ព្រះវិហារ៖ លោក ឃូ អៀងហួត អគ្គនាយករងអាជ្ញាធរជាតិព្រះវិហារ បានដឹកនាំនាយកដ្ឋានជំនាញ ជួបប្រជុំពិភាក្សាជាមួយ អ្នកជំនាញការចិន នៅថ្ងៃទី១៨ ខែកញ្ញា ឆ្នាំ២០២៣ ដើម្បីពិភាក្សាអំពីផែនការអភិរក្សគោបុរៈទី១ ទី២ និងទី ៣ នៃប្រាសាទព្រះវិហារ។
តាមរយៈការពិភាក្សានេះ អ្នកជំនាញការចិន គ្រោងនឹងចុះមកទល់ទ្ររចនាសម្ព័ន្ធប្រាសាទបឋមក្នុង ខែវិច្ឆិកា ឆ្នាំ២០២៣ ខាងមុខនេះ ហើយផែនការជួសជុលលម្អិតនឹងអាចធ្វើនៅក្នុងឆ្នាំ២០២៤។ ក្រៅពីការពិភាក្សា ក្រុមការងារក៏បានចុះពិនិត្យទីតាំងដាក់ស្លាកព័ត៌មានអំពីការជួសជុលប្រាសាទផងដែរ។
ក្នុងការពិភាក្សានេះផងដែរ អាជ្ញាធរជាតិព្រះវិហារ បានស្នើដល់អ្នកជំនាញការចិន ឱ្យរៀបចំផែនការ និង បច្ចេកទេសជួសជុលលម្អិត ដើម្បីជាមូលដ្ឋានសម្រាប់ អាជ្ញាធរជាតិព្រះវិហារ ដាក់ឆ្លងយោបល់អ្នកជំនាញការអាយស៊ីស៊ីព្រះវិហារ ពិនិត្យនិងសម្រេច ៕
ប្រភព៖ ទីភ្នាក់ងារសារព័ត៌មានកម្ពុជា
