ភ្នំពេញ៖ សេចក្តីបកស្រាយបំភ្លឺ និងបដិសេធរបស់ក្រុមការងារព័ត៌មាន និងប្រតិកម្មរហ័សរបស់ការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ លើអាខោនហ្វេសប៊ុកឈ្មោះថា Tulip Mar ដែលបានឡាយផ្ទាល់ថា រថយន្តពន្លត់អគ្គិភ័យទៅដល់អត់ធ្វេីការបាញ់ទឹកពន្លត់ ដែលការឡាយនេះធ្វេីអោយមហាជនមានការយល់ច្រឡំមកលេីសមត្ថកិច្ចយេីង ដែលករណីអគ្គិភ័យឆាបឆេះខាងលេីនេះ ដែលស្ថិតក្នុងតាមបណ្តោយផ្លូវព្រះសុធារស កែងផ្លូវព្រះនរោត្តម សង្កាត់ទន្លេសាបាក់ ខណ្ឌចំការមន រាជធានីភ្នំពេញ នាថ្ងៃទី៣១ ខែធ្នូ ឆ្នាំ២០២២នេះ។
ការិយាល័យនគរបាលបង្ការពន្លត់អគ្គិភ័យ និងសង្គ្រោះ សូមធ្វើការបកស្រាយបំភ្លឺ និងបដិសេធចំពោះអាខោនហ្វេសប៊ុកឈ្មោះថា Tulip Mar ដែលបានឡាយផ្ទាល់ និងធ្វេីឲ្យប្រជាពលរដ្ឋមានការយល់ច្រឡំ ជាពិសេសមានបំណងអាក្រក់បំពុលបរិយាកាសដល់សង្គមជាតិ។
សូមបញ្ជាក់ជូនសាធារណៈជនមេត្តាជ្រាប ចំពោះករណីគ្រោះអគ្គិភ័យខាងលេីនេះ គឺកម្លាំងសមត្ថកិច្ចរបស់យេីងបានទៅដល់ទីតាំងកេីតហេតុភ្លាម និងបានអន្តរាគមន៍បាញ់ទឹកពន្លត់ភ្លាមៗ មិនមែនដូចពាក្យនិយាយក្នុងការឡាយផ្ទាល់នោះឡេីយ។
សូមម្ចាស់អាខោនហ្វេសប៊ុកឈ្មោះថា Tulip Mar ខាងលេីនេះ ចូលខ្លួនមកបំភ្លឺនៅការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការនគរបាលរាជធានីភ្នំពេញ ជាបន្ទាន់ បើពុំដូច្នោះទេ កងកម្លាំងសមត្ថកិច្ចនគរបាលយេីង និងចាត់វិធានការតាមផ្លូវច្បាប់ផងដែរ៕
ប្រភព៖ ការិយាល័យបង្ការពន្លត់អគ្គិភ័យ និងសង្គ្រោះ នៃស្នងការនគរបាលរាជធានីភ្នំពេញ
