តបាត់ដំបង ៖ កាលពីថ្ងៃទី២១ ខែកក្កដា ឆ្នាំ២០២២ វេលាម៉ោង២២ និង០៩នាទី អនុវត្តតាមយោបល់ដឹកនាំរបស់លោកឧត្តមសេនីយ៍ទោ សាត គឹមសាន ស្នងការ នៃស្នងការដ្ឋាននគរបាលខេត្តបាត់ដំបង រួមនឹងយោបល់លោកវរសេនីយ៍ឯក លឹម ពុទ្ធីឡា ស្នងការរងផែនការងារនគរបាលព្រហ្មទណ្ឌ លោកវរសេនីយ៍ឯក ឈឿន គឹមស៊ុង នាយការិយាល័យព្រហ្មទណ្ឌកំរិតស្រាល បានដឹកនាំកម្លាំងក្រុមអន្តរាគមន៍បង្ការបង្ក្រាប សហការជាមួយកម្លាំងអធិការដ្ឋាននគរបាលក្រុងប៉ោយប៉ែត ចុះប្រតិបត្តិការបង្ក្រាបករណីលួចមានស្ថានទម្ងន់ទោស (ប្រេីប្រាស់កាំបិតខ្វែវកាប់ប្លន់យកម៉ូតូ) ០១ករណី ត្រង់ចំណុចបេនឡាន ភូមិបាលិលេយ្យ២ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ និងបានធ្វេីការនាំខ្លួនជនសង្ស័យចំនួន ០១នាក់ ឈ្មោះ ហម ហៀ ហៅ ភូ ភេទប្រុស អាយុ ១៧ឆ្នាំ មានទីលំនៅក្នុងក្រុងប៉ោយប៉ែត ខេត្តបន្ទាយមានជ័យ ។
ក្រោយពីបានធ្វេីការសាកសួររួច កម្លាំងសមត្ថកិច្ចបានបន្តធ្វេីការស្រាវជ្រាវរហូតដល់ថ្ងៃទី២៣ ខែកក្កដា ឆ្នាំ២០២២ វេលាម៉ោង២២ និង២០នាទី ត្រង់ចំណុចភូមិកាប់គោថ្មី សង្កាត់អូរចារ ក្រុងបាត់ដំបង ខេត្តបាត់ដំបង កម្លាំងយេីងបានធ្វេីការនាំខ្លួនជនសង្ស័យចំនួន ០២នាក់ទៀត មកកាន់ស្នងការដ្ឋាន ១-ឈ្មោះ ទី ស៊ីឡុង ហៅ បញ្ញា ទី ភេទប្រុស អាយុ ២២ឆ្នាំ មានទីលំនៅភូមិព្រៃព្រិច សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ និង២-ឈ្មោះ ហួរ រ៉ា ហៅ សី ភេទប្រុស អាយុ ១៧ ឆ្នាំ មានទីលំនៅមិនពិតប្រាកដ ។
ជនសង្ស័យទាំង០៣នាក់ខាងលេី រួមជាមួយបក្សពួកជាច្រេីននាក់ទៀតដែលកំពុងរត់គេចខ្លួន បានធ្វេីសកម្មភាពប្រេីប្រាស់កាំបិតខ្វែវកាប់ទៅលេីជនរងគ្រោះចំនួន ០៣ករណី នៅក្នុងស្រុកបវេល ០២ករណី បានម៉ូតូចំនួន ០២គ្រឿង និងនៅក្នុងស្រុកថ្មគោលចំនួន ០១ករណី បានម៉ូតូចំនួន ០២គ្រឿងទៀត ។
វត្ថុតាងដកហូតរួមមាន ៖
-ម៉ូតូម៉ាក ហុងដា Scoopy ពណ៌ខៀវ ស៊េរីឆ្នាំ២០១៩ គ្មានស្លាកលេខចំនួន ០១គ្រឿង (ជាម៉ូតូជិះធ្វេីសកម្មភាព)
-ម៉ូតូម៉ាកហុងដា Click ពណ៌ស ស៊េរីឆ្នាំ២០១៩ លេខតួម៉ាស៊ីន MLHJF350XK5572872 ពាក់ស្លាកលេខ បាត់ដំបង 1AB-0825 (ជាម៉ូតូរបស់ជនរងគ្រោះ)
-កាំបិតខ្វែវចំនួន ០១ដេីម ។
បច្ចុប្បន្ន កម្លាំងនគរបាលការិយាល័យជំនាញកំពុងធ្វេីការកសាងសំណុំរឿងបញ្ជូនទៅសាលាដំបូងខេត្តបាត់ដំបង ដេីម្បីចាត់ការបន្តតាមនីតិវិធីច្បាប់ ៕
ប្រភព៖ អគ្គស្នងការដ្ឋាននគរបាលជាតិ
