សៀមរាប៖ ដោយអនុវត្តន៍តាមបទបញ្ជារបស់ លោកឧត្តមសេនីយ៍ទោ តេង ច័ន្ទណាត ស្នងការនគរបាលខេត្ត និងក្រោមការដឹកនាំរបស់លោកឧត្តមសេនីយ៍ត្រី ភឹង ចិន្តារ៉េត ស្នងការរង ទទួលផែននគរបាលព្រហ្មទណ្ឌ លោកឧត្តមសេនីយ៍ត្រី ណុប សារ៉ាក់ ស្នងការរងទទួលដឹកនាំការិយាល័យនគរបាលព្រហ្មទណ្ឌកម្រិតធ្ងន់ និងដោយមានការសម្របសម្រួលនីតិវិធី ពីឯកឧត្តម មាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្ត សៀមរាប នៅថ្ងៃទី០៨ ខែកុម្ភះ ឆ្នាំ ២០២៣ លោកវរសេនីយ៍ឯក សុខ ម៉េងអ៊ាង នាយការិយាល័យនគរបាលព្រហ្មទណ្ឌកម្រិតធ្ងន់ បានដឹកនាំកម្លាំងធ្វើការឃាត់ខ្លួនជនសង្ស័យ ចំនួន ០៤នាក់ ១.ឈ្មោះ ធី សុខា ភេទស្រី អាយុ ២៣ឆ្នាំ បុគ្គលិកការ៉ាសាំង ២.ឈ្មោះ ផន ឆានុន ភេទប្រុស អាយុ ២២ឆ្នាំ បុគ្គលិកការ៉ាសាំង ៣. ឈ្មោះ ជឿន សាវេត ភេទប្រុស អាយុ ២០ឆ្នាំ បុគ្គលិកការ៉ាសាំង ៤.ឈ្មោះ មុយ វីរៈ ភេទប្រុស អាយុ ២០ឆ្នាំ បុគ្គលិកការ៉ាសាំង អ្នកទាំង០៤ ស្នាក់នៅបច្ចុប្បន្នភូមិវត្តបូព៌ សង្កាត់សាលាកំរើក ក្រុង.ខេត្តសៀមរាប ពាក់ព័ន្ធករណី: ប៉ុនប៉ងឃាតកម្ម និងរក្សាទុក ប្រើប្រាស់ដោយខុសច្បាប់នូវសារធាត់ញៀន កាលពីវេលាម៉ោង ២២ និង៣០នាទី ថ្ងៃទី០៧ ខែមករា ឆ្នាំ ២០២៣ លើផ្លូវកៅស៊ូមុខការ៉ាសសាំងយីហោLXR វត្តបូព៌ ស្ថិតភូមិវត្តបូព៌ សង្កាត់សាលាកំរើក ក្រុង.ខេត្តសៀមរាប ។
អង្គហេតុ៖ នៅល្ងាចថ្ងៃទី០៧ ខែកុម្ភះ ឆ្នាំ២០២៣ វេលាម៉ោង ១៧និង០០នាទី ឈ្មោះ ផន ឆានុន ភេទប្រុស អាយុ ២២ឆ្នាំ ចាំបានថាឈ្មោះ ធី សុខា ភេទស្រី អាយុ ២៣ឆ្នាំ ជាសង្សារបស់ខ្លួនមានទំនាក់ទំងស្នេហាតាមរយៈហ្វេសប៊ុកជាមួយជនរងគ្រោះ ឈ្មោះ ចិត សារ ភេទប្រុស អាយុ ២២ឆ្នាំ រស់នៅភូមិតាភុល សង្កាត់ស្វាយដង្គំ ហើយឈ្មោះ ផន ឆានុន បានឲ្យសង្សារបស់ខ្លួនឈ្មោះ ធី សុខា ឆាតណាត់ឈ្មោះ ចិត សារ មកទទួលដើម្បីចេញទៅហូបអីជុំគ្នានៅចំណុចបឹងកាឡូ ដោយរូបគេ បានត្រៀមកាំបិតតាំងតោ និងខ្សែក្រវ៉ាត់ ជាស្រេច លុះដល់វេលាម៉ោង ២២និង៣០នាទី ថ្ងៃ.ខែ.ឆ្នាំដដែល ស្រាប់តែឃើញជនរងគ្រោះបើកម៉ូតូម៉ាកទ្រីមពណ៌ខ្មៅ ជិះមកតែម្នាក់ឯង មកមុខការ៉ាសសាំង យីហោ LXR វត្តបូព៌ (ជាកន្លែងធ្វើការរបស់ជនសង្ស័យ) ហើយឈ្មោះ ធី សុខា បានចេញមកជួបជន រងគ្រោះ ភ្លាមនោះជនសង្ស័យឈ្មោះ ផន ឆានុន និងបក្ខពួក ប្រដាប់ដោយកាំបិត តាំងតោ និងខ្សែក្រាវ៉ាត បានដេញកាប់ជនរងគ្រោះ តែជនរងគ្រោះឃើញទាន់ក៏ផ្តួលម៉ូតូរត់តែម្តង ។
ក្រោយពេលកើត ហេតុ កម្លាំងការិយាល័យនគរបាលព្រហ្មទណ្ឌកម្រិតធ្ងន់ សហការណ៍ជាមួយកម្លាំងអន្តរាគមន៍ ធ្វើការឃាត់ខ្លួនជនសង្ស័យទាំង ០៤នាក់ខាងលើ យកមកធ្វើការសាកសួរ នៅចំពោះមុខសម្ថកិច្ច ជនសង្ស័យទង ០៤នាក់ខាងលើ បានឆ្លើយសារភាពថា ពួកខ្លួន ពិតជាបានធ្វើសកម្មភាព ករណីខាងលើនេះ ពិតប្រាកដមែន ។
វត្ថតាងដែលសមត្ថកិច្ចធ្វើការដកហូតបានរួមមាន៖ កាំបិតតាំងតោចំនួន ២ដើម, ដំបងដែកទីប ចំនួន ១ដើម, ខ្សែក្រវ៉ាត់ចំនួន១ រួមជាមួយនូវឧបករណ៍ប្រើប្រាស់គ្រឿងញៀនមានដូចជា ដែកកេះ, បំពង់បឺត ដបទឹកសុទ្ធ និងថ្នាំញៀនមួយកញ្ចប់តូច និងទូរស័ព្ទដៃម៉ាក OPPO ផ្ទុកស៊ីមកាតលេខៈ ០៣១៤៩៧២៤៦៤ (ប្រើសម្រាប់ឆាតណាត់ជនរងគ្រោះ) ។ ជនសង្ស័យទាំង ០៤នាក់ខាងលើ ត្រូវបានកម្លាំងជំនាញ កសាងសំណុំរឿង បញ្ជូនទៅតុលាការ ចាត់ការទៅតាមផ្លូវច្បាប់៕
ប្រភព៖ ការិយាល័យនគរបាលព្រហ្មទណ្ឌកំរិតធ្ងន់ នៃស្នងការដ្ឋាននគរបាលខេត្តសៀមរាប
