ភ្នំពេញ៖ ឯកឧត្តមឧត្តមសេនីយ៍ឯក ឌី វិជ្ជា អគ្គស្នងការរងនគរបាលជាតិ បានអំពាវនាវឱ្យនគរបាលសន្តិសុខផ្ទៃក្នុង និងនគរបាលអនុវត្តចរាចរណ៍ផ្លូវគោកទាំងអស់ គប្បីបំពេញការងាររបស់ខ្លួនប្រកបដោយវិជ្ជាជីវៈ ដើម្បីចូលរួមអនុវត្តផែនការយុទ្ធសាស្ត្រ ក៏ដូចជាយន្តការកំណែទម្រង់នគរបាលជាតិ និងការកសាងកម្លាំងក្រសួងមហាផ្ទៃ ឲ្យកាន់តែល្អប្រសើបន្ថែមទៀត។
នៅក្នុងពិធីបិទវគ្គបណ្តុះបណ្តាលបំប៉នជំនាញចរាចរណ៍ផ្លូវគោក និងបំប៉នជំនាញសន្តិសុខផ្ទៃក្នុងនៅសាលានគរបាលមិត្តភាពកម្ពុជា-វៀតណាម ក្នុងខេត្តកំពង់ស្ពឺ នាព្រឹកថ្ងៃទី០៥ ខែឧសភា នេះ ឯកឧត្តមឧត្តមសេនីយ៍ឯក ឌី វិជ្ជា បានលើកឡើងថា ក្នុងនាមជាកងកម្លាំងបម្រើសន្តិសុខសណ្តាប់ធ្នាប់ជូនដល់ប្រជាពលរដ្ឋ ក៏ដូចជាប្រទេសជាតិទាំងមូល ត្រូវធ្វើអ្វីគោរពទៅតាមវិន័យ និងវិជ្ជាជីវៈរបស់ខ្លួន ដូចអ្វីដែលស្របទៅតាមការកែទម្រង់របស់ក្រសួងមហាផ្ទៃ ក៏ដូចជារាជរដ្ឋាភិបាល។
ឯកឧត្តមឧត្តមសេនីយ៍ឯក បានបញ្ជាក់ថា ការដែលអគ្គស្នងការដ្ឋាននគបាលជាតិ ក៏ដូចជាក្រសួងមហាផ្ទៃ បានផ្តល់វគ្គបណ្តុះបណ្តាលជំនាញនានាដល់កងកម្លាំងនគរបាលទាំងអស់ គឺដើម្បីបង្កើនជំនាញ សមត្ថភាព និងវិជ្ជាជីវៈ ក្នុងកិច្ចការងារថែរក្សាសន្តិសុខសណ្តាប់ធ្នាប់ជូនដល់ប្រជាជន និងប្រទេសជាតិ។ វគ្គបណ្តុះបណ្តាលនេះ ដើម្បីឲ្យយល់ដឹងកាន់តែច្បាស់បន្ថែមទៀតនូវមូលដ្ឋានច្បាប់របស់កងកម្លាំងនគរបាលផងដែរ។
ឯកឧត្តមឧត្តមសេនីយ៍ឯក ឌី វិជ្ជា ក៏បានថ្លែងកោតសរសើរចំពោះកងកម្លាំងនគរបាលទាំងអស់នាពេលកន្លងមក ដែលបានខិតខំថែរក្សាសន្តិសុខសណ្តាប់ធ្នាប់ជូនដល់ប្រជាជន និងប្រទេសជាតិផងដែរ ជាពិសេសក្នុងរយៈពេលពីរឆ្នាំចុងក្រោយនេះ បានខិតខំយ៉ាងខ្លាំងទាំងយប់ទាំងថ្ងៃ ក្នុងការចូលរួមជាមួយរាជរដ្ឋាភិបាល ទប់ស្កាត់ការរីករាលដាល នៃមេរោគកូវីដ-១៩ ទទួលបានជោគជ័យ តាំងពីចាប់ផ្តើមបិទប្រទេស រហូតបើកដំណើរការប្រទេសឡើងវិញ។
នៅក្នុងពិធីបិទវគ្គបណ្តុះបណ្តាល បំប៉នជំនាញចរាចរណ៍ផ្លូវគោក និងបំប៉នជំនាញសន្តិសុខផ្ទៃនោះដែរ ឯកឧត្តមឧត្តមសេនីយ៍ឯក ឌី វិជ្ជា ក៏បានផ្តល់បទពិសោធន៍ការងារមួយចំនួនដល់សិក្ខាកាម ដែលបានបញ្ចប់ការសិក្សានាពេលនេះ ទាក់ទងនឹងការងារថែរក្សាសន្តិសុខសណ្តាប់ធ្នាប់ កិច្ចការងារស្រាវជ្រាវ និងស៊ើបអង្កេត និងកិច្ចការងារជាច្រើនទៀត ដែលអគ្គស្នងការនគរបាលជាតិ ក៏ដូចជាក្រសួងមហាផ្ទៃ បានប្រគល់ជូន៕
ប្រភព៖ ក្រសួងព័ត៌មាន
