ព្រះសីហនុ ៖ នៅថ្ងៃទី២០ ខែមីនា ឆ្នាំ២០២២ វេលាម៉ោង១៨និង៣០នាទី នៅចំណុចលើដងផ្លូវជាតិលេខ៣ស្ថិតក្នុងភូមិបឹងវែង ឃុំវាលរេញ ស្រុកព្រៃនប់ ខេត្តព្រះសីហនុ មានករណីលួចមានស្ថានទម្ងន់ទោស(ឆក់កាបូប) បង្កដោយជនសង្ស័យមួយក្រុមមានគ្នា០៩នាក់ ។
សមត្ថកិច្ចបានឲ្យដឹងថា ជនរងគ្រោះមានឈ្មោះ លាង រីណា ភេទស្រី អាយុ២៧ឆ្នាំ មុខរបរ អ៊ុតសក់ ទីលំនៅ ភូមិព្រៃគុយ ឃុំអំពិល ស្រុកប្រាសាទបាគង ខេត្តសៀមរាប ត្រូវបានក្រុមជនសង្ស័យឆក់កាបូបខណៈខ្លួននិងមិត្តភក្តិនាំគ្នាដើរទៅធ្វើការនៅក្បែរដងផ្លូវជាតិលេខ៣ ។ សម្ភារៈដែលបាត់បង់រួមមាន ៖ -កាប៊ូប យួរ ចំនួន០១ -កាប៊ូបដៃចំនួន០១ -កាតចាក់វ៉ាក់សាង់ ចំនួន០១សន្លឹក -អត្តសញ្ញាណប័ណ្ណសញ្ជាតិខ្មែរ ចំនួន០១សន្លឹក -ប្រាក់ចំនួន ៣០០ដុល្លារ និងសម្ភារៈផាត់មុខ០១ចំនួន ។
ក្រោយពេលទទួលបានព័ត៌មាននេះភ្លាមល្បាតកម្លាំងអធិការដ្ឋាននគរបាលស្រុកព្រៃនប់ ដេញស្ទាក់ចាប់បានម៉ូតូចំនួន២គ្រឿង និងជនសង្ស័យចំនួន៤នាក់ ។ បន្ទាប់មក បានសហការជាមួយអធិការដ្ឋាននគរបាលក្រុងបូកគោ ខេត្តកំពត បានធ្វើការឃាត់ខ្លួនជនសង្ស័យបានចំនួន២នាក់និងម៉ូតូ១គ្រឿងបន្ថែមទៀត ។ រីឯបក្ខពួកចំនួន៣នាក់ទៀតបានកំពុងគេចខ្លួន ។
តាមចម្លើយរបស់ជនសង្ស័យ បានសារភាពថា ពួកគេបានជិះម៉ូតូមកពីខេត្តកំពតចំនួន០៥គ្រឿងមានគ្នាចំនួន០៩នាក់ មកលេងនៅខេត្តព្រះសីហនុ ហើយបានជិះត្រឡប់ទៅខេត្តកំពត ។ មកដល់ចំណុចខាងលើ ឃើញស្ត្រី២នាក់កាន់កាបូបដើរ ឃើញឱកាសល្អក៏ធ្វើសកម្មភាពឆក់យកក្នុងគោលបំណងជិះចំដៅទៅខេត្តកំពតវិញ តែត្រូវសមត្ថកិច្ចបានដេញស្ទាក់ចាប់ជាបន្តបន្ទាប់ រីឯ៣នាក់ និងម៉ូតូ២គ្រឿងទៀតបានជិះរត់គេចខ្លួន ។
បច្ចុប្បន្ន ករណីនេះកម្លាំងអធិការដ្ឋាននគរបាលស្រុកព្រៃនប់បានកសាងសំណុំរឿងអនុវត្តបន្តតាមនីតិវិធី ៕
