បន្ទាយមានជ័យ ៖ បុរសម្នាក់ត្រូវសមត្ថកិច្ចនគរបាលឃាត់ខ្លួន បន្ទាប់ពីធ្វើសកកម្មភាពលួចរថយន្តរបស់វត្តយកទៅលក់ ហើយបានជួបនឹងកម្លាំងនគរបាលការពារព្រំដែនគោកលេខ៨០៧ ល្បាតនៅពេលយប់មានការសង្ស័យក៏ធ្វើការឃាត់ខ្លួនយកទៅសួរនាំ ។ ការឃាត់ខ្លួននេះ ធ្វើឡើងនៅវេលាម៉ោង១៩និង៣០នាទី ថ្ងៃទី១៩ ខែកក្កដា ឆ្នាំ២០២២ ចំណុចអង់តែនក្រុមហ៊ុនមិត្តហ្វូងផ្លូវទៅដើមក្រឡាញ់ ស្ថិតក្នុងភូមិសាស្ត្រ ឃុំគោករមៀត ស្រុកថ្មពួក ខេត្តបន្ទាយមានជ័យ ។
លោកវរសេនីយ៍ឯក ឡុង សំណាង មេបញ្ជាការនគរបាលវរសេនាតូចការពារព្រំដែនគោកលេខ៨០៧ បានឲ្យដឹងថា ជនសង្ស័យមានឈ្មោះ ផាត វ៉ានី អាយុ៣៤ឆ្នាំ ជនជាតិខ្មែរ មុខរបរកម្មករ បច្ចុប្បន្ន ស្នាក់នៅភូមិរំសៃ ឃុំថាប់ស្តេត ស្រុកតាប្រាយ៉ា ខេត្តស្រះកែវ ប្រទេសថៃ ។
លោកមេបញ្ជាការបានបញ្ជាក់ថា នៅវេលាម៉ោង០៧និង៣០នាទីយប់ថ្ងៃទី១៩ ខែកក្កដា កម្លាំងប៉ុស្តិ៍អូរកំបុតចំនួន០៣នាក់ ដឹកនាំដោយលោកអនុសេនីយ៍ទោ ប៉ុក រតនា នាយរងប៉ុស្តិ៍បានធ្វើការល្បាតតាមផ្លូវព្រំដែន ក្នុងភូមិសាស្ត្រដែលខ្លួនទទួលខុសត្រូវ បានប្រទះឃើញរថយន្ត១គ្រឿង ម៉ាក Luxus RX300 ពណ៌ទឹកមាស ពាក់ស្លាកលេខ ភ្នំពេញ 2AK-3150 ឈប់ចតចោលនៅលើបណ្តោយផ្លូវលេខ៥៨ ត្រង់ចំណុចអង់តែនក្រុមហ៊ុនមិត្តហ្វូនផ្លូវទៅដើមក្រឡាញ់ ដោយមានរយៈពេលយូរក៏ទៅសួរនាំម្ចាស់រថយន្ត ក្រែងមានអ្វីអាចឲ្យជួយ ។ ម្ចាស់រថយន្តបានឆ្លើយថា ចង់លក់ឡានតម្លៃ៣០០,០០០បាត(បីសែនបាត) ។ ឮដូច្នេះកម្លាំងមានការសង្ស័ក៏បាននាំខ្លួនបញ្ជូនមកទីបញ្ជាការដ្ឋានវរសេនាតូចការរពារព្រំដែនគោកលេខ៨០៧ ដើម្បីសាកសួរព័ត៌មានជុំវិញករណីចង់លក់ឡានទាំងយប់នេះ ។
លោកមេបញ្ជាការវរសេនាតូចការពារព្រំដែនគោកលេខ៨០៧ បានបញ្ជាក់ទៀតថា ក្រោយសួរនាំជនសង្ស័យបានសារភាពថា ខ្លួនបានលួចយករថយន្តរបស់ព្រះសង្ឃនៅវត្តមួយនៅក្រុងប៉ោយប៉ែត យកមកលក់ ។
ក្រោយពីទទួលបានចម្លើយសារភាព និងមានបទបហញ្ជាពីលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ កម្លាំងនគរបាលវរសេនាតូចបានឃាត់ខ្លួនមនុស្សនិងរថយន្ត រួចប្រគល់ឲ្យកម្លាំងនគរបាលនៃអធិការដ្ឋាននគរបាលក្រុងប៉ោយប៉ែត នៅថ្ងៃទី២០ ខែកក្កដា ឆ្នាំ២០២២ ដើម្បីចាត់ការបន្តតាមនីតិវិធី ៕
ប្រភព៖ អគ្គស្នងការដ្ឋាននគរបាលជាតិ
