មណ្ឌលគីរី៖ នៅថ្ងៃព្រហស្បតិ៍ ១៤កើត ខែភទ្របទ ឆ្នាំថោះ បញ្ចស័ក ព.ស២៥៦៧ ត្រូវនិងថ្ងៃទី២៨ ខែកញ្ញា ឆ្នាំ២០២៣ ឯកឧត្តម អាន ពេជ្រ ហត្ថដា រដ្ឋលេខាធិការ ក្រសួងធនធានទឹក និងឧតុនិយម និងឯកឧត្តម ខឹម សុធា ទីប្រឹក្សាក្រសួង ព្រមទាំងសហការីបានចុះពិនិត្យការងារជួសជុល និងថែទាំងប្រព័ន្ធធារាសាស្ត្រ ក្នុងភូមិសាស្ត្រខេត្តមណ្ឌលគិរី។
ក្នុងឱកាសនោះ ឯកឧត្តមរដ្ឋលេខាធិការបានជួបសំណេះសំណាលជាមួយថ្នាក់ដឹកនាំ និងមន្ត្រីរាជការនៃមន្ទីរធនធានទឹក និងឧតុនិយមខេត្តមណ្ឌលគិរី និងបានចុះពិនិត្យការងាររួមមាន៖
១-ការងារជួលជុល និងថែទាំប្រព័ន្ធធារាសាស្ត្រអូរប្រង់ដែលមានលទ្ធភាពស្រោចស្រពស្រូវរដូវវស្សាចំនួន ១០៧៨ហិកតា និងរដូវប្រាំងចំនួន ៣០០ហិកតា ស្ថិតក្នុងឃុំស្រែហ៊ុយ ស្រុកកោះញែក។
២-ចុះពិនិត្យទីតាំងគ្រោងសាងសង់សំណង់ស្ទាក់ទឹកអូរច្បារក្នុងឃុំស្រែហ៊ុយ ស្រុកកោះញែក។
ក្រោយពីបានចុះពិនិត្យការងាររួចមក ឯកឧត្តមរដ្ឋលេខាធិការបានធ្វើការផ្តាំផ្ញើដល់មន្ទីរត្រូវគ្រប់គ្រង ថែទាំ និងលាបថ្នាំទ្វារទឹកគ្រប់ប្រព័ន្ធធារាសាស្ត្រទាំងអស់ និងជាពិសេស ស្នើឱ្យមន្ទីរយកចិត្តទុកដាក់បំផុតទៅលើការគ្រប់គ្រង និងការប្រើប្រាស់ទឹកនៅតាមអាងស្តុកទឹកនានាក្នុងខេត្ត សំដៅដោះស្រាយសេចក្តីត្រូវការសម្រាប់ការងារបង្កបង្កើនផលក៏ដូចជាការប្រើប្រាស់នៅរដូវប្រាំងខាងមុខ ស្របតាមអនុសាសន៍ដ៏ខ្ពង់ខ្ពស់របស់ឯកឧត្តមរដ្ឋមន្ត្រី៕
ប្រភព៖ ក្រសួងធនធានទឹក និងឧតុនិយម
