ឧត្តរមានជ័យ ៖ អនុវត្តតាមការចង្អុលបង្ហាញ និងបទបញ្ជាពីសំណាក់លោកឧត្តមសេនីយ៍ទោ ហួត សុធី ស្នងការនគរបាលខេត្តឧត្តរមានជ័យ នាថ្ងៃពុធ ១៥កើត ខែចេត្រ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី០៥ ខែមេសា ឆ្នាំ២០២៣ នៅវេលាម៉ោង ១០ៈ៣០នាទី លោកវរសេនីយ៍ទោ ជ័យ វាសនា អធិការនគរបាលស្រុកត្រពាំងប្រាសាទ បានដឹកនាំកម្លាំងជំនាញ ចុះឃាត់ខ្លួនក្មេងទំនើងដែលបង្កភាពអាណាធិបតេយ្យឈ្លោះប្រកែក និងប្រើប្រាស់ហិង្សាវាយតប់គ្នា នៅចំណុចមាត់ស្រះមុខវត្តត្រពាំងប្រាសាទ ស្ថិតក្នុងភូមិត្រពាំងប្រាសាទ ឃុំ-ស្រុកត្រពាំងប្រាសាទ ចំនួន ០២ក្រុម ដែលមានគ្នា សរុបចំនួន ១២នាក់ និងដកហូតវត្ថុតាងសម្ភារៈមួយចំនួន រួមមាន៖ ម៉ូតូ ចំនួន ០៥គ្រឿង -កាំបិតតាំងតោ ០២ដើម និងខ្សែក្រវ៉ាត់ ០២ខ្សែ យកមកកាន់អធិការដ្ឋានស្រុកត្រពាំងប្រាសាទដើម្បីធ្វើការសួរនាំ ។
ជាមួយគ្នានោះដែរនៅរសៀលថ្ងៃដដែលវេលាម៉ោង ១៥ៈ០០នាទី ឯកឧត្ដម គង់ កន្នារិទ្ធ អភិបាលរងខេត្តឧត្តរមានជ័យ បានអញ្ជើញទៅផ្ទាល់ដល់អធិការដ្ឋាន ដើម្បីជួបសំណេះសំណាលជាមួយអាណាព្យាបាល និងធ្វើការអប់រំ ណែនាំ ដល់ក្រុមក្មេងទំនើងទាំង ១២នាក់ និងបានហាមថ្ងៃក្រោយកុំឲ្យមានប្រព្រឹត្តសកម្មភាពទាំងនេះបន្តទៅទៀត ។
សូមបញ្ជាក់ថា បច្ចុប្បន្ន ក្រុមក្មេងទំនើងទាំង ១២នាក់ខាងលើ រួមទាំងវត្ថុតាងដែលដកហូតបានមានម៉ូតូចំនួន ៥គ្រឿង ផងដែរនោះត្រូវបានកម្លាំងជំនាញផែនការងារនគរបាលយុត្តិធម៌នៃអធិការដ្ឋាននគរបាលស្រុកត្រពាំងប្រាសាទ ធ្វើកំណត់ហេតុធ្វើការអប់រំចុះកិច្ចសន្យាធានាពីអាណាព្យាបាលដើម្បីមកធានាយកទៅលំនៅដ្ឋានវិញផងដែរ ៕
ប្រភព៖ អគ្គស្នងការដ្ឋាននគរបាលជាតិ
