កណ្ដាល៖ នៅថ្ងៃពុធ ១៥កើត ខែចេត្រ ឆ្នាំខាល ចត្តាស័ក ព.ស.២៥៦៦ ត្រូវនឹងថ្ងៃទី០៥ ខែមេសា ឆ្នាំ២០២៣ វេលាម៉ោង ១៦នឹង៤៥នាទី ករណីគ្រោះថ្នាក់ចរាចរណ៏ផ្លូវគោក រវាងរថយន្តនឹងម៉ូតូ បណ្តាលអោយរបួសធ្ងន់មនុស្ស ០១នាក់ប្រុស ខូចខាតម៉ូតូធ្ងន់០១គ្រឿង រថយន្តខូចស្រាល០១គ្រឿង នៅចំនុចផ្លូវជាតិលេខ១ ចន្លោះគីឡូម៉ែត្រ១៨-១៩ ភូមិទួលក្របៅ ឃុំគគីរ ស្រុកកៀនស្វាយ ខេត្តកណ្តាល ។
នៅថ្ងៃខែឆ្នាំវេលាម៉ោងខាងលើមានរថយន្ត ម៉ាកFUSO ពណ៌ស ប្រភេទក្បាលសណ្តោង ពាក់ផ្លាកលេខផ្លាកលេខ 29H 29259 បើកបរដោយឈ្មោះ ផាម វ៉ាន់ហុង ភេទប្រុស អាយុ ៤៥ឆ្នាំ ជនជាតិវៀតណាម មានទីលំនៅប្រទេសវៀតណាម ដែលបើកបរមានទិសដៅពីភ្នំពេញទៅអ្នកលឿង តាមផ្លូវជាតិលេខ១។ ដែលបើកមកដល់កន្លែងកើតហេតុខាងលើបានបុកជាមួយម៉ូតូ ម៉ាកHONDA SCOOPY I ពណ៌ស ពាក់ផ្លាកលេខភ្នំពេញ 1HL-3771 បើកបរដោយឈ្មោះ ហោ សុជា ភេទប្រុស អាយុ៣០ឆ្នាំ មានទីលំនៅភូមិព្រែកឈ្មោះ ឃុំព្រែកតាស ស្រុកពោធិរៀង ខេត្តព្រៃវែង ដែលបើកមានទិសដៅផ្ទុយគ្នា បណ្តាលអោយរងរបួសធ្ងន់អ្នកបើកបរម៉ូតូ ត្រូវក្រុមគ្រួសារយកទៅព្យាបាលនៅមន្ទីរពេទ្យមិត្តភាពខ្មែរ-សូវៀត។ ម៉ូតូខូចធ្ងន់០១គ្រឿង រថយន្តខូចស្រាល០១គ្រឿង ត្រូវបានយកទៅរក្សាទុកជាភស្តុតាងនៅអធិការដ្ឋាននគរបាលស្រុកកៀនស្វាយ ដើម្បីបន្តនីតិវិធី៕
ប្រភព៖ នាយកដ្ឋានផ្សព្វផ្សាយអប់រំ
