កោះកុង៖ ថ្ងៃពុធ ២រោច ខែផល្គុន ឆ្នាំខាល ចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី៨ ខែមីនា ឆ្នាំ២០២៣ កម្លាំងជំនាញព្រហ្មទណ្ឌ អធិការដ្ឋាននគរបាលក្រុងខេមរភូមិន្ទ នៃស្នងការដ្ឋាននគរបាលខេត្តកោះកុង បានទទួលបណ្តឹងពីប្រជាពលរដ្ឋឈ្មោះ វណ្ណះ ជីង ភេទស្រី អាយុ១៨ឆ្នាំ មុខរបរសិស្ស មានទីលំនៅភូមិ០៤ សង្កាត់ដងទង់ ក្រុងខេមរភូមិន្ទ ថាកាលពីថ្ងៃទី ០៤ ខែមីនា ឆ្នាំ២០២៣ វេលាម៉ោង១៦:៣០នាទីល្ងាច មានជនមិនស្គាល់មុខ បានធ្វើសកម្មភាព ជិះម៉ូតូម៉ាក Wave RSX លួចឆក់យកទូរសព្ទដៃរបស់ខ្លួន នៅចំណុចផ្លូវបេតុងខាងត្បូងកាកបាទក្រហមខេត្ត ស្ថិតក្នុងភូមិ០១ សង្កាត់ស្មាច់មានជ័យ ក្រុងខេមរភូមិន្ទ រួចជិះរត់គេចខ្លួនបាត់ ។
បន្ទាប់ពីបានទទួលពាក្យបណ្តឹង ពីជនរងគ្រោះ កម្លាំងនគរបាលជំនាញ បានសហការជាមួយ កម្លាំងប៉ុស្តិ៍នគរបាលរដ្ឋបាល សង្កាត់ស្មាច់មានជ័យ និងសង្កាត់ដងទង់ រហូតឈានដល់ ឃាត់ខ្លួនមុខសង្ស័យ ១ នាក់ ឈ្មោះ ស៊ុន ស្រ៊ុយហេង ភេទប្រុស អាយុ២៩ឆ្នាំ មុខរបរ លាងម៉ូតូ មានទីលំនៅភូមិ០២ សង្កាត់ដងទង់ ក្រុងខេមរភូមិន្ទ ។ដកហូតវត្ថុតាង៖ ទូរសព្ទដៃ ១ គ្រឿង និងម៉ូតូ ១ គ្រឿង ។
បច្ចុប្បន្ន ករណីនេះ កម្លាំងជំនាញអធិការដ្ឋាននគរបាលក្រុងខេមរភូមិន្ទ នៃស្នងការដ្ឋាននគរបាលខេត្តកោះកុង កំពុងបំពេញសំណុំរឿងតាមនិតិវិធីច្បាប់ ៕
ប្រភព៖ នាយកដ្ឋានផ្សព្វផ្សាយអប់រំ
