បាត់ដំបង៖ នៅថ្ងៃអង្គារ ៧កើត ខែចេត្រ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៨ ខែមីនា ឆ្នាំ២០២៣ វេលាម៉ោង២២នឹង៣០នាទី ត្រង់ចំណុចផ្ទះក្រុមទី០៧ ភូមិអូរចម្លង ឃុំតាសែន ស្រុកកំរៀង ខេត្តបាត់ដំបង មានករណីប្រើអំពើហិង្សាក្នុងគ្រួសារ និងប៉ុនប៉ងរំលោភសេពសន្ថវ:មួយកើតឡើង ប្រព្រឹត្តដោយជនសង្ស័យឈ្មោះសេង សៀក ភេទប្រុស អាយុ ៥៤ឆ្នាំ រស់នៅភូមិអូរចម្លង ឃុំតាសែន ស្រុកកំរៀង ខេត្តបាត់ដំបង មានមុខរបរ កម្មករ (ឪពុកចុង) បានធ្វើសកម្មភាពយកខ្សែភ្លើងវាយ និងប៉ុនប៉ងរំលោភសេពសន្ថវៈ ទៅលើជនរងគ្រោះឈ្មោះ យ.ន.គ ភេទស្រី អាយុ ១៧ឆ្នាំ (ជាកូនចុង) រស់នៅភូមិឃុំកើតហេតុខាងលើ បណ្ដាលឲ្យរងរបួសជាច្រើនកន្លែង។ ក្រោយកើតហេតុជនសង្ស័យបានជិះម៉ូតូម៉ាកហុងដាឌ្រីមសេរ125 ពណ៌ខ្មៅស៊េរីឆ្នាំ2020 ពាក់ស្លាកលេខប៉ៃលិន 1C-5450 រត់គេចខ្លួនបាត់។
ករណីនេះ ដោយអនុវត្តតាមយោបល់ដឹកនាំរបស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង រួមនឹងយោបល់លោកស្រីឧត្តមសេនីយ៍ត្រី រស់ ជីវី ស្នងការរងទទួលការងារប្រឆាំងការជួញដូរនិងការពារអនីតិជន កម្លាំងផ្នែកជំនាញ នៃអធិការដ្ឋាននគរបាលស្រុកកំរៀង បានសហការជាមួយកម្លាំងជំនាញ នៃអធិការដ្ឋាននគរបាលស្រុកមោងឬស្សី ដឹកនាំដោយលោកវរសេនីយ៍ទោ វេ គឹមចត់ អធិការនគរបាលស្រុកកំរៀង សមត្ថកិច្ចធ្វើការឃាត់ខ្លួនជនសង្ស័យបាន នៅចំណុចភូមិព្រៃស្វាយ ឃុំព្រៃស្វាយ ស្រុកមោងឬស្សី ខេត្តបាត់ដំបង នៅថ្ងៃទី៣០ ខែមីនា ឆ្នាំ២០២៣ វេលាម៉ោង១៧នឹង១០នាទី យកមកសាកសួរនៅអធិការដ្ឋាននគរបាលស្រុកកំរៀង ខ្លួនបានឆ្លើយសារភាពថា កាលពីថ្ងៃខែឆ្នាំកើតហេតុខាងលើខ្លួនពិតជាបានប្រព្រឹត្តប្រើអំពើហិង្សាក្នុងគ្រួសារ និងប៉ុនប៉ងរំលោភសេពសន្ថវ:ទៅលើជនរងគ្រោះពិតប្រាកដមែន។
បច្ចុប្បន្ន កម្លាំងនគរបាលស្រុកកំរៀងកំពុងកសាងសំណុំរឿងបញ្ចូនមកការិយាល័យជំនាញខេត្ត ដើម្បីចាត់បន្តតាមនីតិវិធីច្បាប់៕
ប្រភព៖ នាយកដ្ឋានផ្សព្វផ្សាយអប់រំ
