្ងៃនោះ មានប្រមាណជាង៥០០.០០០នាក់ ដែលក្នុងនោះមានភ្ញៀវទេសចរបរទេសចំនួន ៣៨៩នាក់៕
ប្រភព៖ AKP
