កោះកុង ៖ នៅថ្ងៃទី២៩ ខែធ្នូ ឆ្នាំ២០២២ វេលាម៉ោង១៨និង០០នាទី នៅចំណុច ស្ថានីយ៍ប្រេងឥន្ទនៈ ToTal ស្ថិតក្នុងភូមិ០១ សង្កាត់ស្មាច់មានជ័យ មានករណីឆក់(មិនបានសម្រេច)បង្កឡើងដោយជនសង្ស័យ០២នាក់ ហើយត្រូវបានសមត្ថកិច្ចស្រាវជ្រាវឃាត់ខ្លួន បន្ទាប់ពីធ្វើសកម្មភាព ។
ជនសង្ស័យមានឈ្មោះ ញ៉ាញ់សុជាតិ ភេទប្រុស អាយុ២១ ឆ្នាំ សញ្ជាតិខ្មែរ មុខរបរអ្នកដឹកជញ្ជូនអីវ៉ាន់ មានទីលំនៅសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញនិងឈ្មោះ ជា សាម៉ីឌី ភេទប្រុស អាយុ២២ឆ្នាំ សញ្ជាតិខ្មែរ មុខរបរអ្នកដឹកជញ្ជូនអីវ៉ាន់ មានទីលំនៅភូមិសាមគ្គីសង្កាត់ចោមចៅ ខណ្ឌចោមចៅ រាជធានីភ្នំពេញ ។ ជនសង្ស័យត្រូវបានប្រជាពលរដ្ឋនិងសមត្ថកិច្ចនៃអធិការដ្ឋានក្រុងខេមរភូមិន្ទដេញ និងឃាត់ខ្លួនបាននៅចំណុចផ្លូវបំបែកទៅអូរស្រីស្រណោះ ស្ថិតក្នុងភូមិបឹងឃុនឆាង សង្កាត់ស្មាច់មានជ័យ វេលាម៉ោង១៨:៣០នាទី នាថ្ងៃខែឆ្នាំដដែល។
វត្ថុតាងដកហូតមាន ៖ ម៉ូតូមួយគ្រឿងម៉ាកsuzuki nex ពណ៌ស ស្លាកលេខ ភ្នំពេញ1IV- 6718។
ករណីនេះ កម្លាំងអធិការដ្ឋាននគបាលក្រុង បានកសាងសំណុំរឿងបញ្ជូនមកការិយាល័យជំនាញ នៃស្នងការដ្ឋាននគរបាលខេត្តចាត់ការតាមនីតិវិធី ៕
ប្រភព៖ អគ្គស្នងការដ្ឋាននគរបាលជាតិ
