កែប៖ នៅវេលាម៉ោង៣:០០នាទីទាបភ្លឺ ថ្ងៃទី១ ខែកញ្ញា ឆ្នាំ២០២៣ នេះមានករណីគ្រោះថ្នាក់អគ្គិភ័យ(ភ្លើងឆេះផ្ទះនិងឃ្លាំងផ្ទុកអីវ៉ាន់ ម្ចាស់ឈ្មោះលោក លឹម លី)ជាប្រជាពលរដ្ឋរស់នៅភូមិរនេស ឃុំពងទឹក ស្រុកដំណាក់ចង្អើរ។ ដោយភ្លាមៗនោះទាំងកម្លាំងនគរបាលនិងមន្ដ្រីមូលដ្ឋានស្រុកបានចុះសហការគ្នាជួយអន្តរាគមន៍ដោយជួយសង្គ្រោះមនុស្សដែលជាប់ក្នុងផ្ទះជាមុន និងសុំឡានទឹកពន្លត់អគ្គីភ័យមកជួយ ដោយបានប្រើប្រាស់ឡានទឹកចំនួន៧គ្រឿង(ស្នងការដ្ឋាននគរបាលខេត្តកែប៤គ្រឿង,ស្នងការដ្ឋាននគរបាលខេត្តកំពត៣គ្រឿង) បានបាញ់ទឹកអស់ចំនួន២៣ឡាន ទើបរលត់ភ្លើងបានជាស្ថាពរនៅវេលាម៉ោង៦:០០នាទីព្រឹកនេះ។
ដោយមានការឆាបឆេះខូចខាតសម្ភារៈ និងឃ្លាំងផ្ទុកអីវ៉ាន់ ចំនួន១ខ្នង និងផ្ទះ ចំនួន២ខ្នង(ធ្វើពីឈើប្រក់ស័ង្កសី) ,រថយន្ដដឹកទំនិញ ចំនួន២គ្រឿង រួមទាំងទំនិញមួយចំនួនធំ តែមិនបណ្តាលឲ្យប៉ះពាល់ដល់អាយុជីវិតរបស់ប្រ/រដ្ឋណាម្នាក់ឡើយ។ តាមការសន្និដ្ឋានជាក់ស្តែង មូលហេតុដែលបណ្តាលឲ្យកើតភ្លើងឆេះនោះគឺមកពីផ្ទុះសេខ្សែភ្លើងនៅក្នុងផ្ទះ៕
ប្រភព៖ មន្ទីរព័ត៌មានខេត្តកែប
