បន្ទាយមានជ័យ ៖ កម្លាំងនគរបាលការិយាល័យព្រហ្មទណ្ឌកំរិតស្រាល បានបញ្ជូនជនសង្ស័យម្នាក់ទៅសាលាដំបូងខេត្តបន្ទាយមានជ័យ នៅថ្ងៃទី១២ ខែកក្កដា ឆ្នាំ២០២២ បន្ទាប់ពីឃាត់ខ្លួនពាក់ព័ន្ធករណីលួចម៉ូតូ ។
លោកវរសេនីយ៍ទោ ព្រហ្ម ប៊ុនធឿន នាយការិយាល័យនគរបាលព្រហ្មទណ្ឌកំរិតស្រាល នៃស្នងការដ្ឋាននករបាលខេត្តបន្ទាយមានជ័យ បានឲ្យដឹងថា ជនសង្ស័យឈ្មោះ យ៉ាវ ទី ភេទប្រុសអាយុ ៣៣ឆ្នាំ ជាជនជាតិវៀតណាម ស្នាក់នៅភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ។ លោកវរសេនីយ៍ទោបន្តថា ជននេះកាលពីវេលាម៉ោង២២យប់ថ្ងៃទី១០ ខែកកក្កដា ឆ្នាំ ២០២២ បានលួចម៉ូតូម៉ាកសង់កូរ៉េ ពណ៌ក្រហម របស់ឈ្មោះ ណាត ស៊ីណា ភេទប្រុស អាយុ៣៤ឆ្នាំ នៅភូមិជាមួយគ្នា ខណៈដែលជនសង្ស័យចូលទៅសុំបារីម្ចាស់ម៉ូតូនៅក្នុងបន្ទប់ រួចចេញមកវិញឃើញម៉ូតូនៅជិតឡធ្យូង ក៏ជិះចេញទៅបាត់ បន្ទាប់មកម្ចាស់ម៉ូតូប្តឹងនគរបាលក្រុងប៉ោយប៉ែតជួយអន្តរាគមន៍ស្រាវជ្រាវរហូតឃាត់ខ្លួនបាន ។
លោកវរសេនីយ៍ទោ ព្រហ្ម ប៊ុនធឿន បន្តថា នៅចំពោះមុខសមត្ថកិច្ចជនសង្ស័យបានសារភាពថា ខ្លួនពិតជាបានលួចយកម៉ូតូអាខ្មៅ(ណាត ស៊ីណា )នោះមែន ក្រោយពីលួចបានគេជិះទៅអគារថ្មី វេលាម៉ោង១ជិត២ឈានចូលថ្ងៃទី១១ ខែកក្កដា យកទៅលក់ឲ្យឈ្មោះ ណែត ភេទស្រី និងប្តី (មិនដឹងស្គាល់កន្លែងស្នាក់នៅ) បានតម្លៃ១៥ម៉ឺនរៀល ចំពោះលុយដែលលក់ម៉ូតូបានគេទិញស្រាផឹកអស់ ។
លោកវរសេនីយ៍ទោ ព្រហ្ម ប៊ុនធឿន បានបញ្ជាក់បន្ថែមថា ដោយផ្អែកលើបណ្តឹងរបស់ម្ចាស់ម៉ូតូនិងចម្លើយសារភាពជនសង្ស័យ សមត្ថកិច្ចបានរៀបចំសំណុំរឿងបញ្ជូនទៅសាលាដំបូងខេត្តបន្ទាយមានជ័យ ដើម្បីចាត់ការតាមនីតិវិធី ៕
ប្រភព៖ អគ្គស្នងការដ្ឋាននគរបាលជាតិ
