សៀមរាប៖ កាលពីម៉ោងប្រមាណ ១១:៤០នាទី ថ្ងៃទី៩ ខែកុម្ភៈ ឆ្នាំ២០២២នេះ កម្លាំងសមត្ថកិច្ចនៃស្នងការដ្ឋាននគរបាលខេត្តសៀមរាប បានធ្វើការឃាត់ខ្លួនជនសង្ស័យ ២នាក់ ពាក់ពន្ធករណីឃាតកម្មនៅចំណុចភូមិរំរោងកញ្ជោច ឃុំឫស្សីលក ស្រុកជីក្រែង ។
បើតាមប្រភពពីសមត្ថកិច្ចបានអោយដឹងថា ជនសង្ស័យទី១ឈ្មោះ ចិត្ត ភន ភេទប្រុស អាយុ២១ឆ្នាំ មុខរបរកម្មករសំណង់ រស់នៅភូមិរំរោងកញ្ចោច ឃុំឫស្សីលក ស្រុកជីក្រែង ខេត្តសៀមរាប ។ ដោយឡែកម្នាក់ទៀតឈ្មោះ ឡាយ សាលី ភេទស្រី អាយុ១៧ឆ្នាំ មុខរបរសិស្ស រស់នៅភូមិបឹងវៀន ឃុំតាយ៉ែក ស្រុកសូទ្រនិគម ខេត្តសៀមរាប។ ក្នុងនោះជនរងគ្រោះឈ្មោះ ឡាយ ប៉ុនលេង ភេទប្រុស អាយុ១១ឆ្នាំ៤ខែ មុខរបរសិស្ស រស់នៅភូមិបឹងវៀន ឃុំតាយ៉ែក ស្រុកសូទ្រនិគម ខេត្តសៀមរាបបានស្លាប់នៅក្នុងអង្រឹង។
បើយោងតាមចម្លើយសារភាពរបស់ឈ្មោះ ឡាយ សាលី បានអោយដឹងថា នៅថ្ងៃកើតហេតុគឺខ្លួននិងប្អូនប្រុសជាជនរងគ្រោះនៅផ្ទះតែ២នាក់។ ចំណែកឪពុកម្តាយទៅស្នាក់នៅនិងធ្វើចម្ការនៅភូមិខ្វាវ ឃុំខ្វាវ ស្រុកជីក្រែង ខេត្តសៀមរាប។ លុះមកដល់ម៉ោង១៩:០០នាទី សង្សាររបស់ខ្លួនឈ្មោះ ចិត្ត ភន បានផ្ញើតាមគណនីហេ្វសប៊ុកមកខ្លួនថា គេសុំមកលេងផ្ទះ។ នាងក៏យល់ព្រម លុះដល់វេលាម៉ោង២១:០០នាទី ឈ្មោះ ចិត្ត ភន ក៏បានទៅដល់ ហើយគេបានអោបថើប និងសុំនាងរួមភេទ នាងក៏យល់ព្រម ហើយនាំគ្នាទៅរួមភេទនៅចំណុចរោងដាក់ឈើ ក្រោយផ្ទះ។ ខណៈពេលកំពុងរួមភេទស្រាប់តែប្អូនប្រុសខ្លួនឈ្មោះ ឡាយ ប៉ុនលេង បានទៅទាន់ ហើយនិយាយថាគេនិងយករឿងពួកខ្លួនខាងលើប្រាប់ទៅឪពុកម្តាយទាំងអស់។ ពេលនោះខ្លួននិងសង្សារក៏រួមគំនិតគ្នាសម្លាប់ជនរងគ្រោះបំបិទមាត់តែម្តង ដោយឈ្មោះ ចិតុ្ត ភន បានវាយទៅលើជនរងគ្រោះចំត្រង់កផ្នែកខាងក្រោយមួយដៃបណ្តាលឱ្យជនរងគ្រោះដួលសន្លប់ផ្កាប់មុខទៅលើដី ហើយខ្លួនស្ទុះទៅចាប់ជើងជនរងគ្រោះទាំងសងខាង ហើយឈ្មោះ ចិត្ត ភន បានចាប់ផ្ងារសព យកដៃទាំងពីរមួលបំបាក់កសពតែម្តង។ ក្រោយធ្វើសកម្មភាពនេះរួចហើយឈ្មោះ ចិត្ត ភន ក៏បានឡើងជិះម៉ូតូគេចខ្លួនបាត់ទៅ។
ក្នុងនោះឈ្មោះ ចិត្ត ភន ក៏បានសារភាពថា រូបគេពិតជាបានធ្វើសកម្មភាពខាងលើពិតប្រាកដមែន ដោយខ្លួនជាអ្នកវាយ និងមួលបំបាក់កជនរងគ្រោះ។ ចំណែកឈ្មោះ ឡាយ សាលី បានយកខ្សែក្រវាត់ទៅរឹតកសពបន្ថែម និងបានលើកសពទៅដាក់ក្នុងអង្រឹងលើផ្ទះ។ បន្ទាប់មកយកខ្សែក្រវាត់ខាងលើទៅចងភ្ជាប់នឹងខ្សែអង្រឹងដើម្បីបង្វែរថាជាករណីអត្តឃាតដោយចងកសម្លាប់ខ្លួន៕
