ភ្នំពេញ៖ មន្ត្រីជាន់ខ្ពស់ធនធានទឹកនិងឧតុនិយមបញ្ជាក់ថា ទោះបីឆ្នាំនេះកម្ពស់ទឹកទន្លេមេគ្គង និងទន្លេសាប ទាបជាងឆ្នាំកន្លងទៅ ប៉ុន្តែបានផ្តល់នូវកត្តាវិជ្ជាមានយ៉ាងច្រើនសម្រាប់វិស័យកសិកម្ម ដែលជាវិស័យមួយដ៏សំខាន់សម្រាប់ជំរុញកំណើនសេដ្ឋកិច្ចជាតិ និងធានាសន្តិសុខស្បៀង។
ឯកឧត្តម ចាន់ យុត្ថា រដ្ឋលេខាធិការនិងជាអ្នកនាំពាក្យក្រសួងធនធានទឹក និងឧត្តុនិយមបានឱ្យដឹងថា នៅក្នុងថ្ងៃទី១៧ ខែកញ្ញាកន្លងទៅ នៅស្ថានីយជលសាស្ត្រខេត្តស្ទឹងត្រែង បានឡើងដល់៩ម៉ែត្រ៤៥ ដែលកម្ពស់ទឹកនេះខ្ពស់គួរសម ប៉ុន្តែបើយើងប្រៀបធៀបជាមួយនឹងកម្រិតដែលប្រកាសឱ្យប្រុងប្រយ័ត្នគឺ១០ម៉ែត្រ ៧០ ដូច្នេះនៅជាង១ម៉ែត្រទៀត ទើបឈានទៅដល់កម្រិតដែលត្រូវប្រកាសឱ្យមានការប្រុងប្រយ័ត្ន។ ដោយឡែកនៅថ្ងៃទី២០កន្លងទៅនេះ នៅស្ថានីយជលសាស្ត្រស្ទឹងត្រែង គឺទឹកមានកម្ពស់ត្រឹមតែ៧ម៉ែត្រ៧៧តែប៉ុណ្ណោះ ហើយទឹកនឹងបន្តស្រកជាបន្តបន្ទាប់ក្នុងរយៈពេល២ថ្ងៃមុខនេះ ដោយសារបណ្ដាស្ថានីយជលសាស្ត្រដែលស្ថិតនៅក្នុងតំបន់ផ្ទៃរងទឹកភ្លៀងនៅក្នុងប្រទេសថៃ ឡាវ ពុំមានភ្លៀងធ្លាក់អ្វីដែលគួរឱ្យកត់សម្គាល់នោះទេ ដូច្នេះក្រសួងអាចសន្និដ្ឋានបានថា ទឹកនឹងអាចបន្តស្រកចុះជាបន្ថែមទៀត។
ឯកឧត្តមបានបន្ថែមថា ចំពោះស្ថានីយបណ្ដាស្ថានីយជលសាស្ត្រផ្សេងៗទៀត នៅក្នុងផ្នែកខាងក្រោម ចាប់ពីខេត្តក្រចេះ ខេត្ត ត្បូងឃ្មុំ ខេត្តកំពង់ចាម ជាពិសេសគឺស្ថានីយជលសាស្ត្របាសាក់ ចតុមុខ រាជធានីភ្នំពេញ នៅថ្ងៃទី២០ ក៏បានស្រកចុះជាបន្តបន្ទាប់ នៅត្រឹម៨ម៉ែត្រ០៥ ហើយទឹកនឹងចាប់ផ្ដើមស្រកចុះជាបន្តបន្ទាប់ទៀត។
ឯកឧត្តមបញ្ជាក់ថា ទោះបីជាទឹក មិនទាន់ឡើងដល់កម្រិតមួយដែលក្រសួងចង់បានក្ដី ប៉ុន្តែការហក់ឡើងនៃកម្ពស់ទឹកទន្លេទាំងអស់ នៅក្នុងប្រទេសកម្ពុជានាពេលនេះ ក៏បានធ្វើឱ្យប៉ះពាល់បន្តិចបន្តួចដល់ជីវភាពប្រជាពលរដ្ឋដែលរស់នៅអមសងខាងទន្លេ ប៉ុន្តែស្ថានភាពទឹកនេះ បានចូលទៅតាមព្រែកអាងស្តុកទឹក បឹងបួ ធម្មជាតិ និងតំបន់ទំនាបនានា ខណៈដែលពេលកន្លងមក ឯកឧត្តមរដ្ឋមន្ត្រីក្រសួងធនធានទឹក