ភ្នំពេញ៖ សម្តេចមហាបវរធិបតី ហ៊ុន ម៉ាណែត បានផ្តល់អនុសាសន៍៦ ចំណុចជូនថ្នាក់ដឹកនាំ មន្ត្រីសុខាភិបាល ក្រសួងស្ថាប័នពាក់ព័ន្ធ និងរដ្ឋបាលថ្នាក់ក្រោមជាតិ។
ការផ្ដល់អនុសាសន៍នេះធ្វើឡើង ក្នុងពិធីសម្ពោធដាក់ឱ្យប្រើប្រាស់ជាផ្លូវការ “មន្ទីរពេទ្យជាតិ តេជោសន្តិភាព”នាព្រឹកថ្ងៃអង្គារ ១០កើត ខែអស្សុជ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី២៤ ខែតុលា ឆ្នាំ២០២៣។
អនុសាសន៍ទាំងនោះមានដូចជា៖ ១.ក្រសួងសុខាភិបាលត្រូវគិតគូរនិងយកចិត្តទុកដាក់ក្នុងការលើកកម្ពស់គុណភាពសេវាសុខាភិបាលនៅថ្នាក់ក្រោមជាតិជាពិសេសពង្រឹងមណ្ឌល សុខភាពនិងពេទ្យបង្អែកដើម្បីផ្ដល់សេវាមូលដ្ឋានជូនប្រជាពលរដ្ឋ ក៏ដូចជាពង្រឹងមន្ទីរពេទ្យខេត្តឱ្យក្លាយ ទៅជាមន្ទីរពេទ្យឈានមុខដែលមានសមត្ថភាពខ្ពស់សមមូលនិងមន្ទីរពេ ទ្យនៅរាជធានីភ្នំពេញ នៅក្នុងការពិនិត្យនិងព្យាបាលជំងឺនិងផ្ដល់សេវាសុខភាព សេវាសុខាភិបាលនានា គោលដៅបង្កើនប្រសិទ្ធភាពនៃការផ្ដល់សេវាសុខាភិបាលផងនិងកាត់បន្ថយចំណាយការធ្វើដំណើរមកទទួលសេវារបស់ប្រជាពលរដ្ឋ។
ទី២.លើកទឹកចិត្តឱ្យបន្តលើក កម្ពស់និងពង្រឹងកិច្ចសហការជាមួយនឹងក្រសួងស្ថាប័នដើម្បីធានាប្រសិទ្ធភាពនៃការអនុវត្តកម្មវិធីមូលនិធិសមធម៌សម្រាប់គ្រួសារក្រីក្រនិងគម្រោងបេឡាសន្តិសុខសង្គមផ្នែកថែទាំសុខភាពជាពិសេសត្រូវធានាឱ្យបានថា គ្មានប្រជាពលរដ្ឋណាម្នាក់ត្រូវបានបដិសេធការទទួលបានសេវាថែទាំសុខភាពដោយសារតែគ្មានលទ្ធភាពបង់ថ្លៃសេវានោះឡើយ។
៣.ក្រសួងសុខាភិបាលត្រូវពង្រឹងឱ្យបានជាអតិបរិមានូវយន្តការនៃការផ្ដល់សេវាសុខាភិបាលទាំងរដ្ឋនិងឯកជនក៏ដូចជាការពង្រឹងការបណ្ដុះបណ្ដាលជំនាញទាំងផ្នែកសុខាភិបាលនិងជំនាញទន់ និងលើកទឹកចិត្តដល់មន្ត្រីសុខាភិបាល វេជ្ជបណ្ឌិតគ្រូពេទ្យ បុគ្គលិកថែទាំវេជ្ជសាស្ត្រទាំងអស់សូមបង្កើនការយកចិត្តទុកដាក់ខ្ពស់ជាពិសេសការធ្វើអាទិភាវូបនីយកម្មលើការសង្គ្រោះជីវិតមនុស្សលើសពីអ្វីៗទាំងអស់ដោយប្រកាន់ភ្ជាប់នូវក្រមសីលធម៌ ព្រោះថាអាជីពជាចម្បងរបស់អ្នកទាំងអស់គ្នាគឺសង្គ្រោះជីវិតប្រជាពលរដ្ឋទូទៅដែលខ្ញុំហៅថាអាជីពទេវតា។ ដែលតម្រូវឱ្យមានការសង្គ្រោះជីវិតប្រាកដដោយទឹកចិត្តបរិសុទ្ធ ការទទួលខុសត្រូវគោរពស្រឡាញ់ អ្នកជំងឺក៏ដូចអ្នកមកទទួលសេវាសុខាភិបាលដូចជាសមាជិកក្រុមគ្រួសាររបស់ខ្លួន ។
