ភ្នំពេញ៖ «ក្រសួងសុខាភិបាលត្រូវសហការជាមួយនឹងក្រសួងប្រៃសណីយ៍និងទូរគមនាគមន៍ក្នុងក្របខ័ណ្ឌនគណៈកម្មាធិការឌីជីថល ដើម្បីពន្លឿនការ ប្រើប្រាស់ប្រព័ន្ធឌីជីថលនៅក្នុងវិស័យសុខាភិបាលទាំងមូលជាពិសេសនៅគ្រប់មន្ទីរពេទ្យនៅថ្នាក់ជាតិនិងថ្នាក់ក្រោមជាតិ ព្រមទាំងជំរុញការបណ្ដុះបណ្ដាលឱ្យវេជ្ជបណ្ឌិត គ្រូពេទ្យនិងមន្ត្រីសុខាភិបាលទាំងអស់ យកចិត្តទុកដាក់ប្រើប្រាស់បច្ចេកវិទ្យាផ្នែកសុខាភិបាលឱ្យបានទូលំទូលាយ»។ នេះជាសំណើរបស់ សម្តេចមហាបវរធិបតី ហ៊ុន ម៉ាណែត ក្នុងពិធីសម្ពោធដាក់ឱ្យប្រើប្រាស់ជាផ្លូវការ “មន្ទីរពេទ្យជាតិ តេជោសន្តិភាព”នាព្រឹកថ្ងៃអង្គារ ១០កើត ខែអស្សុជ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី២៤ ខែតុលា ឆ្នាំ២០២៣។
សម្តេចមហាបវរធិបតី ក៏បានស្នើឱ្យក្រសួងសុខាភិបាលសហការជាមួយស្ថាប័នពាក់ព័ន្ធដទៃទៀតតាមរយៈក្រុមប្រឹក្សាជាតិគាំពារសង្គមដើម្បីពន្លឿនការដាក់ចេញផែនទីបង្ហាញផ្លូវឆ្ពោះទៅការគ្រប់ដណ្ដប់បញ្ហាសុខភាពជាសកលនៅកម្ពុជា។
«ផែនទីបង្ហាញផ្លូវនេះចាំបាច់ត្រូវមានសង្គតិភាពជាមួយនឹងក្របខ័ណ្ឌគោលនយោបាយ យុទ្ធសាស្ត្រដទៃទៀត ជាពិសេសយុទ្ធសាស្រ្តជាតិស្ដីពីការអនុវត្តសេដ្ឋកិច្ចក្រៅប្រព័ន្ធដែលទើបតែបានដាក់ចេញហើយ អាទិភាពចម្បងបំផុតទៅដល់ទៅលើការសម្របសម្រួលការលំបាករបស់ប្រជាជន ខណៈដែលពួកគាត់ទទួលបាននូវសេវាសុខាភិបាលមួយប្រកបដោយគុណភាព»។ នេះជាការបញ្ជាក់បន្ថែមរបស់ សម្តេចមហាបវរធិបតី ហ៊ុន ម៉ាណែត៕
ប្រភព៖ AKP
