ភ្នំពេញ៖ ជនសង្ស័យ០២នាក់ ជាឃាតករកាប់សម្លាប់មិត្តភ័ក្ររបស់ខ្លួន ត្រូវបាននគរបាលព្រហ្មទណ្ឌក្រសួងមហាផ្ទៃ សហការ ជាមួយនគរបាលព្រហ្មទណ្ឌខេត្តកំពង់ស្ពឺធ្វើការឃាត់ខ្លួនបាន នៅវេលាម៉ោង១៥និង១៥នាទីថ្ងៃទី២២ ខែមីនា ឆ្នាំ២០២៣ នៅចំណុច ភូមិព្រះម្លប់ ឃុំភារីមានជ័យ ស្រុកបសេដ្ឋ ខេត្តកំពង់ស្ពឺ។
ប្រតិបត្តិការនេះធ្វើឡើងក្រោមការដឹកនាំចង្អុលបង្ហាញផ្ទាល់ពីឯកឧត្តម នាយឧត្តមសេនីយ៍ សន្ដិបណ្ឌិត នេត សាវឿន អគ្គស្នង ការនគរបាលជាតិ និងបញ្ជាដឹកនាំដោយ ឯកឧត្តម ឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ ក្រសួងមហាផ្ទៃ យ៉ាងយកចិត្តទុកដាក់ ។ ក្រោយពីទទួលបានបទបញ្ជាដ៏ម៉ឺងម៉ាត់ របស់ឯកឧត្តម នាយឧត្តមសេនីយ សន្តិបណ្ឌិត នេត សាវឿន អគ្គស្នងការនគរបាលជាតិ លោកឧត្តមសេនីយ៍ត្រី ហ៊ុន មុន្នីរ័ត្ន អនុប្រធាននាយក ដ្ឋាននគបាលព្រហ្មទណ្ឌ ក្រសួងមហាផ្ទៃ និងលោក វរសេនីយ៍ឯក ហែម បូណា អនុប្រធាននាយកដ្ឋាននគបាលព្រហ្មទណ្ឌក្រសួងមហាផ្ទៃ បានដឹកនាំ សហការជាមួយនគរបាលជំនាញព្រហ្មទណ្ឌនៃស្នងការដ្ឋាននគរបាលខេត្តកំពង់ស្ពឺ និងអធិការដ្ឋានគរបាលស្រុកបសេដ្ឋ បានធ្វើ ការស្រាវជ្រាវរហូតឈានដល់ការកំណត់មុខសញ្ញានិងឃាត់ខ្លួនបានសម្រេច។
គួររំលឹកផងដែរ នៅថ្ងៃទី១០ ខែមីនា ឆ្នាំ២០២៣ វេលាម៉ោងប្រហែល២០ និង៣០នាទី នៅចំណុចភូមិចាស់ ឃុំបសេដ្ឋ ស្រុកបសេដ្ឋ ខេត្តកំពង់ស្ពឺ ជនសង្ស័យចំនួន ០២នាក់ បានធ្វើសកម្មភាពកាប់សម្លាប់ទៅលើជនរងគ្រោះឈ្មោះ ភឿន សៅរឿន ភេទប្រុស អាយុ៣២ឆ្នាំ បណ្ដាលឲ្យស្លាប់នៅនឹងកន្លែងកើតហេតុ ។ ជនសង្ស័យចំនួន ០២នាក់ នោះបានធ្វើសកម្មភាព យកកាំបិតកាប់ទៅ លើជនរងគ្រោះជាច្រើនកន្លែង ត្រង់ក្បាល ក និងដៃ ។ ក្រោយធ្វើសកម្មភាពរួចជនសង្ស័យទាំង០២នាក់ បានរត់គេចខ្លួនបាត់តែម្ដង ។
លុះមកដល់ថ្ងៃទី២២ ខែមីនា ឆ្នាំ២០២៣ កម្លាំងនាយកដ្ឋាននគរបាលព្រហ្មទណ្ឌ សហការជាមួយអធិការរដ្ឋាននគរបាល ស្រុកបសេដ្ឋ បានធ្វើការឃាត់ខ្លួនជនល្មើសចំនួន 0២នាក់ រួមមានឈ្មោះ÷
១.ឈ្មោះ យ៉ា សុជាតិ ភេទប្រុស អាយុ២៣ឆ្នាំ ស្នាក់នៅភូមិចាស់ ឃុំបសេដ្ឋ ស្រុកបសេដ្ឋ ខេត្តកំពង់ស្ពឺ ។
២.ឈ្មោះ អៀម សំណាង ភេទប្រុស អាយុ១៧ឆ្នាំ ស្នាក់នៅភូមិចាស់ ឃុំបសេដ្ឋ ស្រុកបសេដ្ឋ ខេត្តកំពង់ស្ពឺ ។
បច្ចុប្បន្នកំលាំងនាយកដ្ឋានយើងកំពុងបន្តស្វែងរកបក្ខពួកម្នាក់ទៀតឈ្មោះ ផានិន ហៅអាត្នោត ភេទប្រុស ដើម្បីនាំមកកាន់នាយកដ្ឋាននគរបាលព្រហ្មទណ្ឌ ចាត់ការបន្តតាមនីតិវិធី៕
