ពោធិ៍សាត់៖ មនុស្សស្រី០២នាក់ រងរបួសធ្ងន់ស្រាល ដោយគ្រោះថ្នាក់ចរាចរណ៍ បើកម៉ូតូដួលខ្លួនឯង ករណីនេះកើតឡើង នៅលើផ្លូវក្រាលកៅស៊ូ ស្ថិតនៅភូមិស្រែឬស្សី ឃុំក្បាលត្រាច ស្រុកក្រគរ ខេត្តពោធិ៍សាត់ កាលពីវេលាម៉ោង ១៧និង៤០នាទីល្ងាចថ្ងៃទី២៦ខែកុម្ភះ ឆ្នាំ២០២៣ ។
ប្រភពព័ត៌មាននៅកន្លែងកើតហេតុ បានប្រាប់ឲ្យដឹងថា មុនពេលកើតហេតុ គេឃើញ មនុស្សស្រី០២នាក់ ជិះម៉ូតូមួយគ្រឿង ម៉ាកវ៉េវអាល់ហ្វា ពណ៌ខ្មៅ ពាក់ស្លាកលេខ ពោធិ៍សាត់ 1J.7716 ធ្វើចរាចរណ៍ក្នុងទិសដៅពីត្បូងទៅជើង ក្នុងល្បឿនយ៉ាងលឿន លុះមកដល់ចំណុចកើតហេតុ បានរេចង្កូតធ្លាក់ស្នាមភ្លោះ បណ្តាលឲ្យអ្នកបើកបរ និងអ្នករួមដំណើរ រងរបួសធ្ងន់ស្រាល និងខូចខាតម៉ូតូ០១គ្រឿង ។
លោកវរសេនីយ៍ទោ ត្រិញ ដុង អធិការរង នៃអធិការដ្ឋាននគរបាលស្រុកក្រគរ បានបញ្ជាក់ឲ្យដឹងថា មូលហេតុដែលបង្កអោយមានគ្រោះថ្នាក់ចរាចរណ៍នេះ គឺកត្តាប្រើប្រាស់ល្បឿន ចំពោះជនរងគ្រោះទី១ឈ្មោះ ហង្ស ស្រីងីម ហៅង៉ា ភេទស្រី អាយុ ៤១ឆ្នាំជនជាតិខ្មែរ ជាអ្នកបើកបរម៉ូតូ រងរបួសធ្ងន់ ទី២ឈ្មោះ រ៉េត ចាន់លីន ភេទស្រី អាយុ ០៩ឆ្នាំ ជនជាតិខ្មែរ ជាអ្នករួមដំណើរ រងរបួសស្រាល អ្នកទាំងពីរមានទីលំនៅក្នុងខ្សាច់ល្អិត ឃុំអន្សាចំបក់ ស្រុកក្រគរ ខេត្តពោធិ៍សាត់ ជនរងគ្រោះទាំងពីរនាក់ ត្រូវបានសមត្ថកិច្ចបញ្ជូនទៅសង្គ្រោះនៅមន្ទីរពេទ្យបង្អែកស្រុកក្រគរ ចំពោះវត្ថុតាងម៉ូតូ០១គ្រឿង យើងបានយកមករក្សាទុកនៅប៉ុស្តិ៍នគរបាល រដ្ឋបាលក្បាលត្រាច ជាបណ្ដោះអាសន្ន ៕
ប្រភព៖ នាយកដ្ឋានផ្សព្វផ្សាយអប់រំ
