កំពង់ស្ពឺ ៖ កាលពីថ្ងៃទី២៨ ខែមករា ឆ្នាំ២០២៣ វេលាម៉ោង១៨និង ៤០នាទី នៅលើផ្លូវលេខ1KS2 ត្រង់ចំណុចស្ពានតាស៊ឹម ភូមិរលាំងថ្លើង ឃុំរុងរឿង ស្រុកថ្ពង ខេត្តកំពង់ស្ពឺ មានករណីគ្រោះថ្នាក់ចរាចរណ៍រវាងម៉ូតូនិងរថយន្តបណ្តាលឲ្យស្លាប់មនុស្សម្នាក់ ។
តាមការបញ្ជាក់ពីសមត្ថកិច្ច បានអោយដឹងថា មុនពេលកើតហេតុ មានម៉ូតូ ១គ្រឿងម៉ាកហុងដាឌ្រីម C125 ពណ៌ខ្មៅ ស៊េរីឆ្នាំ ២០២០ ពាក់ស្លាកកលេខ ភ្នំពេញ 1IJ-4103 អ្នកបើកបរឈ្មោះ សួន តាក់ ភេទប្រុស អាយុ៣២ឆ្នាំ (ពាក់មួកសុវត្ថិភាព) រស់នៅភូមិទឹកលង១ ឃុំរុងរឿង ស្រុកថ្ពង ខេត្តកំពង់ស្ពឺ បើកបរក្នុងល្បឿនលឿនពីទិសខាងជើង ទៅទិសខាងត្បូង មកដល់ចំណុចខាងលើ បានឆ្លងចំណែកផ្លូវទៅបុកពីមុខរថយន្ត ១គ្រឿងម៉ាក TOYOTA VITZ ពណ៌ស ពាក់ស្លាកលេខ ភ្នំពេញ 2BN-3995 ដែលកំពុងបើកបរពីបញ្ច្រាសទិសគ្នា ហើយអ្នកបើកបរ បានរត់គេចខ្លួនបាត់ មិនស្គាល់អត្តសញ្ញាណ និងមិនស្គាល់អាសយដ្ឋាន ។ ករណីនេះបណ្តាលឲ្យស្លាប់អ្នកបើកបរម៉ូតូឈ្មោះ សួន តាក់ នៅកន្លែងកើតហេតុ សមត្ថកិច្ចជំនាញបានធ្វើកំណត់ហេតុប្រគល់សាកសពជូនក្រុមគ្រួសារដើម្បីយកទៅធ្វើបុណ្យតាមប្រពៃណី ។
-អ្នកបើកបររថយន្តក្រោយពេលកើតហេតុ បានចុះរត់គេចខ្លួនបាត់។
-ចំពោះវត្ថុតាងទាំង២គ្រឿងខាងលើ បានយកមករក្សាទុក នៅធិការដ្ឋាននគរបាលស្រុកថ្ពង ដើម្បីចាត់ការតាមនីតិវិធី៕
ប្រភព៖ អគ្គស្នងការដ្ឋាននគរបាលជាតិ
