កំពង់ស្ពឺ ៖ ក្រោមកិច្ចចង្អុលការណែនាំពីលោកឧត្ដមសេនីយ៍ទោ សម សាមួន ស្នងការនគរបាលខេត្ដកំពង់ស្ពឺ នៅថ្ងៃសុក្រ ទី០២ ខែកញ្ញា ឆ្នាំ២០២២ កម្លាំងជំនាញប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលខេត្ដកំពង់ស្ពឺ ដោយមានការសម្របសម្រួលនីតិវិធី ពីលោក ចក់ សម្បត្តិ ព្រះរាជអាជ្ញារង នៃអយ្យការអមសាលាដំបូងខេត្ដកំពង់ស្ពឺ បានធ្វើការចុះបង្ក្រាបករណីសញ្ចារកម្ម នៅទីតាំង KTV និងបើកផ្ទះសំណាក់ គ្មានយីហោ ស្ថិតនៅភូមិទី៤ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ ។
ប្រតិបត្តិការខាងលើ សមត្ថកិច្ចបានទទួលព័ត៌មានពីប្រភពច្បាស់ការថាទីតាំង KTV នេះបើកបម្រើសេវាច្រៀងលេងកំសាន្ដផង និងលួចលាក់អោយមានការផ្ដល់សេវាផ្លូវភេទ(ពាក្យច្បាប់”សញ្ចារកម្ម”) ជាក់ស្ដែងសមត្ថកិច្ចបានឃាត់មនុស្ស០៣នាក់ ដែលជាអ្នកទទួលខុសត្រូវលើទីតាំងខាងលើ ដើម្បីយកមកសាកសួរនៅស្នងការដ្ឋាននគរបាលខេត្ដ ។
តាមការបញ្ជាក់ពីលោកស្រី វរសេនីយ៍ទោ មួន មល្លិកា នាយការិយាល័យប្រឆាំងការជួញដូរមនុស្ស និងការពារអនីតិជន ឲ្យដឹងថា ជនសង្ស័យក្នុងការទទួលខុសត្រូវចំពោះទីតាំងខាងលើ០៣នាក់មានឈ្មោះ ៖ ១-ឈ្មោះ សួង ស្រីអូន ភេទស្រី អាយុ៣៣ឆ្នាំ ជាថៅកែហាង ។ ២- ឈ្មោះ ទាវ ស្រីមុំ ភេទស្រី អាយុ១៨ឆ្នាំ ជាមេការ និង៣-ឈ្មោះ អាន ស្រីមុំ ភេទស្រី អាយុ ៣៣ឆ្នាំ ជាមេការ ។ ជាមួយគ្នានោះ បានរំដោះសង្គ្រោះនារីចំនួន០៧នាក់ ក្នុងនោះមានក្មេងស្រី មិនទាន់គ្រប់អាយុ(ជាអនីតិជនក្រោម១៨ឆ្នាំ)ចំនួន០៤នាក់ ប្រគល់ជូនមន្ទីរសង្គមកិច្ច។
ក្រោយនីតិវិធីសាកសួរលើជនសង្ស័យទាំង៣នាក់ សមត្ថកិច្ចរកឃើញតម្រុយពីការប្រព្រឹត្តិអោយមានអំពើសញ្ចារកម្ម(បម្រើសេវាផ្លូវភេទ)នៅទីតាំងខាងលើ សមត្ថកិច្ចនគរបាលបានបំពេញនីតិវិធី កសាងសំណុំរឿងបញ្ជូនទៅអយ្យការចាត់ការបន្ដ ៕
ប្រភព៖ អគ្គស្នងការដ្ឋាននគរបាលជាតិ
