កណ្ដាល៖ នៅថ្ងៃចន្ទ ១៤រោច ខែផល្គុន ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២០ ខែមីនា ឆ្នាំ២០២៣ វេលាម៉ោង១៣នឹង០០នាទី នៅចំណុចមុខផ្ទះជនរងគ្រោះ ភូមិពាម ឃុំសំបួរមាស ស្រុកមុខកំពូល ខេត្តកណ្ដាល។
ជនរងគ្រោះមានឈ្មោះ ពៅ ពិសី ភេទស្រី អាយុ២៧ឆ្នាំ ជនជាតិខ្មែរ មុខរបរ លក់ដូរ មានទីលំនៅសព្វថ្ងៃភូមិពាម ឃុំសំបួរមាស ស្រុកមុខកំពូល ខេត្តកណ្តាល។ ដោយឡែកជនសង្ស័យ០៣នាក់ មានឈ្មោះ បូរ សុខហេង ភេទប្រុស អាយុ២១ឆ្នាំ ជនជាតិខ្មែរ មុខរបរ មិនពិតប្រាកដ មានទីលំនៅសព្វថ្ងៃភូមិ ព្រែកតារ័ត្ន សង្កាត់ ព្រែកតាសេក ខណ្ឌជ្រោយចង្វារ រាជធានីភ្នំពេញ (ឃាត់ខ្លួន) និងជនសង្ស័យចំនួន០២នាក់ទៀតមិនស្គាល់អត្តសញ្ញាណ ។
វត្ថុតាងចាប់យកបានរួមមានកូនសោរចាក់ម៉ូតូចំនួន០៣ (របស់ជនសង្ស័យ) ម៉ូតូម៉ាកហុងដាសេ១២៥ ពណ៌ខ្មៅសេរីឆ្នាំ២០១៨ ពាក់ស្លាកលេខ ភ្នំពេញ1GZ-0926ចំនួន ០១គ្រឿង (របស់ជនរងគ្រោះ)។
នៅអំឡុងខែកុម្ភះ ឆ្នាំ២០២៣ ជនសង្ស័យឈ្មោះ បូរ សុខហេង បានស្គាល់សង្ស័យឈ្មោះ រ័ត្ន ភេទប្រុស តែមិនស្គាល់ពីលំនៅ ហើយធ្លាប់ជូនឈ្មោះ រ័ត្ន ទៅម្ដុំផ្សារចាស់ ដោយឈ្មោះ រ័ត្ន ជាមនុស្សដើរជាមួយនឹងក្រុមភេទទី៣ ហើយជនសង្ស័យឈ្មោះ បូរ សុខហេង ក៏បានរាប់អានគ្នាជាមួយនឹងជនសង្ស័យឈ្មោះ រ័ត្ន ចាប់ពីពេលនោះមក ក្រោយពីមានការរាប់អានគ្នា ឈ្មោះ រ័ត្ន តែងតែបបួលជនសង្ស័យឈ្មោះ បូរ សុខហេង ដើរធ្វើសកម្មភាពលួចម៉ូតូ តែជនសង្ស័យឈ្មោះ បូរ សុខហេង មិនបានទៅជាមួយទេ។
លុះនៅថ្ងៃទី២០ ខែមីនា ឆ្នាំ២០២៣ វេលាម៉ោង១១នឹង៣០នាទី ជនសង្ស័យឈ្មោះ រ័ត្ន បានបបួល ជនសង្ស័យឈ្មោះ បូរ សុខហេង ដើរធ្វើសកម្មភាពកាច់កម៉ូតូ ហើយឈ្មោះ រ័ត្ន បានជិះម៉ូតូរបស់ខ្លួនម៉ាក ស្កុបពី ពណ៌ខ្មៅ សេរីឆ្នាំ២០១៤ ឌុបឈ្មោះ បូរ សុខហេង ចេញពីផ្ទះជួលនៅម្ដុំផ្សារចាស់ ពេលមកដល់មុខមន្ទីរពេទ្យកាល់ម៉ែត្រ ជនសង្ស័យឈ្មោះ រ័ត្ន បានទូរស័ព្ទហៅបក្សពួកម្នាក់ទៀតមិនស្គាល់អត្តសញ្ញាណ ជិះម៉ូតូម៉ាក់ស្កុបពី ពណ៌ខ្មៅសេរីឆ្នាំ២០២១ ដើម្បីដើរធ្វើសកម្មភាពជាមួយគ្នា។ បន្ទាប់មកជនសង្ស័យទាំង០៣នាក់ ក៏បាននាំគ្នាជិះម៉ូតូ រហូតមកដល់ផ្លូវកៅស៊ូលេខ២៦១ ស្ថិតក្នុងឃុំសំបួរមាស ស្រុកមុខកំពូល ពេលជិះមកដល់ចំណុចកើតហេតុខាងលើ ក៍បានឃើញម៉ូតូរបស់ជនរងគ្រោះទុកនៅមុខផ្ទះ ស្ងាត់ ឃើញដូច្នេះជនសង្ស័យឈ្មោះរ័ត្នបានឲ្យសោរម៉ូតូចំនួន០៣គ្រាប់ ទៅជនសង្ស័យឈ្មោះ បូរ សុខហេង ទៅកាច់កម៉ូតូរបស់ជនរងគ្រោះ ដោយជនសង្ស័យពីរនាក់ទៀតជិះទៅឈប់ចាំនៅខាងមុខ ហើយជនសង្ស័យឈ្មោះ បូរ សុខហេង ក៍ចូលទៅកាច់កម៉ូតូរបស់ជនរងគ្រោះ ដេរបញ្ឆេះ ភ្លាមនោះជនរងគ្រោះឮសំឡេងបញ្ឆេះម៉ូតូ ក៍ចេញមកមើលឃើញជនសង្ស័យកំពុងឡើងជិះមូតូក៍រត់ទៅចាប់ទាញកន្ទុយម៉ូតូ ហើយស្រែកអោយគេជួយ ឮដូច្នេះអ្នកក្បែរខាងមកជួយ ហើយចាប់បានជនសង្ស័យឈ្មោះ បូរ សុខហេង ចំណែកជនសង្ស័យពីរនាក់ទៀតបានជិះម៉ូតូគេចខ្លួនបាត់។ បន្ទាប់មកជនរងគ្រោះបានតេទូរស័ព្ទរាយការណ៍ជូនសមត្ថកិច្ចប៉ុស្តិ៍នគរបាលរដ្ឋបាលសំបួរមាស។
នៅចំពោះមុខសមត្ថកិច្ច ជនសង្ស័យបានឆ្លើយសារភាពថា ខ្លួននឹងបក្សពួកចំនួនពីរនាក់ទៀត ពិតជាបានធ្វើសកម្មភាពលួចម៉តូរបស់ជនរងគ្រោះពិតប្រាកដមែន។ បច្ចុប្បន្នជនសង្ស័យបានឃាត់ខ្លួនបណ្តោះអាសន្ននៅអធិការដ្ឋាននគរបាលស្រុកមុខកំពូល។ ករណីនេះជំនាញនឹងប៉ុស្តិ៍កំពុងកសាងសំណុំរឿង ដើម្បីចាត់ការបន្តតាមនីតិវិធី៕
ប្រភព៖ នាយកដ្ឋានផ្សព្វផ្សាយអប់រំ
