សៀមរាប ៖ សមត្ថកិច្ចនគរបាលក្រុងសៀមរាបបានស្រាវជ្រាវឃាត់ជនសង្ស័យម្នាក់ ពាក់ព័ន្ធករណីឃាតកម្ម ប្រព្រឹត្តនៅថ្ងៃទី០៨ ខែមីនា ឆ្នាំ២០២២ វេលាម៉ោង០៥ និង៣០នាទី ស្ថិតនៅផ្ទះភូមិចុងកៅស៊ូ សង្កាត់ស្លក្រាម ក្រុងសៀមរាប ខេត្តសៀមរាប ។
ជនសង្ស័យមានឈ្មោះ ស្រេង សុខ ភេទប្រុស អាយុ ៤៦ឆ្នាំ មុខរបរនៅផ្ទះ មានស្រុកំណើតនៅភូមិអង្គឃ្លាំ ឃុំប្រឡាយ ស្រុកស្ទោង ខេត្តកំពង់ធំ បច្ចុប្បន្នរស់នៅភូមិចុងកៅស៊ូ សង្កាត់ស្លក្រាម ក្រុងសៀមរាប ខេត្តសៀមរាប ត្រូវសមត្ថកិច្ចឃាត់ខ្លួននៅថ្ងៃទី០៨ ខែមីនា ឆ្នាំ២០២២ ។
លោកឧត្តមសេនីយ៍ត្រី ភឹង ចិន្តារ៉េត ស្នងការរង ទទួលផែនការងារព្រហ្មទណ្ឌ នៃស្នងការដ្ឋាននគរបាលខេត្តសៀមរាប បានបញ្ជាក់ថា មានករណីឃាតកម្មបង្កឡើងដោយជនសង្ស័យខាងលើ បានធ្វើសកម្មភាពយកកាំបិតប៉័ងតោកាប់ប្រពន្ធឈ្មោះ សោរ គឹមហៀង អាយុ៤២ឆ្នាំ រស់នៅក្នុងផ្ទះជាមួយគ្នាត្រង់.ក បណ្តាលឲ្យស្លាប់ រួចយកភួយគ្របជនរងគ្រោះហើយចាក់សោរទ្វារផ្ទះ របង និងជិះម៉ូតូទៅជួបសមត្ថកិច្ចនៅម្តុំស្រះស្រង់ ហើយប្រាប់ដល់សមត្ថកិច្ចថា ខ្លួនសម្លាប់ប្រពន្ធ ។
ក្រោយពីទទួលព័ត៌មាន សមត្ថកិច្ចក៏បាននាំជនសង្ស័យទៅកន្លែងកើតហេតុ ដោយឃើញថាពិតជាមានមនុស្សស្លាប់ពិតមែន។
តាមការសាកសួររបស់សមត្ថកិច្ច ជនសង្ស័យបានឆ្លើយសារភាពថា ខ្លួនពិតជាបានរុញប្រពន្ធធ្លាក់ពីលើកាំជណ្តើរ រួចយកកាំបិតប៉័ងតោកាប់សម្លាប់ប្រពន្ធពិតមែន ដោយមូលហេតុជនសង្ស័យខឹងប្រពន្ធ មិនសូវយកចិត្តទុកដាក់ក្រុមគ្រួសាររបស់ខ្លួន និងបង្ខំអោយខ្លួនផឹកទឹកក្រូចឆ្មាសុទ្ធ ខណៈពេលដែរជនសង្ស័យមានជំងឺក្រពះ ជំងឺតំរងនោម និងកំពុងព្យាបាលជំងឺកូវីដ-១៩។ សមត្ថកិច្ច ក៏បាននាំជនសង្ស័យទៅយកសំណាកពាក់ព័ន្ធនឹងជំងឺកូវីដ-១៩ លទ្ធផលអវិជ្ជមាន ។
បច្ចុប្បន្ន ជនសង្ស័យត្រូវបានសមត្ថកិច្ចធ្វើការឃាត់ខ្លួន និងកសាងសំណុំរឿងបញ្ជូនទៅសាលាដំបូងខេត្តដើម្បីអនុវត្តនីតិវិធីបន្ត ។ ចំណែកសពជនរងគ្រោះ សមត្ថកិច្ចបានធ្វើការប្រគល់ជូនក្រុមគ្រួសារយកទៅធ្វើបុណ្យតាមប្រពៃណី ៕
ប្រភព៖ អគ្គស្នងការដ្ឋាននគរបាលជាតិ
