ភ្នំពេញ៖ នៅព្រឹកថ្ងៃទី១១ ខែកុម្ភ: ឆ្នាំ២០២២ នៅសាលប្រជុំថ្មីនៃអគារស្នងការដ្ឋាននគរបាលរាជធានីភ្នំពេញ ឯកឧត្តម ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ បានអញ្ជេីញដឹកនាំកិច្ចប្រជុំប្រចាំខែមករា និងទិសដៅបន្តប្រចាំខែកុម្ភ: របស់ផែនការងារចរាចរណ៍ ។ ក្នុងពិធីនេះដែរ ក៏មានការចូលរួមពីលោក លោកស្រីស្នងការរង លោកនាយ នាយរងការិយាល័យចរាចរណ៍ផ្លូវគោក លោកអធិការនគរបាលខណ្ឌទាំង១៤ និងលោកប្រធានក្រុមគោលដៅ បញ្ជាចរាចរណ៍ទាំងអស់ ។
ជាកិច្ចចាប់ផ្តេីមលោកនាយការិយាល័យចរាចរណ៍ផ្លូវគោក បានធ្វេីការរាយការណ៍ជូនអង្គប្រជុំអំពីកិច្ចការដែលបានអនុវត្តក្នុងខែមករា ដូចជាលទ្ធផលដែលអនុវត្តបាន ដំណោះស្រាយ បញ្ហាប្រឈម ក៏ដូចជាផែនការដេីម្បីអនុវត្តបន្តនៅខែបន្ទាប់ ។ ក្នុងឱកាសនោះដែរក៏មានការចូលរួមមតិពីលោកស្នងការរង លោកប្រធានគោលដៅបញ្ជាចរាចរណ៍មួយចំនួន ទាក់ទងទៅនឹងការអនុវត្តការងារជាប្រចាំ ការជួយសម្រួលចរាចរណ៍ ក៏ដូចជាបញ្ហាប្រឈមមួយចំនួនដែលកេីតមានឡេីងក្នុងការងារអនុវត្តការងារតាមគោលដៅ ។
ជាមួយនោះដែរឯកឧត្តមស្នងការ បានធ្វេីការណែនាំដល់កម្លាំងចរាចរណ៍ទាំងអស់ គ្រប់គោលដៅត្រូវទទួលខុសត្រូវខ្ពស់បំផុត លេីការរៀបចំសណ្តាប់ធ្នាប់តាមដងផ្លូវ ជួយសម្រួលចរាចរណ៍ដេីម្បីកាត់បន្ថយការកកស្ទះ ជាពិសេសត្រូវល្បាតចល័តជាប្រចាំតាមដងផ្លូវសំខាន់ៗ ដេីម្បីធានាឱ្យបាននូវសុវត្ថិភាពជូនថ្នាក់ដឹកនាំជាតិ អន្តរជាតិ ម្យ៉ាងវិញទៀតមន្ត្រីទាំងអស់មុននឹងចេញ អនុវត្តការងារតាមគោលដៅ ត្រូវតែធ្វេីការត្រួតពិនិត្យមេីលឱ្យបានល្បាស់លាស់លេីការស្លៀកពាក់ ឱ្យបានត្រឹមត្រូវ ស្អាតបាត ស័កសមជាកងកម្លាំងនរបាលជាតិ
ជាកិច្ចបញ្ចប់ឯកឧត្តមស្នងការ បានផ្តល់មតិណែនាំល្អៗជាច្រេីន ដល់សមាជិកនៃអង្គប្រជុំ ជាពិសេសការិយាល័យចរាចរណ៍ផ្លូវគោក ត្រូវមានការបែងចែក តួនាទីភារកិច្ច លោកនាយរងការិយាល័យទាំងអស់ ត្រូវតែចុះត្រួតពិនិត្យកម្លាំងតាមគ្រប់គោលដៅ ពិនិត្យទាំងសម្ភារ: ព្រមទាំងធ្វេីការណែនាំអនុវត្តការងារឲ្យបានត្រឹមត្រូវ អនុវត្តប្រកបដោយកាយវិការ និងប្រេីប្រាស់សម្តីឲ្យបានសមរម្យ លុបបំបាត់ឲ្យបាននូវការចេញចាប់ដៃយកលុយពីរថយន្តដឹកទំនិញ និងរថយន្តផ្សេងៗទៀត ណែនាំ ឲ្យគ្រប់គោលដៅត្រួតពិនិត្យមិនឲ្យមានរុឺម៉កដឹកធ្យូង ដឹកសម្លៀកបំពាក់ ចូលទីតាំង ឬផ្លូវដែលសាលារាជធានីភ្នំពេញ បានធ្វេីការហាមឃាត់ មួយវិញទៀតនៅពេលប្រជាពលរដ្ឋបេីកបរល្មេីសច្បាប់ សូមពន្យល់ណែនាំគាត់ឲ្យបានច្បាស់អំពីកំហុសរបស់គាត់ ជាមួយសម្តី និងកាយវិការសមរម្យ ជាពិសេសរាល់ការផាកពិន័យត្រូវតែចេញបណ្ណផាកពិន័យឲ្យបានត្រឹមត្រូវតាមច្បាប់ ហាមមិនឲ្យមានការឈ្លោះប្រកែកជាមួយអ្នកស្រវឹងជោគជាំ ជាមួយអ្នកបង្កការអុកឡុកនៅទីកន្លែងកេីតហេតុ ដែលធ្វេីឲ្យប៉ះពាល់ដល់ទិដ្ឋភាពរួមរបស់សង្គម ត្រូវនាំបុគ្គលដែលប្រព្រឹត្តខុសទាំងនោះយកមកសួរនាំនៅអង្គភាព ត្រូវអនុវត្តចំពោះរថយន្តធុនធំ ដែលចូលខុសម៉ោង មួយវិញទៀត កម្លាំងចរាចរណ៍គ្រប់គោលដៅ ត្រូវតែជួយសម្រួលចរាចរណ៍ឱ្យបានល្អ ចំពោះក្បួនរថយន្តអាទិភាព ដូចជាក្បូនថ្នាក់ដឹកនាំកំពូលៗ ក្បូនគណប្រតិភូជាតិ អន្តរជាតិ ក៏ដូចជារថយន្តពន្លត់អគ្គិភ័យ រថយន្តសង្គោះបន្ទាន់ ។ល។
សូមគ្រប់អង្គភាពទាំងអស់ត្រូវតាមដានរាល់ព័ត៌មាន ប្រមូលព័ត៌មាន និងសង្ខេបមកឲ្យអ្នកនាំពាក្យ នៃស្នងការដ្ឋាននគរបាលរាជធានីភ្នំពេញ ដេីម្បីធ្វេីការបកស្រាយ ឆ្លេីយតប និងផ្តល់ព័ត៌មានបន្តទៅតាមសារព័ត៌មានផ្សេងៗ ដេីម្បីផ្សព្វផ្សាយបន្ត ៕
