ភ្នំពេញ៖ កាលពីម៉ោងប្រមាណ ១០:២០នាទីយប់ ថ្ងៃទី២៣ ខែធ្នូ ឆ្នាំ២០២២ មានករណីគ្រោះថ្នាក់ចរាចរណ៍មួយបានកើតឡើងនៅចំនុចបណ្ដោយផ្លូវជាតិលេខ៤ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ បណ្តាលអោយមានស្លាប់ម្នាក់ និងរបួសធ្ងន់ ២នាក់។
បើយោងតាមប្រភពពីកន្លែងកើតហេតុបានអោយដឹងថា មានយុវជនពីរនាក់ជិះម៉ូតូ ឌ្រីមសង់ ពាក់ស្លាកលេខ កំពង់ធំ ២J-៨៩៦០ ដែលជិះបញ្រ្ចាសទិស ក៏ត្រូវបានបុរសម្នាក់ទៀតជិះម៉ូតូ ឌ្រីមសង់ ពាក់ស្លាកលេខ ភ្នំពេញ ១IP-៦៣៦០ បុកពេញទំហឹង បណ្ដាលឲ្យយុវជនម្នាក់ស្លាប់ និងពីរនាក់រងរបួសធ្ងន់។
ក្រោយកេីតហេតុសមត្ថកិច្ចជំនាញចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ បានចុះមកធ្វេីការវាស់វែង និងយកម៉ូតូទាំងពីរ ទៅរក្សាទុករងចាំការដោះស្រាយនៅពេលក្រោយ។ ដោយឡែកសពជនរងគ្រោះត្រូវបានប្រគល់អោយសាច់ញាតិ ដើម្បីយកទៅធ្វើបុណ្យតាមប្រពៃណី៕
