បាត់ដំបង៖ នៅថ្ងៃចន្ទ ១៣កើត ខែចេត្រ ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃទី០៣ ខែមេសា ឆ្នាំ២០២៣ វេលាម៉ោង១២នឹង៣០នាទី នៅចំណុចក្រុមទី២៦ ភូមិបឹងទឹម ឃុំតាប៉ុន ស្រុកសង្កែ ខេត្តបាត់ដំបង មានករណីបទហិង្សាដោយចេតនាមានស្ថានទម្ងន់ទោស (យកកាំបិតកាប់) មួយកើតឡើងបង្កដោយជនសង្ស័យម្នាក់ឈ្មោះ ហឿត សុន ភេទប្រុស អាយុ៣៥ឆ្នាំ មានទីលំនៅភូមិបឹងទឹម ឃុំតាប៉ុន ស្រុកសង្កែ ខេត្តបាត់ដំបង មុខរបរ មិនពិតប្រាកដ បានធ្វេីសកម្មភាពយកកាំបិតកាប់ទៅលេីជនរងគ្រោះម្នាក់ឈ្មោះ គង់ គឿន ភេទប្រុស អាយុ៣៤ឆ្នាំ មានទីលំនៅភូមិបឹងទឹម ឃុំតាប៉ុន ស្រុកសង្កែ ខេត្តបាត់ដំបង មុខរបរ កម្មករ បណ្តាលអោយរងរបួសត្រូវចំក្បាលខាងស្តាំមួយកន្លែងមុតចេញឈាម និងលេីកំផួនដៃខាងស្តាំមួយកន្លែងទៀតកំពុងសម្រាកព្យាបាលនៅមន្ទីរពេទ្យបាត់ដំបង។ បន្ទាប់ពីពេលកើតហេតុ ជនរងគ្រោះបានរាយការណ៍មកសមត្ថកិច្ចនគរបាលស្រុកសង្កែ និងដោយអនុវត្តតាមយោបល់ដឹកនាំរបស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង ក៏ដូចយោបល់របស់លោកឧត្តមសេនីយ៍ត្រី លឹម ពុទ្ធីឡា ស្នងការរងផែនការងារនគរបាលព្រហ្មទ័ណ្ឌ កម្លាំងផ្នែកជំនាញនៃអធិការដ្ឋានស្រុកសង្កែ សហការជាមួយប៉ុស្តិ៍នគរបាលរដ្ឋបាលតាប៉ុន ដឹងនាំដោយលោកវរសេនីយ៍ទោ យុត តុងហូ អធិការនគរបាលស្រុកសង្កែ បានចុះស្រាវជ្រាវស៊ើបអង្កេតបង្ក្រាបឃាត់ខ្លួនជនសង្ស័យម្នាក់ខាងលើ។ ក្រោយឃាត់ខ្លួនជនសង្ស័យបានសារភាពថា មូលហេតុនៃអំពេីហិង្សារហូតឈានដល់ការប្រេីប្រាស់កាំបិតកាប់ទៅលើជនរងគ្រោះដោយសារស្រវឹងស្រា។
នាពេលនេះ ជនសង្ស័យខាងលេីត្រូវបាននគរបាលស្រុកកំពុងកសាងសំណុំរឿងបញ្ជូនទៅការិយាល័យជំនាញខេត្ត ដើម្បីចាត់ការបន្តតាមនីតិវិធីច្បាប់ ៕
ប្រភព៖ នាយកដ្ឋានផ្សព្វផ្សាយអប់រំ
