ភ្នំពេញ ៖ ឯកឧត្តម ហេង សួរ រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈ បានប្តេជ្ញានឹងខិតខំ អភិវឌ្ឍន៍នូវផែនការយុទ្ធសាស្ត្រអភិវឌ្ឍន៍វិស័យការងារ សន្តិសុខសង្គម និងបណ្តុះបណ្តាលវិជ្ជាជីវៈ ឱ្យមានភាពគ្រប់ជ្រុងជ្រោយ ដើម្បីធានាបាននិរន្តរភាពចំពោះកម្មករនិយោជិត និងនិយោជក។ ថ្លែងក្នុងពិធីជួបជាមួយកម្មក-កម្មការិនី នយោជិត តាមរោងចក្រ សហគ្រាស ក្រោមអធិបតីភាព ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត នាយករដ្ឋមន្ត្រីនៃព្រះរាជាណា ចក្រកម្ពុជា កាលពីពេលថ្មីៗកន្លងមកនេះ នៅខណ្ឌពោធិ៍សែនជ័យ រាជធានីភ្នំពេញ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ មានប្រសាសន៍ថា ជាមួយនឹងភាពជឿជាក់ការដឹកនាំ ប្រកបដោយគតិបណ្ឌិត ចក្ខុវិស័យច្បាស់លាស់ ម៉ឺងម៉ាត់ ហ្មត់ចត់និងប៉ិនប្រសប់ របស់ឯកឧត្តម កិត្តិទេសាភិបាលបណ្ឌិត ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងនាមក្រសួង ក្នុងនាមសហការី ដែលជាថ្នាក់ដឹកនាំក្រសួង សូមប្រកាសគាំទ្រ និងត្រៀមខ្លួនចូលរួមអនុវត្តយ៉ាងពេញ ទំហឹង ប្រកបដោយភក្តីភាពចំពោះរាជរដ្ឋាភិបាល ក្នុងការអនុវត្តន៍កម្មវិធីអាទិភាពគន្លឹះនានា ដែលបាន កំណត់ដោយប្រមុខរាជរដ្ឋាភិបាល។
ឯកឧត្តម រដ្ឋមន្ត្រីក្រសួងការងារ បានបន្តថា ក្រសួងការងារប្តេជាអនុវត្ត ចំពោះកម្មវិធីនិងសកម្មភាព អាទិភាពទាំងឡាយ ដែលពាក់ព័ន្ធនឹងវិស័យការងារ សន្តិសុខសង្គមនិងការបណ្តុះបណ្តាលវិជ្ជាជីវៈ ដើម្បីធានាថាបងប្អូនកម្មករនិយោជិតទាំងក្នុងនិងក្រៅប្រព័ន្ធ ព្រមទាំងបងប្អូនដែលធ្វើការនៅក្រៅប្រទេស ទទួលបាននូវសិទ្ធិ អត្ថប្រយោជន៍ កិត្តិយស សេចក្តីថ្លៃថ្នូរ និងការគាំពារកាន់តែប្រសើររឹងមាំជាងមុន។
ឯកឧត្តម រដ្ឋមន្ត្រី បានបន្តទៀតថា ចំពោះនិយោជកនិងវិស័យឯកជន ក៏ទទួលបាននូវការការពារដោយស្មើ ភាព ចំពោះមុខច្បាប់។ គ្រប់រោងចក្រ សហគ្រាសនិងក្លាយជាសហគមន៍សុខសាន្តមួយ ដែលកម្មករ និយោជិត និងនិយោជក ចេះគោរពគ្នា អធ្យាស្រ័យគ្នា ប្រកាន់យកគោលការណ៍ឈ្នះឈ្នះជាធំ មិនយក ការចាញ់ឈ្នះជាគោលក្នុងការដោះស្រាយវិវាទនិងបញ្ហាផ្សេងៗ។ « ក្រសួងការងារ និងបណ្តុះបណ្តាលវិជ្ជាជីវៈ ប្តេជ្ញាខិតខំអភិវឌ្ឍន៍ នូវផែនការយុទ្ធសាស្ត្រ អភិវឌ្ឍន៍វិស័យការងារ សន្តិសុខសង្គម និងបណ្តុះបណ្តាលវិជ្ជាជីវៈ ឱ្យមានភាពគ្រប់ជ្រុងជ្រោយ ស្របតាមកម្មវិធីអាទិភាពគន្លឹះរបស់រាជរដ្ឋាភិបាល និងចាត់ទុកគ្រប់ភាគីទាំងអស់គឺជាដៃគូដ៏ល្អ ហើយក៏ខិតខំអភិវឌ្ឍន៍សមត្ថភាពមន្ត្រីក្រាមឱវាទ ឱ្យក្លាយទៅជាមន្ត្រីដែលមានក្រមសីលធម៌ខ្ពស់ ចំណេះដឹងច្បាស់លាស់ បំពេញតួនាទីប្រកបដោយវិជ្ជាជីវៈ ជើងជាប់ដៃរហ័សរហួនវាងវៃក្នុងការសហការ ជាមួយគ្រប់ស្ថាប័ន ភាគីពាក់ព័ន្ធដោះស្រាយបញ្ហានានាឱ្យបានលឿន »។
សូមជម្រាបថា ថ្លែងឧទ្ទេសនាម យុទ្ធសាស្ត្របញ្ចាកោណដំណាក់កាលទី១ និងវិធានការគន្លឹះរបស់ រាជរដ្ឋាភិបាលនីតិកាលទី៧ នៃរដ្ឋសភា ក្នុងអង្គប្រជុំពេញអង្គលើកដំបូង នីតិកាលទី៧ នៃរដ្ឋសភា ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត បានមានប្រសាសន៍ថា រាជរដ្ឋាភិបាលនិងបន្ត ការអភិវឌ្ឍទីផ្សារការងារ ដែលមានគោលដៅយុទ្ធសាស្ត្រផ្ដោតលើការជំរុញ ការអភិវឌ្ឍទីផ្សារការងារ តាមរយៈការបង្កើត ការរក្សានិងការបង្កើនការងារដល់កម្មករ-និយោជិត ទាំងក្នុងប្រព័ន្ធនិងក្រៅប្រព័ន្ធ សំដៅបង្កើនប្រាក់ចំណូល ទ្រទ្រង់ជីវភាពសមរម្យនិងកាត់បន្ថយភាពក្រីក្ររបស់ប្រជាជន៕
ប្រភព៖ ក្រសួងព័ត៌មាន
