ខេត្តកែប ៖ ដោយអនុវត្តតាមការណែនាំដ៏ខ្ពង់ខ្ពស់ ពីសំណាក់ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងការណែនាំផ្ទាល់ពីលោកឧត្តមសេនីយ៍ទោ សម្បត្តិ សុធារដ្ឋ ស្នងការនគរបាលខេត្តកែប នៅព្រឹកថ្ងៃសៅរ៍ ៣រោច ខែមាឃ ឆ្នាំឆ្លូវ ត្រីស័ក ព.ស២៥៦៥ ត្រូវនឹងថ្ងៃទី១៩ ខែកុម្ភៈ ឆ្នាំ២០២២ ស្នងការដ្ឋាននគរបាលខេត្តកែប បានរៀបចំធ្វើតេស្តរហ័ស(Rapit Test) រកវីរុសកូវីដ-១៩ ជូនដល់ថ្នាក់ដឹកនាំ និងមន្ត្រីនគរបាលពីថ្នាក់ខេត្ត ដល់ថ្នាក់មូលដ្ឋាន បានចំនួន១៥០នាក់ (ស្រី៩នាក់) ក្នុងនោះ វិជ្ជមានចំនួន១០នាក់ និងកំពុងបន្តធ្វើតេស្ត ។
ចំពោះមន្ត្រីនគរបាលដែលរកឃើញមានផ្ទុកវីវុសកូវីដ-១៩ លោកឧត្តមសេនីយ៍ទោ ស្នងការ បានណែនាំឲ្យនៅដាច់ដោយឡែកពីអ្នកដទៃ និងសម្រាកព្យាបាលនៅផ្ទះ ។
ជាមួយគ្នានោះ លោកស្នងការ ក៏បន្តណែនាំដល់ប្រធានផែន ប្រធានអង្គភាព និងអធិការនគរបាលក្រុង ស្រុក ឲ្យផ្សព្វផ្សាយដល់មន្ត្រីក្រោមឱវាទរបស់ខ្លួនយកចិត្តទុកដាក់ថែរក្សាសុខភាព និងបន្តអនុវត្តឲ្យបានខ្ជាប់ខ្ជួននូវវិធានការសុខាភិបាល និងវិធានការ «បីកុំ បីការពារ» ផងដែរ ៕
ប្រភព៖ អគ្គស្នងការដ្ឋាននគរបាលជាតិ
