បន្ទាយមានជ័យ ៖ កម្លាំងអធិការដ្ឋាននគរបាលស្រុកថ្មពួក សហការជាមួយនគរបាលក្រុងប៉ោយប៉ែត ឃាត់ខ្លួនជនសង្ស័យ០១នាក់បញ្ជូនខ្លួនមកស្នងការដ្ឋាននគរបាលខេត្តបន្ទាយមានជ័យ ពាក់ព័ន្ធករណី រំលោភលើសេចក្តីទុកចិត្ត ប្រព្រឹត្តកាលពីវេលាម៉ោង០៦យប់ ថ្ងៃទី០៤ ខែ សីហា ឆ្នាំ២០២២ នៅភូមិគោកកឋិន ឃុំគោកកឋិន ស្រុកថ្មពួក ខេត្តបន្ទាយមានជ័យ ។
សមត្ថកិច្ចបានឲ្យដឹងថា ជនសង្ស័យឈ្មោះ ឈូក ងើយស្រីនិន ភេទប្រុស អាយុ៣៣ឆ្នាំ ជាមិត្តភ័ក្តិនឹងជនរងគ្រោះ(ម្ចាស់ម៉ូតូ) រស់នៅភូមិ២ ឃុំកំពង់ស្វាយ ក្រុងសិរីសោភ័ណ្ឌ ខេត្តបន្ទាយមានជ័យ(សមត្ថកិច្ចឃាត់ខ្លួននៅថ្ងៃទី០៣ ខែកញ្ញា ឆ្នាំ២០២២) ។
សមត្ថកិច្ចបន្តថា នៅវេលាម៉ោង០៦យប់ថ្ងៃទី០៤ ខែសីហា ឆ្នាំ២០២២ ជនសង្ស័យបានខ្ទីម៉ូតូរបស់ឈ្មោះ ឈួ កក្តដា ភេទប្រុស អាយុ២៨ឆ្នាំ រស់នៅភូមិគោកកឋិន ឃុំគោកកឋិន ស្រុកថ្មពួក ខេត្តបន្ទាយមានជ័យ ម៉ាកហុងដា C125 ពណ៌ខ្មៅ ស៊េរីឆ្នាំ២០០៧ ពាក់ស្លាកលេខភ្នំពេញ 1P-7642 ជិះទៅលេងបងប្អូនមួយថ្ងៃ បន្ទាប់មកស្រាប់តែមិនឃើញ ឈូក ងើយស្រីនិន យកម៉ូតូមកឲ្យវិញ ។
នគរបាលបានបញ្ជាក់ថា បន្ទាប់មកម្ចាស់ម៉ូតូបានទូរស័ព្ទសួរ តែ ឈូក ងើយស្រីនិន សន្យាពន្យារពេលថ្ងៃនេះ ថ្ងៃនោះ ។ ព្រោះតែជឿទុកចិត្តមិត្តភក្តិ មិនបានដាក់បណ្តឹងនោះទេ ។ ដោយការនិយាយកុហកច្រើនដងពេក ម្ចាស់ម៉ូតូបានស្រាវជ្រាវនិងរកឃើជនសង្ស័យ គេចខ្លួនទៅរស់នៅក្រុងប៉ោយប៉ែត ហើយក៏បានសួនាំរកម៉ូតូ ទើបដឹងថាម៉ូតូនោះគេយកទៅបញ្ចាំយកលុយចាយវាយអស់ ។ នៅថ្ងៃទី០២ ខែកញ្ញា ឆ្នាំ២០២២ ក្រោយដឹងថា មិត្តភ័ក្តិរបស់ខ្លួនស៊ីដាច់ម៉ូតូ ទើបប្តឹងឲ្យសមត្ថកិច្ចជួយអន្តរាគមន៍ ពេលនោះកម្លាំងនគរបាលជំនាញស្រុកថ្មពួក សហការជាមួយកម្លាំងនរបាលជំនាញ ក្រុងប៉ោយប៉ែត ធ្វើការឃាត់ខ្លួន ជនសង្ស័យមកសួរនាំ ។
នគរបាលស្រុកថ្មពួក បានបន្ថែមទៀតថា ជនសង្ស័យឈ្មោះឈូក ងើយស្រីនិន បានសារភាពថា៖ខ្លួនពិតជាមានចេតនាបានយកម៉ូតូមិត្តភ័ក្តិរបស់ខ្លួននោះទៅបញ្ចាំ នៅក្លឹបថេកដោន បានប្រាក់ចំនួន១០.០០០បាត(មួយម៉ឺនបាត) ហើយយកលុយផឹកស៊ី និងប្រើប្រាស់គ្រឿងញៀនអស់ ។
ជនសង្ស័យក្រោយពីទទួទលបានចម្លើយតសារភាព ត្រូវបានកម្លាំងនគរបាលជំនាញអធិការដ្ឋាននគរបាលស្រុកថ្មពួក រៀបចំសំណុំរឿងបញ្ជូនទៅស្នងការដ្ឋាន នគរបាលខេត្តបន្ទាយមានជ័យ ចាត់ការតាមនីតិវិធី ។ ដោយឡែកម៉ូតូរបស់ជនរងគ្រោះ សមត្ថកិច្ចនៅមិនទាន់មានចំណាត់ការនៅឡើងនោះទេ ព្រោះលិខិតបញ្ចាំត្រូវជនសង្ស័យធ្វើជ្រុះបាត់ ៕
ប្រភព៖ អគ្គស្នងការដ្ឋាននគរបាលជាតិ
