ពោធិ៍សាត់៖កាលពីថ្ងៃពុធទី២៨ ខែកញ្ញា ឆ្នាំ២០២២ វេលាម៉ោង១១និង៥០នាទី មានករណីគ្រោះថ្នាក់ចរាចរណ៍រថយន្តបុកកុមារីកំពុងដើរឆ្លងផ្លូវបណ្ដាលឲ្យស្លាប់ ហេតុការណ៍នេះកើតឡើងនៅចំណុចលើផ្លូវជាតិលេខ៥ ចន្លោះគីឡូម៉ែត្រ១៦៧-១៦៨ ស្ថិតនៅភូមិត្រពាំងកន្ទួត ឃុំបឹងកន្ទួត ស្រុកក្រគរ ខេត្ដពោធិ៍សាត់ បង្កឲ្យមានការភ្ញាក់ផ្អើលដល់ប្រជាពលរដ្ឋនិងសមត្ថកិច្ចចុះទៅដល់កន្លែងកើតហេតុ។
ប្រភពព័ត៌មាននៅកន្លែងកើតហេតុ បានឲ្យដឹងថា មុនពេលកើតហេតុគេឃើញមានរថយន្ត០១គ្រឿងម៉ាកឡិចសុីស330 ពណ៌សរ ពាក់ស្លាកលេខភ្នំពេញ 2AP-8648 បើកបរដោយឈ្មោះ ងឹន ច័ន្ទវិរះ ភេទប្រុស អាយុ២៧ឆ្នាំ ជនជាតិខ្មែរ រស់នៅភូមិផ្សារឆ្នាំង ឃុំផ្សារឆ្នាំង ក្រុងកំពង់ឆ្នាំង ខេត្តកំពង់ឆ្នាំង ធ្វើចរាចរណ៍ពីកើតទៅលិច លុះបើកមកដល់ចំណុចកើតហេតុខាងលើ បានបុកកុមារីកំពុងដើរឆ្លងផ្លូវយ៉ាងពេញទំហឹងបណ្ដាលឲ្យស្លាប់ភ្លាមៗនៅកន្លែងកេីតហេតុ កុមារីរងគ្រោះមានឈ្មោះ សុខ សៀវហ្វុង ភេទស្រី អាយុ៦ឆ្នាំ ជនជាតិខ្មែរ មានទីលំនៅភូមិត្រពាំងកន្ទួត ឃុំ បឹងកន្ទួត ស្រុកក្រគរ ខេត្ដពោធិ៍សាត់ (ស្លាប់)។ចំពោះសាកសពកុមារីខាងលើត្រូវបានសមត្ថកិច្ចធ្វើកំណត់ហេតុប្រគល់ឲ្យទៅក្រុមគ្រួសារសាច់ញាតិយកទៅធ្វើបុណ្យតាមប្រពៃណី។
លោកវរសេនីយ៍ទោ មោក ភារម្យ អធិការនគរបាលស្រុកក្រគរបានឲ្យដឹងថា បន្ទាប់ពីកម្លាំងនគរបាលជំនាញចរាចរណ៍បានចុះទៅពិនិត្យនិងធ្វើការវាស់វែងរួចហើយ បានសន្និដ្ឋានថាករណីគ្រោះថ្នាក់ចរាចរណ៍នេះបណ្ដាលមកពីកត្តាល្បឿន អ្នកបេីកបររថយន្តខ្វះការប្រុងប្រយ័ត្ន។
ចំពោះរថយន្តសមត្ថកិច្ចបញ្ជូនមកការិយាល័យចរាចរណ៍ខេត្តពោធិ៍សាត់ ជាបណ្ដោះអាសន្ន រង់ចាំការដោះស្រាយតាមនីតិវិធី ៕
ប្រភព៖ អគ្គស្នងការដ្ឋាននគរបាលជាតិ
