ក្នុងគោលបំណងបន្តគាំពារសុខុមាលភាព និងផលប្រយោជន៍ជូនប្រជាពលរដ្ឋ មន្ត្រីអធិការកិច្ចម្ហូបអាហារ ក.ប.ប. សាខាខេត្តតាកែវ កែប កំពង់ធំ សៀមរាប រតនគិរី បាត់ដំបង បន្តអនុវត្តភារកិច្ចរបស់ខ្លួនអនុលោមតាមច្បាប់និងបទប្បញ្ញត្តិជាធរមាន ដោយបានចុះអង្កេត និងត្រួតពិនិត្យទំនិញចម្រុះគ្រប់ប្រភេទដាក់លក់នៅលើទីផ្សារ។
ជាលទ្ធផល នាថ្ងៃទី១៨-១៩ ខែកញ្ញា ឆ្នាំ២០២៣នេះ មន្ត្រីជំនាញបានត្រួតពិនិត្យការដាក់លក់ផលិតផលសម្រាប់ចិញ្ចឹមទារកនិងកុមារ(ម្សៅទឹកដោះគោ) ឃើញថាអនុលោមតាមបញ្ញត្តិនៃអនុក្រឹត្យលេខ១៣៣ ស្តីពីការផ្សព្វផ្សាយលក់ផលិតផលសម្រាប់ចិញ្ចឹមទារកនិងកុមារ យ៉ាងណាមិញមន្ត្រីយើងបានរកឃើញទំនិញចម្រុះ រួមមាន ប៊ីចេង នំកូនក្មេង ចាហួយ សាប៊ូដុសខ្លួន ទឹកជ្រលក់ ហួសកាលបរិច្ឆេទប្រើប្រាស់ ខូចគុណភាព និងជាពិសេសប្រហិតចម្រុះពុំអនុលោមតាមបទដ្ឋានបច្ចេកទេសក្នុងការវេចខ្ចប់ សរុបចំនួន ១២៧.៨៣គីឡូក្រាម។
ទំនិញពុំមានអនុលោមភាពទាំងនោះត្រូវបានមន្ត្រីយើងដកហូត ដើម្បីបន្តនីតិវិធីនាពេលសមស្រប។ ជាមួយគ្នានេះដែរ មន្ត្រីជំនាញបានចែកនិងបិទផ្ទាំងរូបភាពអប់រំផ្នែកម្ហូបអាហារ(Poster) អំពីរបៀបទុកដាក់ទំនិញ និងរបៀបមើលកាលបរិច្ឆេទប្រើប្រាស់ មុននឹងទិញមកឬដាក់លក់ផងដែរ៕
ប្រភព៖ អគ្គ.ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ CCF