៤.ក្រសួងសុខាភិបាលត្រូវសហការជាមួយក្រសួងពាក់ព័ន្ធជាពិសេស ក្រសួងពាណិជ្ជកម្មក្រសួងមហាផ្ទៃ ក្រសួងអប់រំយុវជននិងកីឡា និងអគ្គនាយកដ្ឋានគយនិងរដ្ឋាករក៏ដូច ជាក្រសួងស្ថាប័នពាក់ព័ន្ធនានា រួមគ្នាកំណត់សកម្មភាពជាក់លាក់ដើ ម្បីទប់ស្កាត់និងពង្រឹងការគ្រប់គ្រងការផលិតកាកែវច្នៃផលិតនាំចូលម្ហូបអាហារ និងគ្រឿងបរិភោគក៏ដូចជាថ្នាំសង្កូវដែលមានប៉ះពាល់ផលវិជ្ជ មានដល់សុខភាពរបស់ប្រជាពលរដ្ឋ ។ យន្តការអន្តរក្រសួងនេះក៏ត្រូវជំរុញការផ្សព្វផ្សាយនិងអប់រំលើម្ហូបអាហារគ្រឿងបរិភោគដែលមានផលប៉ះ ពាល់វិជ្ជមានទាំងនោះ យើងមិនចង់ឃើញសុខភាពរបស់ប្រជាពលរដ្ឋ យើងត្រូវបានបំផ្លាញដោយសារម្ហូបអាហារគ្រឿងបរិភោគនិងថ្នាំសង្កូវដែលគ្មានគុណភាពនោះទេ។
៥.ក្រសួងសុខាភិបាលត្រូវសហការជាមួយនឹងក្រសួងប្រៃសណីយ៍និងទូរគមនាគមន៍ក្នុងក្របខ័ណ្ឌនគណៈកម្មាធិការឌីជីថល ដើម្បីពន្លឿនការ ប្រើប្រាស់ប្រព័ន្ធឌីជីថលនៅក្នុងវិស័យសុខាភិបាលទាំងមូលជាពិសេសនៅគ្រប់មន្ទីរពេទ្យនៅថ្នាក់ជាតិនិងថ្នាក់ក្រោមជាតិ ព្រមទាំងជំរុញការបណ្ដុះបណ្ដាលឱ្យវេជ្ជបណ្ឌិត គ្រូពេទ្យនិងមន្ត្រីសុខាភិបាលទាំងអស់ យកចិត្តទុកដាក់ប្រើប្រាស់បច្ចេកវិទ្យាផ្នែកសុខាភិបាលឱ្យបានទូលំទូលាយ។
៦. សូមឱ្យក្រសួងសុខាភិបាលសហការជាមួយស្ថាប័នពាក់ព័ន្ធដទៃទៀតតាមរយៈក្រុមប្រឹក្សាជាតិគាំពារសង្គមដើម្បីពន្លឿនការដាក់ចេញផែនទីបង្ហាញផ្លូវឆ្ពោះទៅការគ្រប់ដណ្ដប់បញ្ហាសុខភាពជាសកលនៅកម្ពុជា។ ផែនទីបង្ហាញផ្លូវនេះចាំបាច់ត្រូវមានសង្គតភាពជាមួយនឹងក្របខ័ណ្ឌគោលនយោបាយ យុទ្ធសាស្ត្រដទៃទៀត ជាពិសេសយុទ្ធសាស្រ្តជាតិស្ដីពីការអនុវត្តសេដ្ឋកិច្ចក្រៅប្រព័ន្ធដែលទើបតែបានដាក់ចេញហើយ អាទិភាពចម្បងបំផុតទៅដល់ទៅលើការសម្របសម្រួលការលំបាករបស់ប្រជាជន ខណៈដែលពួកគាត់ទទួលបាននូវសេវាសុខាភិបាលមួយប្រកបដោយគុណភាព៕
ប្រភព៖ AKP
