កំពង់ស្ពឺ៖ មនុស្សប្រុស.ស្រី ចំនួន៥៧នាក់ បានរងរបួសធ្ងន់ ស្រាល ក្នុងករណីគ្រោះថ្នាក់ចរាចរណ៍រវាងរថយន្តបុករថយន្ត។ ហេតុការណ៍នោះបានកើតឡើងនៅថ្ងៃទី០១ ខែកញ្ញា ឆ្នាំ២០២៣ វេលាម៉ោង ១៩នឹង១៩នាទី នៅលើផ្លូវក្រាលកៅស៊ូ ត្រង់ចំណុចភូមិអន្លុងចំណារ ឃុំចាន់សែន ស្រុកសាមគ្គីមុនីជ័យ ខេត្តកំពង់ស្ពឺ។
យោងតាមរបាយការណ៍របស់សមត្ថកិច្ចបានអោយដឹងថា មានរថយន្ដ ០១គ្រឿង ម៉ាក HYUNDAI ពណ៌ស ពាក់ផ្លាកលេខ កំពង់ស្ពឺ 3A-1479 បើកបរដោយឈ្មោះ ណែម រ៉ាត់ ភេទប្រុស អាយុ ៣១ឆ្នាំ (របួសធ្ងន់) រស់នៅភូមិកណ្ដាល ឃុំមានជ័យ ស្រុកសាមគ្គីមុនីជ័យ ខេត្ដកំពង់ស្ពឺ បើកបរក្នុងទិសដៅពីលិចទៅកើត លុះបើកបរមកដល់ចំណុចខាងលើបានបើកទៅបុករថយន្ដ ០១គ្រឿង ម៉ាក HYUNDAI ពណ៌ស ពាក់ផ្លាកលេខ កំពង់ស្ពឺ 3A-6706 បើកបរដោយឈ្មោះ រុីម រុំ ភេទប្រុស អាយុ ៣៥ ឆ្នាំ រស់នៅភូមិក្រាំងទំនប់ ឃុំចាន់សែន ស្រុកសាមគ្គីមុនីជ័យ ខេត្ដកំពង់ស្ពឺ ( ដឹកកម្មករចំនួន ៦៣ នាក់ ) ដែលកំពុងបើកបរក្នុងទិសដៅបញ្ច្រាសទិសគ្នា បណ្តាលអោយគ្រោះថ្នាក់មនុស្សរបួសមនុស្សចំនួន ៥៧នាក់ ស្រី ៣៨នាក់ (របួសធ្ងន់មនុស្ស ០៤នាក់ ស្រី ០២នាក់) ខូចខាតធ្ងន់រថយន្ដ ០២គ្រឿង។
ក្រោយកើតហេតុ សមត្ថកិច្ចបានយកវត្ថុតាងរថយន្ដ ០២គ្រឿងខាងលើ បានយកមករក្សាទុកនៅប៉ុស្តិ៍នគរបាលរដ្ឋបាលចាន់សែន ដើម្បីចាត់ការបន្តតាមនីតិវិធីច្បាប់៕
ប្រភព៖ អគ្គស្នងការដ្ឋាននគរបាលជាតិ
