កំពង់ស្ពឺ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបាន ប្រកាសថា សម្តេចនឹងចុះជួបផ្ទាល់ជាមួយបងប្អូនអាជីវករដែលជាអ្នកលក់ដូរនៅពេលខាងមុខនេះដើម្បីចង់ដឹងពីអ្វីដែលពួកគាត់ ចង់បាន។ ការប្រកាសរបស់សម្ដេចធិបតីបែបនេះ ក្នុងឱកាសអញ្ជើញចុះជួបសំណេះសំណាលជាមួយបងប្អូនកម្មករ និយោជិត នៅតាមបណ្តារោងចក្រ សហគ្រាស ដែលមានមូលដ្ឋាននៅក្នុងស្រុកសំរោងទង ខេត្តកំពង់ស្ពឺ នាព្រឹកថ្ងៃសៅរ៍ ៩រោច ខែស្រាពណ៍ ឆ្នាំថោះ បញ្ចស័ក ព.ស. ២៥៦៧ ត្រូវនឹងថ្ងៃទី០៩ ខែកញ្ញា ឆ្នាំ២០២៣។
សម្តេចមហាបវរធិបតី ហ៊ុន ម៉ាណែត បានថ្លែងថា មិនមែនតែចុះជួបបងប្អូនកម្មករ កម្មការិនីនោះទេ សម្ដេចធិបតីនឹងជួបនៅវិស័យ ផ្សេងៗទៀត ដែលនៅខែវិច្ឆិកាខាងមុខនេះ នឹងជូបអាជីវករ ជួបវិស័យក្រៅប្រព័ន្ធ ជួបវិស័យទេសចរណ៍ និងវិស័យណាដែលយើងត្រូវ ជួប។ សម្តេចធិបតីបានបញ្ជាក់ថា៖ «យើងនឹងចុះជួបបងប្អូនអ្នកលក់ដូរ ដើម្បីស្តាប់ពីព្រោះខ្ញុំចូលចិត្តចុះជួប ហើយជួបផ្ទាល់តែម្តង អ្នកខ្លះគេថានាយករដ្ឋមន្ត្រីមិនត្រូវធ្វើការងារចុះជួបអីចឹងទេ ទុកឱ្យរដ្ឋមន្ត្រីកាងារជួបទៅ។ នាយករដ្ឋមន្ត្រីមិនត្រូវដណ្តើម ការងារ រដ្ឋមន្ត្រី ក្រសួងការងារអីចឹង»។
សម្តេចធិបតីនាយករដ្ឋមន្រ្ដីបានថ្លែងបញ្ជាក់ថា ការចុះជួបផ្ទាល់ជាមួយអ្នកលក់ដូរនេះ មិនមែនជាការដណ្តើមការងាររបស់ រដ្ឋមន្ត្រីក្រសួងការងារនោះទេ ប៉ុន្តែដើម្បីចង់ដឹងបញ្ហាផ្ទាល់ដែលគាត់ចង់បាន នូវអ្វីដែលគាត់ចង់បាន៕
ប្រភព៖ ទីភ្នាក់ងារសារព័ត៌មានកម្ពុជា