ក៏បានផ្ញើសារក្រើនរំឭកទៅដល់ប្រធានមន្ទីរធនធានទឹកនិងឧតុនិយមនៅតាមរាជធានី-ខេត្តទាំងអស់ ដែលស្ថិតនៅតាមដងទន្លេ ត្រូវយកចិត្តទុកដាក់ទាញទឹកបញ្ចូលទៅក្នុងអាង ក្នុងព្រែក ហើយត្រូវតែត្រៀមវិធានការ ដើម្បីធ្វើយ៉ាងណារក្សាទឹកទុកឱ្យបានសម្រាប់ការប្រើប្រាស់ការដាំដុះនាពេលខាងមុខ នៅពេលដែលទឹកចាប់ផ្ដើមស្រក។ «ដោយឥឡូវនេះយើងឃើញថា វិធានការរបស់ឯកឧត្តមរដ្ឋមន្ត្រីដាក់ចេញ ទី១ ក្នុងការទាញទឹកចូលទៅក្នុងព្រែក បឹង បួ។ ទី២ បាននាំចូលដីល្បាប់ ដែលមានជីជាតិទៅចាក់បំពេញដីស្រែចម្ការរបស់បងប្អូនប្រជាពលរដ្ឋឱ្យមានជីជាតិឡើងវិញ ទី៣នៅពេលដែលមានទឹកទន្លេចូលរបៀបនេះ នឹងធ្វើឱ្យសត្វល្អិតចង្រៃងាប់។ អ៊ីចឹងទេមកដល់ថ្ងៃនេះ កម្ពស់ទឹកបឹងទន្លេសាបនៅស្ថានីយជលសាស្ត្រកំពង់លួង ដែលស្ថិតនៅកម្ពស់ស្រុកក្រគរខេត្តពោធិ៍សាត់ គឺមានកម្ពស់ទឹក៥ម៉ែត្រ ២៦ ហើយកម្ពស់ទឹកបឹងទន្លេសាបអាចនឹងកើនឡើងសន្សឹមសន្សឹម ក្នុងរយៈពេលពីរឬបីថ្ងៃទៅមុខទៀត។ ហើយកាលណាទឹកចូលទៅក្នុងបឹងទន្លេសាប ច្រើនធ្វើឱ្យមានមាឌរបស់បឹងទន្លេសាបវារីកធំ លិចព្រៃលិចទឹក ដែលនៅអមសងខាងបឹងនេះ ហើយព្រៃនេះឯងដែលជាជម្រកពងកូនរបស់មច្ឆជាតិគ្រប់ប្រភេទ នៅតំបន់មេគង្គលើនិងតំបន់បឹងទន្លេសាប។»
ឯកឧត្តមរដ្ឋលេខាធិការបានបន្ថែមទៀតថា បច្ចុប្បន្ននេះ ក្រសួងកំពុងតែធ្វើការតាមដាននិងយកចិត្តទុកដាក់មួយបន្ថែមទៀត ទាក់ទងទៅនឹងស្ថានភាពអាកាសធាតុ ក្នុងនោះការព្យាករប្រចាំរដូវរបស់ក្រសួង ក៏បានជូនដំណឹងម្ដងរួចមកហើយថា រដូវវស្សាឆ្នាំនេះ អាចនឹងឆាប់បញ្ចប់ឆាប់ជាងបណ្ដាឆ្នាំកន្លងទៅ ដោយរហូតមកដល់ពេលនេះសញ្ញានៃការលេចឡើង នៃរបាយទឹកភ្លៀងដែលចាប់ផ្តើមចុះខ្សោយ គឺកាន់តែលេចឡើងច្បាស់ថា នៅក្នុងសប្ដាហ៍នេះអាចភ្លៀងរាយប៉ាយ ប៉ុន្តែចាប់ពីសប្ដាហ៍ក្រោយទៅ របាយទឹកភ្លៀងនឹងចាប់ផ្តើមចុះខ្សោយជាបន្ត ខណៈដែលរហូតមកដល់ពេលនេះ បាតុភូតព្យុះ មានត្រឹមតែ១៣លើកប៉ុណ្ណោះ ដូច្នេះស្ថានភាពកម្ពស់ទឹកទន្លេ នឹងស្រកចុះបន្ថែមទៀតនាពេលខាងមុខ៕
ប្រភព៖ ក្រសួងព័ត៌មាន
