ភ្នំពេញ ៖ នៅថ្ងៃទី០២ ខែឧសភា ឆ្នាំ២០២២ វេលាម៉ោង៣ និង២០នាទីទៀបភ្លឺ មានករណីអគ្គិភ័យមួយបានកើតឡើង បណ្តាលឱ្យឆាបឆេះបន្ទប់ជួល មួយកន្លែង ដោយក្នុងនោះបានបំផ្លាញទ្រព្យសម្បត្តិប្រជាពលរដ្ឋអស់ទាំងស្រុងចំនួន ៤បន្ទប់ជួល ស្ថិតនៅចំណុចផ្លូវ១០៣ ភូមិត្រពាំងឈូក សង្កាត់អូរបែកក្អម ខណ្ឌសែនសុខ រាជធានីភ្នំពេញ ។
លោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះ បានប្រាប់ឲ្យដឹងថា ៖ ក្រោយពីទទួលបានព័ត៌មានពីប្រជាពលរដ្ឋភ្លាម លោកបានបញ្ជាទៅរថយន្តពន្លត់អគ្គិភ័យឲ្យចេញអន្តរាគមន៍ជួយសង្គ្រោះប្រជាពលរដ្ឋផងដែរ ។
លោកវរសេនីយ៍ឯក បានបន្តថា ៖ ករណីអគ្គិភ័យឆាបឆេះផ្ទះប្រជាពលរដ្ឋខាងលើនេះ គឺបណ្តាលមកពីឆ្លងចរន្តអគិ្គសនីបង្កជាអគ្គិភ័យ ហើយធ្វើឲ្យខូចខាតឆេះបន្ទប់ជួលថ្មប្រក់ស័ង្កសី ចំនួន ៤បន្ទប់ ទំហំ (៤ម៉ែត្រ x ៨ម៉ែត្រ) និងខូចខាតសម្ភារៈ ម៉ាស៉ីនលាងម៉ូតូ, គ្រឿងបន្លាស់ទូរស័ព្ទ, សម្ភារៈសាឡន និងពុំបណ្តាលឲ្យរាលដាលដល់ផ្ទះអ្នកជិតខាងឡេីយ ។
លោកវរសេនីយ៍ឯក បានបន្តទៀតថា ៖ នៅក្នុងប្រតិបត្តិការនេះ កម្លាំងជំនាញរបស់យើងបានធ្វើការអន្តរាគមន៍ពន្លត់ទាំងស្រុងនាវេលាម៉ោង៤ និង០០នាទីទៀបភ្លឺ នាថ្ងៃខែឆ្នាំដដែរ ។ ដោយនៅក្នុងប្រតិបត្តិការនេះ គឺកម្លាំងជំនាញរបស់យេីងប្រើប្រាស់រថយន្តការិយាល័យអគ្គិភ័យ រាជធានីភ្នំពេញ ចំនួន ៦គ្រឿង ប្រេីប្រាស់ទឹកអស់ ៦ឡាន ស្មើរនឹង ២៤ម៉ែត្រគូប ៕
ប្រភព៖ អគ្គស្នងការដ្ឋាននគរបាលជាតិ
